სტატიაში გიზიარებთ  პროექტის გამოცდილებას, რომელიც შესაძლოა საინტერესო იყოს სხვადასხვა საგნის მასწავლებლებისთვის.

პროექტი გულისხმობს კლასში სამხრეთ საფრანგეთის ტრადიციული საშობაო ნუგბარის დამზადებას. პროექტი შესაძლოა განხორციელდეს კლასში, სკოლის სამზარეულოში, მოსწავლეთა  მცირე ჯგუფებში.

რა მასალა გვჭირდება მანდიანტების მოსამზადებლად?

1. შოკოლადი (საკონდიტრო, ან ნებისმიერი), სასურველია სხვადასხვა: შავი, თეთრი, რძიანი.
2. თხილეული (ნუში, თხილი, გოგრის თესლი, ნიგოზი ან სხვა)
3. ჩირეული (ქიშმიში, დაჭრილი კურაგა, გოჯიბერი ან სხვა)
4. პატარა ჯამები შოკოლადის დასადნობად
5. გრძელი კოვზები შოკოლადის მოსარევად
6. დაბალი, დიდი ჯამი ცხელი წყლისთვის
7. ელექტროქურა
8. ვერცხლის ქაღალდი ან საკონდიტრო მუყაო
9. საკონდიტრო თერმომეტრი(სასურველია, თუმცა არ არის აუცილებელი
10. სამზარეულოს სასწორი(სასურველია, თუმცა არ არის აუცილებელი)

როგორ ვამზადებთ შოკოლადის მენდიანტებს?

• ვჭრით და ვწონით შოკოლადს
• დასადნობად ვათავსებთ პატარა ჯამში
• წინასწარ ვაცხელებთ წყლიან დიდ ჯამს, რომელშიც ვათავსებთ პატარა ჯამს შოკოლადის დასადნობად
• შოკოლადს ვურევთ და ვაცხელებთ 40 გრადუსამდე, ვაგრილებთ 28-29 გრადუსამდე
• ვასხამთ ვერცხლის ქაღალდზე მონეტებად
• შოკოლადის მონეტებს ვაფორმებთ თხილეულს და ჩირეულს
• ველოდებით გაგრილებას
• შოკოლადის ხარისხის შენარჩუნებისთვის მნიშვნელოვანია გავითვალისწინოთ, რომ:
  • შოკოლადში არ უნდა მოხვდეს წყალი
  • ასევე შოკოლადის დნობა არ უნდა მოხდეს ზედმეტად მაღალ ტემპერატურაზე.

რა კომპეტენციები განუვითარდებათ მოსწავლეებს ამ პროექტის განხორციელებით?

• პროექტის მართვის კომპეტენციები
  • სხვადასხვა საგნების შემსწავლელთათვის პროექტი შესაძლოა დაიწყოს გამოწვევით ან სამოტივაციო შეკითხვით
  • საჭირო ინგრედიენტების და მასალის ჩამონათვალის შედგენა, ფუნქციების გადანაწილება მოსწავლეებს შორის

• ფრანგული ენა
  • შემსწავლელთათვის პროექტი შესაძლოა დაიწყოს ვიდეოს ნახვით, ინგრედიენტებისა და საჭირო მასალის ჩანიშვნით, ლექსიკის დამუშავებით მაგალითად –
  • კეთების პროცესი წარიმართება ფრანგულ ენაზე, რაც მოსწავლეებს შესაძლებლობას მისცემს გამოიყენონ შესწავლილი მასალა
  • შესაძლებელია მოსწავლეების მიერ მცირე ვიდეოების გადაღება ფრანგულად მითითებებითა და განმარტებებით, რომლითან მოსწავლეები შეძლებენ ცოდნის გამოყენებას და განმტკიცებას.
• ინტერკულტურული მიმართულებით შესაძლებელია მოსწავლეებმა განიხილონ ქართული ტრადიციული საშობაო ნუგბარი გოზინაყი და მენდიანტები. შეისწავლონ და განიხილონ ამ ორი ნუგბარის ტრადიციები.
• ზუსტი და სამუნებისმეტყველო მეცნიერებების მიმართულებით შესაძლებელია შემდეგი კვლევითი პროექტების განვითარება
  • სასწორის გამოყენება, წონის და მოცულობის შედარება
  • თერმომეტრის გამოყენება, ჰაერის, წყლის, შოკოლადის ტემპერატურის მონაცემების ჩანიშვნა
  • შოკოლადის ისტორიის შესწავლა, შოკოლადის გეოგრაფია, საკონდიტრო ტრადიციები
  • ინგრედიენტების მახასიათებლების შესწავლა (კაკაო, ნუში, თხილი, ქიშმიში…)

დანართი 1. ინფორმაცია მენდიანტების წარმოშობის შესახებ

მენდიანტი – ტრადიციული ფრანგული ნუგბარი

რას ნიშნავს სიტყვა მენდიანტი?

მენდიანტი (mendiant fr.) ფრანგულად მოწყალების მთხოვნელს, მათხოვარს ნიშნავს.

