ცოტა ხნის წინ, ჟურნალმა „უოლ სტრიტ ჯორნალმა“ გამოაქვეყნა სტატია, რომელიც ყველაზე ახალგაზრდა ოლიმპიელის ვინაობას ეძღვნება. ავტორს სურს, გაიგოს, ვინ არის ცნობილ ფოტოზე გამოსახული ყველაზე პატარა ოლიმპიელი.
ფოტო 1900 წელსაა გადაღებული და მასზე ორ გამარჯვებულ ნიჩბოსან სპორტსმენთან ერთად პატარა ბიჭია გამოსახული. სტატიაში მისი ასაკისა და წარმომავლობის შესახებ რამდენიმე ვერსიაა განხილული, თუმცა სამი ათეული წლის უშედეგო ძიების შემდეგ ცოტა ხნის წინ ახალი გაჩნდა ჰიპოთეზა: შესაძლოა, ეს ბიჭი ქართველი იყოს.
„ეს არის ოლიმპიადის ისტორიაში ყველაზე დიდი საიდუმლო“, – ამბობს ოლიმპიადის ისტორიკოსების საერთაშორისო საზოგადოების პრეზიდენტი, დევიდ უოლეჩინსკი.
უოლეჩინსკი წლების მანძილზე აქტიურად ავრცელებდა ფოტოს იმ იმედით, რომ ვინმე მას ამოიცნობდა. „30 წელია ამას ვცდილობ, მაგრამ უშედეგოდ“, – აცხადებდა ის.
როგორც სტატიის ავტორი, ჯოშუა რობინსონი წერს, ოლიმპიადის ისტორიკოსების საერთაშორისო საზოგადოებამ მიიღო წერილი, რომელმაც ვნებათაღელვა გამოიწვია. წერილის ავტორი ქართველი ისტორიკოსი და ჟურნალისტი პაატა ნაცვლიშვილია.
26-გვერდიან წერილში ნაცვლიშვილი ამტკიცებს, რომ უცნობი ბიჭუნა არა ფრანგი, არამედ წარმოშობით ქართველი გიორგი ნიკოლაძეა. ბიჭი გამოჩენილი ოჯახიდან იყო და იმ დროისთვის საფრანგეთში იმყოფებოდა. საჭირო დროს საჭირო ადგილას ყოფნით ის არა მხოლოდ დაეხმარა ნიდერლანდელებს პირველი ადგილის მოპოვებაში, არამედ თავადაც ექსტრაორდინალურ ცხოვრებას ეწეოდა.
ნაცვლიშვილის ანგარიში ეფუძნება 1980 წელს ნიკოლაძის დასთან ინტერვიუს, რომელიც იხსენებს, როგორ მოიგო მისმა ძმამ „ნავების შეჯიბრი საფრანგეთში“. ამის შემდეგ ნაცვლიშვილი წერს, რომ გიორგი შემდეგში გახდა „მათემატიკოსი, მეტალურგი, სახელმწიფო პირი, საზოგადო მოღვაწე, გამორჩეული ათლეტი და სპორტული ორგანიზატორი; თბილისის სახელმწიფო უნვერსიტეტის პროფესორი; რუსეთში, უკრაინასა და საქართველოში რამდენიმე სპორტული საზოგადოების დამაარსებელი; ქართულ ენაზე ტექნიკური და სპორტული ტერმინების ავტორი“.
ოლიმპიადის ისტორიკოსების საერთაშორისო საზოგადოების წევრები მასალებს გაეცნენ, თუმცა მათი ინფორმაციის სისწორეში დარწმუნებული ჯერ კიდევ არ არიან. მათი თქმით, ბევრი მტკიცებულება არაპირდაპირია; გიორგი ნიკოლაძისა და ფოტოზე გამოსახული ბავშვის მსგავსებაც აფიქრებთ. აშშ-ის ოლიმპიური კომიტეტის ისტორიკოსის, ბილ მოლონის თქმით, „ის მცირედ წააგავს მას“.
რაც შეეხება იმას, თუ როგორ მოხვდა მცირეწლოვანი ბავშვი ოლიმპიადაზე, სტატიის ავტორი წერს, რომ საფრანგეთში ჩატარებული 1900 წლის ოლიმპიადა ნამდვილი ფიასკო იყო. ზოგიერთმა სპორტსმენმა ისიც კი არ იცოდა, რაში იღებდა მონაწილეობას. იმ დროს ნიჩბოსნები მესაჭეებად ხშირად პატარა ბიჭებს იყენებდნენ. ეს უცნობი ბიჭი კი ოლიმპიადაზე ნიჩბოსანთა ჰოლანდიელ წყვილს ეხმარებოდა.
უოლეჩინსკის განცხადებით, „ბავშვი ხალხის მასაში გაუჩინარდა და მას შემდეგ მის შესახებ აღარაფერი სმენიათ“.
საბოლოოდ კი ჰოლანდიელმა ისტორიკოსმა, ანტონი ბიჟრეკმა, რომელმაც ფოტო 1960 წელს აღმოაჩინა, განაცხადა, რომ „საიდულმო ისევ საიდუმლოდ რჩება“.