მენდიანტი საშობაო ნუგბარის სახელწოდებაა, რომელიც შოკოლადით, თხილეულითა და ჩირებით ამზადებენ სამხრეთ საფრანგეთში.

რატომ ჰქვია ნუგბარს ეს სახელი? 

ამბობენ, რომ ამ ნუგბარის ამბავი XII საუკუნის საფრანგეთში იწყება. შუა საუკუნეების ფრანგულ ეკლესიაში მოწყალების მთხოვნელთა ოთხი სამონასტრო ორდენი არსებობდა (ფრანცისკანელები, დომინიკელები, ავგუსტინელები და კარმელიტები).

ამ ორდენების წევრები მათხოვრობდნენ და მხოლოდ ხალხის ქველმოქმედებისა და გულუხვობის წყალობით ცხობრობდნენ.

შოკოლადის ნუგბარი ოთხი ინგრედიენტით ირთვებოდა. თითოეული ინგრედიენტის სახეობა სამონასტრო ორდენის სამოსს უკავშირდებოდა:

• რუხსამოსიანი ძმები (ფრანცისკანელები) – ქიშმიში
• წაბლისფერსამოსიანი ძმები (კარმელიტები) – თხილი,
• თეთრსამოსიანი ძმები (დომინიკელები) – შუაზე გაჭრილი ნუში
• იისფერსამოსიანი ძმები (ავგუსტინელები) – ლეღვის ჩირი.

როდის ამზადებდნენ მენდიანტებს?

მენდიანტები საშობაო ნუგბარია. სამხრეთ-დასავლეთ საფრანგეთში ტრადიციულად საშობაო სუფრას ცამელი სახის ტკბილეულით აწყობდნენ: თეთრი და შავი ნუგა, ფინიკი, ცოცხალი ხილი, ჩირები, შოკოლადი, თხილეული, ქიშმიში…  მენდიენტი დღეს პოპულარული საშობაო ნუგბარია, რომელსაც წელიწადის სხვა დროსაც მიირთმევენ.

ეროვნული სასწავლო გეგმა ეფუძნება პიროვნების განვითარებაზე ორიენტირებულ კონსტრუქტივისტულ საგანმანათლებლო კონცეფციას და განსაზღვრავს ხუთ ძირითად საგანმანათლებლო პრინციპს, რომელსაც უნდა დაეყრდნოს სწავლა-სწავლების პროცესი. ამასთან ერთად,  მკაფიოდ არის აქცენტირებული ოთხი ძირითადი საკითხი:

• რა მიზნით ვასწავლით საგანს?
• რა რესურსებზე დაყრდნობით ვასწავლით?
• სწავლების რა მეთოდებსა და სტრატეგიებს ვიყენებთ?
• როგორ ვაფასებთ მოსწავლის მიღწევებს?

სასურველი სასწავლო მიზნების მისაღწევად მასწავლებელს სწავლების სხვადასხვა მიდგომების, მეთოდების სტრატეგიების, გზებისა და საშუალებების გამოყენება უწევს. მათი შერჩევისას მრავალი ფაქტორის გათვალისწინებაა აუცილებელი. შერჩეული სტრატეგიები და მიდგომები უნდა  განვიხილოთ მოსწავლის ინტერესებისა და მოტივაციური ფაქტორების ჭრილში. გავითვალისწინოთ მათი შესაძლებლობები და პრიორიტეტები. ამასთან,  ხელი უნდა შეუწყონ მოსწავლის სოციალური, აკადემიური თუ ყოველდღიურ ცხოვრებასთან დაკავშირებული უნარ-ჩვევების გამოყენება-განვითარებას.

მსოფლიო საგანმანათლებლო პოლიტიკის ძირითადი მიმართულებაა  მოსწავლეზე ორიენტირებული განათლება. ინტერაქტიული მეთოდიკა კი ორიენტირებულია მოსწავლეზე, რომელიც სასწავლო პროცესის ცენტრალური ფიგურაა. მოსწავლეზე ორიენტირებული მეთოდიკა ემსახურება ბავშვის შინაგანი ძალებისა და შესაძლებლობების მაქსიმალურად გამოვლინებას.

კონსტრუქტივისტულ-ინტერაქტიულ, მოსწავლეზე ორიენტირებული სწავლების მნიშვნელოვან იარაღს წარმოადგენს ისეთი მიდგომები, როგორიცაა კვლევაზე, პრობლემაზე და პროექტზე დაფუძნებული სწავლება. აღნიშნული სტრატეგიები უზრუნველყოფს მოსწავლის აქტიურ როლს სწავლების პროცესში და ავითარებს მაღალ სააზროვნო უნარებს.  ინტერაქტიული გაკვეთილები ამ პროცესის განუყოფელი ნაწილია.

სწორედ ამიტომ, ეროვნულ სასაწავლო გეგმა იწყება დიმიტრი უზნაძის სიტყვებით: „სწავლაში ძირითადი მნიშვნელობა იმ პროდუქტს კი არ აქვს, რომელსაც იგი კონკრეტული ჩვევის ან კონკრეტული შინაარსის მქონე ცოდნის სახით გვაძლევს, არამედ განსაზღვრული მიმართულებებით მოსწავლის ძალების განვითარებას“.

განვიხილავ ჩემს ერთ-ერთ ინტერაქტიულ გაკვეთილს.

მიმართულება-რიცხვები და მოქმედებები

სამიზნე ცნება-მათემატიკური მოდელი, კანონზომიერება, ლოგიკა

თემა: n-ური ხარისხის ფესვი და რაციონალურმაჩვენებლიანი ხარისხი

მიზანი:

რიცხვის ჩაწერა n-ური ხარისხის ფესვის  და  რაციონალურმაჩვენებლიანი ხარისხის  გამოყენებით;

რიცხვები და მათი გამოყენება ყოველდღიურ ცხოვრებასა და მეცნიერების სხვადასხვა დარგში.

აქტივობა 1 . ელექტრონული რესურის შექმნა და გამოყენება სასწავლო პროცესში.

მიზანი- ციფრული და მედიაწიგნიერების განვითარება.

მოსწავლეებმა წარმოადგინეს საშინაო დავალება, მათ მიერ დამოუკიდებლად შექმნილი პლაკატები.   Canva.com არის ინსტრუმენტი, რომლის მიხედვითაც შესაძლებელია პლაკატების შექმნა. მასში მუშაობა ძალიან მარტივია, როგორც კომპიუტერით, ასევე ტელეფონით. პირველ რიგში რეგისტრირდები, ირჩევ ენას, შემდეგ ირჩევ პლაკატის დიზაინს, რომლის უამრავი შაბლონია განთავსებული Canva-ში ჩანაწერების გასაკეთებლად, ქმნი პროდუქტს, იგი არის შესანიშნავი საშუალება მასალების ერთმანეთთან დასაკავშირებლად და გასაერთიანებლად.

ეს    არის ინსტრუქცია, როგორ შევქმნათ სასურველი დიზაინის პლაკატი. მოსწავლეები თავიანთ ნამუშევრებს აგზავნიდნენ ონლაინ სივრცეში. რამდენიმე მათგანის პრეზენტაცია მოხდა გაკვეთილზე;

პლაკატი სასწავლო პროცესის  ღირებულ რესურსს წარმოადგენს, რომლის  გამოყენება ეფექტურია, რადგან მისი საშუალებით მასწავლებელს შეუძლია თემა ადვილად აღსაქმელი გზით „შემოიტანოს“ გაკვეთილზე. მისი საშუალებით შესაძლებელია მთავარი გზავნილების, შთამბეჭდავად და ვიზუალურად  მიმზიდველი გზით გადმოცემა. მოსწავლეები, რომლებსაც ვიზუალური მეხსიერება აქვთ, პოზიტიურად რეაგირებენ პლაკატებზე.  პლაკატი კომპაქტურად გადმოსცემს  მათემატიკური ცნების, მასალის დედააზრს. ზრდის ჩართულობას საგაკვეთილო პროცესში, მითუმეტეს, თუ ის მოსწავლეების  მიერ არის შექმნილი.

Canva-ში პლაკატის შექმნა შესაძლებელია გაკვეთილის მიზნიდან გამომდინარე და არ მოითხოვს ფინანსურ ხარჯებს.

აქტივობა 2. მიზანი-წინარე ცოდნის გააქტიურება

ესგ-სწავლა-სწავლება ხელს უნდა უწყობდეს ცოდნის ეტაპობრივად კონსტრუირებას წინარე ცოდნაზე დაფუძნებით.

მეთოდი „გონებრივი იერიში“ თითოეული მოსწავლის ინდივიდუალურ აქტივობას მოითხოვს და საერთო საქმეში მონაწილეობის გზით, საერთო პრობლემების ერთობლივად გადაწყვეტას უწყობს ხელს. მეთოდის  გამოყენება გაკვეთილის ამ ფაზაზე ყველაზე მიზანშეწონილად მიმაჩნია. ვინაიდან, წინარე ცოდნა, რომლის გააქტიურებას კითხვების დასმით ვიწყებ,  განაპირობებს იმას, თუ მიწოდებული ინფორმაციიდან რა კომპონენტებს მიაქცევს ყურადღებას მოსწავლე და რის სწავლას შეძლებს იგი. სასწავლო მიზნებიდან გამომდინარე საგაკვეთილო პროცესში  ძალიან მნიშვნელოვანია სხვადასხვა სახის კითხვების დასმა,  რომლებსაც ყოველთვის დიდი სიფრთხილით ვარჩევ.

ღია კითხვების გამოყენებით, ფოკუსირება მოვახდინე n-ური ხარისხის ფესვისა და რაციონალურმაჩვენებლიანი ხარისხის თვისებებზე.

საკვანძო შეკითხვა- უარყოფითი რიცხვის წილადმაჩვენებლიანი ხარისხის შემოღებისას  რა წინააღმდეგობები შეიძლება შეგვხვდეს? დამაინტრიგებელი აღმოჩნდა მოსწავლეებისთვის.

აქტივობა 3  დიდაქტიკური თამაში „მითი თუ რეალობა“

მიზანი-ცოდნის რეალიზება.

ესგ-სწავლა-სწავლება ხელს უნდა უწყობდეს მოსწავლეთა შინაგანი ძალების გააქტიურებას.

ცოდნის მიღების,  განმტკიცებისა და სასწავლო უნარ-ჩვევების გასავითარებლად, ხშირად გამოიყენება სახალისო, შემეცნებითი სავარჯიშოები-დიდაქტიკური თამაშები.

n-ური ხარისხის ფესვის და წილადმაჩვენებლიანი ხარისხის  დამუშავების დროს, მუდმივად ვინიშნავდი მოსწავლეთა ტიპურ შეცდომებს.  გადავწყვიტე, გამომეყენებინა ისეთი სტრატეგია, როცა მოსწავლეები თავად აღმოაჩენდნენ ხარვეზებს საკუთარ ცოდნაში, გაანალიზებდნენ და შეაფასებდნენ მათ.

იმისათვის, რომ გამეხალისებინა პროცესი, გადავწყვიტე მეთოდების- საკლასო დისკუსიისა და დიდაქტიკური თამაშის გამოყენება, სათაურით „მითი თუ რეალობა?“

 თამაში:

აქტივობა ინტერაქტიულ რეჟიმში წარიმართა და  მოსწავლეები ძალიან გაახალისა.   თავად აღმოაჩინეს ხარვეზები საკუთარ ცოდნაში, რომლებიც  ერთმანეთს და მე გამიზიარეს.

განვიხილეთ ყველა პრობლემა, რომლებსაც ადგილი ჰქონდა საკითხის დამუშავების პროცესში.  ვისაუბრეთ იმ შედეგებზე, რომელიც შეიძლება გამოიწვიოს, თუ ისინი დროულად არ გამოსწორდება.

„მეტაკოგნიცია“ ანუ სწავლის პროცესის გაანალიზება ხდება მაშინ, როცა მოსწავლეები თავად ახდენენ საკუთარი სწავლის პროცესის ანალიზს. ამ გზით მოსწავლეებს უვითარდებათ კრიტიკული აზროვნება და იაზრებენ პრობლემური საკითხების გადასაჭრელად გამოყენებული გზებსა და სტრატეგიებს.

აქტივობა 4 როლური თამაში „აზროვნების სამი სკამი“.

მიზანი: საკითხის გააზრების, დისკუსიის, პრეზენტაციის, შემოქმედებითი აზროვნებისა და როლური ქცევების უნარ-ჩვევების განვითარება.

ესგ-სწავლა-სწავლება უნდა უზრუნველყოფდეს სწავლის სტრატეგიების დაუფლებას.

სიმულაცია და როლური თამაშები, მნიშვნელოვნად უწობს ხელს სწავლა-სწავლების პროცესის გაუმჯობესებასა და  21-ე საუკუნის კომპეტენციების განვითარებას, რაც  ესგ-ს  მთავარი მოთხოვნაა.

გადავწყვიტე როლური თამაშის „აზროვნების სამი სკამის“ გამოყენება. მოსწავლეები დავყავი სამ ჯგუფად: მეცნიერების, ანალიტიკოსებისა და ექპერტების ჯგუფებს ერთნაირი დავალება მივეცი. ჯგუფებმა ფუნქციების განაწილების შემდეგ, როლები მოირგეს, რომელთა შერჩევა შემთხვევითობის პრინციპით მოხდა. ყველა ჯგუფმა  ერთდროულად დაიწყო  მუშაობა დავალებაზე

დროის განსაზღვრული პერიოდის შემდეგ:

მეცნიერების ჯგუფის  წარმომადგენელმა ამოცანის ამოხსნის პროცესზე დაიწყო საუბარი. აღწერა, თუ რის გადაწყვეტას, რაზე პასუხის გაცემას, რის აღმოჩენას ითხოვდა დავალება. მათი როლი, პრობლემის განსაზღვრა, საჭირო ინფორმაციის მობილიზება, გადაჭრის გზების ძიება იყო.

ანალიტიკოსების ჯგუფის  წარმომადგენელმა, გაანალიზა  მეცნიერების ვერსია. ვინაიდან, ჯგუფის ფუნქცია იყო, ალტერნატიული გზების ძიება, გადაჭრის ოპტიმალური გზის შერჩევა.

ექსპერტების ჯგუფის  წარმომადგენელმა, შეაფასა ორივე ჯგუფის მუშაობის პროცესი, პრობლემის გადაჭრის დემონსტრირების შემდეგ, გააკეთა შესაბამისი დასკვნა და  ვრცლად ისაუბრა : n-ური ხარისხის ფესვის, რაციონლაურმაჩვენებლიანი ხარისხის, მოდულის თვისებების შესახებ.

მეთოდის გამოყენებით  პრობლემის ამოცნობა, აღწერა და გაანალიზება, გადაჭრის გზების ძიება, მათგან ყველაზე ეფექტურის შერჩევა, მოსწავლეებითვის  ძალიან საინტერესო აღმოჩნდა.  სამივე ჯგუფი თავისი როლიდან განიხილავდა პრობლემას, რამაც რთული დავალების გააზრებას მნიშვნელოვნად  შეუწყო ხელი.

პრობლემაზე დაფუძნებული სწავლების აქტივობები, ზრდის მოსწავლის მოტივაციას, პასუხისმგებლობას, ავითარებს კრიტიკულ, შემოქმედებით აზროვნებას და ორიენტირებულია მოსწავლეებში ფუნქციური ცოდნის შეძენაზე..

როლური თამაში ძალიან  სახალისო და შემოქმედებითი მეთოდი აღმოჩნდა მიზნის მისაღწევად. მოსწავლეები ყველაზე თამამები და კრეატიულები სწორედ  მისი გამოყენების დროს იყვნენ.

ჩემი მოსწავლე მეცნიერი, ანალიტიკოსი ან ექსპერტია, მეთოდი მეც მაძლევს საშუალებას მისი  ძლიერი მხარეები დავინახო და ვიზრუნო მათ   განვითარებაზე.

აქტივობა 5  აღმოაჩინე n-ური ხარისხის ფესვი „ განსხვავებულ სიტუაციაში “

მიზანი-ცოდნის ტრანსფერის უნარის განვითარება,  საგანთაშორისი კავშირების დამყარება.

ესგ-სწავლა-სწავლება ხელს უნდა უწყობდეს ცოდნათა ურთიერთდაკავშირებას და ორგანიზებას.

მეხსიერებაში ცოდნათა ურთიერთდაკავშირება და ორგანიზება ზრდის  გააზრების, დამახსოვრებისა და ფუნქციური გამოყენების შესაძლებლობებს.

ეს აქტივობა მიღებული ცოდნის ცხოვრებისეულ სიტუაციებში  და სხვა მეცნიერებებში  გამოყენებასთან არის დაკავშირებული. ინტერაქტიული სწავლება გულისხმობს, მოსწავლემ კარგად გაიაზროს, რომ ნებისმიერი თეორიული ცოდნა, აუცილებელია კომპლექსური ცხოვრებისეული პრობლემების გადასაჭრელად.

ესგ-სწავლა-სწავლება უნდა მოიცავდეს ცოდნის სამივე კატეგორიას: დეკლარატიულს, პროცედურულსა და პირობისეულს.

მოსწავლეებს მივმართე, გაეხსენებინათ ყოფა-ცხოვრებიდან ისეთი შემთხვევები, სადაც აუცილებელი იყო  n-ური ხარისხის ფესვის გამოყენება. ბევრი საინტერესო მაგალითის  შემდეგ, ჩემი ვარიანტებიც შევთავაზე.

ბიოლოგია-ჩაის, ყავისა და შოკოლადის შემადგენლობაში არის კოფეინი. 100· გამოსახულებით შეიძლება გამოვთვალოთ ადამიანის ორგანიზმში გამოყენებიდან n საათის შემდეგ დარჩენილი კოფეინის ოდენობა (%-ობით). ჩაისა და ყავის მიღებიდან  რამდენი საათის შემდეგ იქნება ორგანიზმში დარჩენილი კოფეინის 50%?

მოსწავლემ ჯერ დეკლარაციული ცოდნა შეიძინა n-ური ხარისხის ფესვისა და რაციონალურმაჩვენებლინი ხარისხის შესახებ, მისი გამოყენებით  გადაჭრა პრობლემა, დინამიკური ცოდნა რთული ამოცანის გზის ძიებასა და მიგნებაში დაეხმარა, ის უკვე მზად არის წარმატებით გადაიტანოს ეს ცოდნა ბიოლოგიაში, ფიზიკაში, ქიმიაში ან  გამოიყენოს ის ყოფა-ცხოვრებაში(ფუნქციური ცოდნა).

მოსწავლე მაშინაა წარმატებული და მოქნილი აზროვნების მქონე, თუ მას შეუძლია ერთგვარ სიტუაციაში ნასწავლის სხვადასხვაგვარ „განსხვავებულ სიტუაციაში გამოყენება“(დ,უზნაძე)

აქტივობა 6. განმავითარებელი  შეფასება

მოსწავლის შეფასება არის სწავლა-სწავლების განუყოფელი ნაწილი, მან უნდა აჩვენოს, როგორ მიმდინარეობს მოსწავლის ცოდნის კონსტრუირების პროცესი და მეხსიერებაში ცოდნათა ურთიერთდაკავშირება. გამოავლინოს, რამდენად ახერხებს მოსწავლე საკუთარი ძლიერი და სუსტი მხარეების დამოუკიდებლად შეფასებას.

ინტერაქტიულ სწავლებაში,  განსხვავებულია შეფასების  ფუნქციაც. აქცენტი  კეთდება  მოსწავლის წარმატებებზე და არა  მარცხზე, აუცილებელია შექება, კლასისთვის სამაგალითოდ გადაქცევა, ლიდერის ფუნქციის მინიჭება და სხვა. ამიტომ, კონსტრუქციულ სასწავლო გარემოში მოსწავლეებს არ აფერხებთ წარუმატებლობების შიში და მასწავლებლის რჩევისა და მხარდაჭერის იმედი აქვთ.

გაკვეთილის ყველა ფაზაზე, უწყვეტად ვიყენებდი განმავითარებელ შეფასებას, რომელიც   უნდა განვიხილოთ როგორც პროცესი, რომელიც გულისხმობს სხვადასხვა აქტივობით (ე.წ. განმავითარებელი შეფასების ინსტრუმენტებით) ინფორმაციის შეგროვებას მოსწავლის მიერ საკითხების გაგებისა და გააზრების შესახებ.

მთელი გაკვეთილი ავაგე მოსწავლეების კითხვებიდან და საჭიროებებიდან გამომდინარე. დაკვირვების შედეგებს ვინიშნავდი, რომ მომდევნო გაკვეთილებზე აქტივობები შესაბამისად განნეხორციელებინა.

ყოველი სამიზნე ცნების გააზრების შესამოწმებლად, სოლო ტაქსონომიის დონეების  შესაბამისად, ჩამოვაყალიბე შეფასების კრიტერიუმები,  რომლებიც  გამოვიყენე მიღწეული შედეგების გასაუმჯობესებელი მომდევნო აქტივობების დასაგეგმად.

 პრესტრუქტურული დონე. მოსწავლე ვერ იყენებს რიცხვების თვისებებს გამოთვლებში. არ შეუძლია მოქმედებების შესრულება რიცხვებზე და სიდიდეების გამოსახვა. მას არ აქვს წარმოდგენა    n-ური ხარისხის ფესვისა და რაციონალურმაჩვენებლიან ხარისხის შესახებ. ყოფითი მოვლენის განხილვისას  ვერ გამოსახავს რიცხვებს ექვივალენტური ფორმით;

უნისტრუქტურული დონე. მოსწავლემ იცის  რიცხვების თვისებები. მაგრამ . არ შეუძლია მოქმედებების შესრულება რიცხვებზე და სიდიდეების გამოსახვა. მას არ აქვს მკაფიო წარმოდგენა.  n-ური ხარისხის ფესვისა და რაციონალურმაჩვენებლიანი ხარისხის შესახებ. ყოფითი მოვლენის განხილვისას  უჭირს  რიცხვების გამოსახვა ექვივალენტური ფორმით;

 მულტისტრუქტურული დონე. მოსწავლე იყენებს რიცხვების თვისებებს გამოთვლებში. შეუძლია მოქმედებების შესრულება რიცხვებზე და სიდიდეების გამოსახვა. მაგრამ, უჭირს   n-ური ხარისხის ფესვისა და რაციომალურმაჩვებენლიანი ხარისხის თვისებების გამოყენება, რიცხვების გამოსახვა ექვივალენტური ფორმით;

 მიმართებითი დონე. მოსწავლე კარგად იცნობს რიცხვების  თვისებებს, შეუძლია მოქმედებების შესრულება რიცხვებზე, სიდიდეების გამოსახვა, რიცხვების ჩაწერა ექვივალენტური ფორმით. იყენებს n-ური ხარისხის ფესვის და რაციონალურმაჩვენებლაინი ხარისხის თვისებებს. შეუძლია რიცხვების გამოსახვა ექვივალენტური ფორმით;

 გაფართოებული აბსტრაქტული დონე. შეუძლია სიდიდეების გამოსახვა, რიცხვების ჩაწერა ექვივალენტური სახით. რეალურ ცხოვრებაში სხვადასხვა საკვლევი, სამეცნიერო საკითხისა და ყოფითი მოვლენის განხილვისაას სიდიდეების წარმოდგენა შესაბამისი რიცხვითი მახასიათებლებით. იყენებს n-ური ხარისხის ფესვისა და რაციონალურმაჩვენებლაინი ხარისხის თვისებებს. შეუძლია ლოგიკური მსჯელობა, ფორმულის დასაბუთება.

სწავლა-სწავლების პროცესი მუდმივად ითვალისწინებს იმ ცვლილებებს, რომლებსაც დრო და სივრცე კარნახობს საზოგადოებას, ეს მოთხოვნები აისახება საგაკვეთილო პროცესზეც. თანამედროვე საგანმანათლებლო სისტემაში მნიშვნელოვანი გახდა მოსწავლის კრიტიკული და  შემოქმედებითი აზროვნების, კომუნიკაციის, თანამშრომლობის, კვლევის, სოციალური, დამოუკიდებლად ორიენტირებისა და სხვა მნიშვნელოვანი უნარების განვითარება, რომელსაც ინტერაქტიულ-კონსტრუქტივისტული სწავლება წარმატებით უწობს ხელს.

გამოყენებული ლიტერატურა:

1. ეროვნული სასწავლო გეგმის გზამკვლევი(საშუალო საფეხური), 2022 წ

https://mes.gov.ge/uploads/files/2022/gzamkvlevi.pdf

2. მანანა ბოჭორიშვილი, ნათია ნამიჭეიშვილი, ნანა ნაბულიშვილი „ინტერაქტიური მეთოდები“, ,გამომცემლობა უსტარი, ასოციაცია“ზეკარი“,ქ.თბილისი,2014წელი

https://digitallibrary.tsu.ge/book/2020/apr/books/interatiuri-metodebi.pdf

3. თამარ მურუსიძე, „ვიზუალური ინსტრუმენტები მათემატიკის გაკვეთილზე“

https://mastsavlebeli.ge/?p=37541

4. მანანა ბოჭორიშვილი. „ტრანსფერული ცოდნის შეძენის პროცედურები და შესაბამისი მეთოდური ინსტრუმენტები“

https://mastsavlebeli.ge/uploads/resursebi/manana%20boWoriSvili.pdf

საკვები ქვეყნის კულტურის ნაწილია. ყველა ქვეყანას აქვს საკუთარი სავიზიტო ბარათი, ჩვენი ხაჭაპურია, იტალიური – პასტა და პიცა, ფრანგული კრეპი და კრუასანი, ბერძნული მუსაკა და გირო პიტა, ესპანური – პაეია, თურქული – მანთი და ჩორბა, ინდური – ნაანის პური და სხვა. გემოები მრავალფეროვანია, მაგრამ მათი „ქიმია“ ერთნაირი. სტატიაში საუბარია მჟავებისა და ფუძეების როლზე მზადების პროცესში. მარტივად არის ახსნილი მჟავას როლი ტკბილი გემოს შეგრძნებაში, ტუტეს მნიშვნელობა სიმინდის დამუშავებაში და სხვა. ბოლოს კი სახალისო ექსპერიმენტია წარმოდგენილი. მკითხველს შეუძლია, მოამზადოს ლიმონათი „ქამელეონი კვერცხებით“.

მჟავები საკვებს მჟავე გემოს აძლევს. ტუტეები მჟავას ანეიტრალებს. მჟავა მოლეკულაა, რომელსაც შეუძლია ადვილად გასცეს წყალბადის კატიონი, ტუტე კი ამ კატიონის აქცეპტორია. გამომდინარე იქიდან, რომ წყალბადის კატიონი პროტონია, მჟავას განიხილავენ როგორც პროტონის დონორს. წყალში პროტონები თავისუფალი სახით არ არსებობენ, რადგან ისინი უერთდებიან წყლის მოლეკულებს და მიიღება ჰიდროქსონიუმის იონი. სუსტი მჟავები შედის შემდეგი პროდუქტების შედგენილობაში: ძმარი (ძმარმჟავა), ლიმონის წვენი (ლიმონმჟავა), გაზიანი წყალი (ნახშირმჟავა). ტუტეები ხსნარში იძლევიან ჰიდროქსილის იონებს, მჟავასთან ურთიერთქმედებისას ის იერთებს პროტონს, და მიიღება წყალი. ნატრიუმის ტუტე ძლიერია, ის გამოიყენება საპნის დასამზადებლად. ამონიუმის ჰიდროქსიდი სუსტი ფუძეა, მას ზეთის გასაწმენდად და მინის გასაპრიალებლად იყენებენ.

შაქარზე მჟავასა და ტემპერატურის გავლენა

საქაროზა (შაქარი, რომელსაც ყოველდღიურად ვიყენებთ) დისაქარიდია, რომელიც გლუკოზისა და ფრუქტოზის ნაშთებს შეიცავს. გლუკოზისა და ფრუქტოზის ურთიერთქმედებით მიიღება საქაროზა და წყალი. რეაქცია მიეკუთვნება კონდენსაციის რეაქციებს. ფრუქტოზა პროტონის დონორია. ამიტომ ისე მოქმედებს, როგორც მჟავა. გლუკოზა კი ჰიდროქსილის იონების დონორია, ამიტომ მოქმედებს, როგორც ფუძე. საქაროზას მიღების რეაქცია შექცევადია. წყლის დამატებისას ხდება ჰიდროლიზი და ისევ მონოსაქარიდები წარმოიქმნება. პროცესი ძალიან ნელა მიმდინარეობს. მჟავას დამატებისას ან გათბობისას რეაქცია ჩქარდება. რადგან ფრუქტოზა გაცილებით ტკბილია, ვიდრე საქაროზა, მიიღება ბევრად უფრო ტკბილი ხსნარი, მიუხედავად იმისა, რომ გლუკოზა ისეთივე ტკბილი არ არის, როგორც საქაროზა. როცა მჟავას არ იყენებენ, ხსნარი ოდნავ მჟავეა, მისი განეიტრალება შეიძლება სუსტი ფუძით, ამისთვის კულინარიაში გამოიყენება სასმელი სოდა ან კვერცხის ცილა.

მჟავას გავლენა ცილებზე

იოგურტის მომზადებისას რძის ცილა კაზეინის ჰიდროფილური ბოლოები რჩება მიცელების გარეთა მხარეს, წყალში უხსნადი კალციუმის ფოსფატი კი მიცელის შიგნით ეკვრის ერთმანეთს. მჟავა არეში კალციუმის ფოსფატი იხსნება მჟავაში, მიცელები იშლებიან, ცილა დენატურირდება და ქმნის გელს. როცა ყველს ამზადებენ ფერმენტ რენეტით, ის მაკრატელივით ჭრის წყალს მიცელებიდან, ბოლოს მიცელები ეწებება ერთმანეთს. ინდური პანერი და იტალიური რიკოტა სხვა ტექნოლოგიით მზადდება. პროცესში მჟავასა და ტემპერატურის ზემოქმედებაა გადამწყვეტი. ამ დროს რძეში ხდება ცილების დენატურაცია და კოაგულაცია. მჟავა იწვევს რძის შრატის ცილების დენატურაციასა და კოაგულაციას. ასეთი ყველი შეწვისას ან გამოცხობისას არ დნება. მისი გამოსავლიანობაც დიდია. შრატის ცილები მეტ წყალს იკავებენ, ვიდრე კაზეინი. ამიტომ ხაჭო ისეთი მყარი არაა, როგორც ინდური ყველი რენიტი. მსგავსი ტექნოლოგიით ყველს საქართველოშიც ამზადებდნენ. ღორის ან ძროხის კუჭის მაჭიკს კარგად რეცხავდნენ, ჭრიდნენ წვრილ ნაჭრებად და ათავსებდნენ განზავებულ ძმარში. თავდახურული ქილით ინახავდნენ ბნელ ადგილას. მიღებულ სითხეს კვეთს ეძახოდნენ. რძეში ასხამდნენ გარკვეული რაოდენობის სითხეს და დააყოვნებდნენ. დაახლოებით ნახევარ საათში შრატი შეხაჭოებული რძის თავზე გროვდებოდა. გადაწურავდნენ და თეთრ მასასაც საწურზე ათავსებდნენ. ბოლოს მიიღებოდა ყველი.

ცხობა და შეწვა მჟავების მონაწილეობით

მჟავები ცილების დენატურაციის მიზნით გამოიყენება. თევზს ამზადებენ ლაიმის წვენში, ასეა მითითებული სევიჩების რეცეპტებში. ძმარში დაყოვნებული კვერცხი კარგად იხარშება და მიიღება ე.წ. „hard boilid” კვერცხი. ძმარი გამოიყენება ზღვის პროდუქტების მომზადებისას, რადგან თევზს არ აქვს იმდენი კოლაგენი შემაერთებელ ქსოვილში, რამდენიც საქონლის ხორცს. მჟავა ისევე კარგად არ არბილებს შემაერთებელ ქსოვილს, როგორც მაღალი ტემპერატურა (ჟელატინის გამოიყოფა ამ დროს), მაგრამ ის ახდენს ცილების დენატურაციას თევზებისა და კიბოების ორგანიზმში. საბოლოოდ მიიღება ისეთი სტრუქტურა, რომ გემოს უკვე აღიქვამენ გემოვნების რეცეპტორები. მჟავა არ ახდენს სტერილიზაციას, ამიტომ პროდუქტის სიახლესა და სისუფთავეს ძალიან დიდი მნიშვნელობა აქვს.

მჟავები გამოიყენება მარინადებში. ძმარი, პომიდვრისა და ლიმონის წვენი, იოგურტი ხშირად გამოიყენება ცილების დენატურაციისთვის. ისინი შთანთქავენ სურნელოვან ნივთიერებებს. მარინადისთვის ხორცის დაჭრა აუცილებელია, სითხის შეწოვისთვის მნიშვნელოვანია შემხები ზედაპირის გაზრდა.

ტუტეების როლი საკვების მომზადებაში

როგორც მჟავები, ფუძეებიც გამოიყენება სამზარეულოში. როცა საკვები ცხიმს შეიცავს, მასზე ტუტის ზემოქმედებით მიიღება საპონი, ამიტომ ადამიანები ასეთი საკვების მიღებას ერიდებიან ხოლმე, აპროტესტებენ. რადგან საპონი ადვილად „გამოირეცხება“ წყალში ხსნადი მინერალებითა და ვიტამინებით, შედეგი სასიამოვნო გემოა. ტუტეები გამოიყენება ნიქსტამილიზაციის პროცესში. ეს ტერმინი სიმინდის დამუშავების ეტაპს აღნიშნავს. აცტეკური წარმოშობის სიტყვაა და ორი ნაწილისგან შედგება: nixt – ფერფლის მსგავსი, tamalli – სიმინდის მოუხარშავი ცომი. დღეს სიმინდს ამუშავებენ კალციუმის ჰიდროქსიდით. ადუღებისას სიმინდის მარცვლები რბილდება. სახამებელი შთანთქავს წყალს და იბერება, ბოლოს მიიღება გელი. მარცვლიდან გამოთავისუფლდება ფერმენტები, რომლებიც მოქმედებენ ცილებსა და ცხიმებზე. შედეგად მიიღება დასამუშავებლად ვარგისი მარცვლეული. მცენარის უჯრედის კედელი შედგება ცელულოზისა და პექტინისგან, რომლებიც იხსნებიან ცხელი ტუტის ხსნარში, ამავე დროს ცხელი ტუტე ცილების დენატურაციას ახდენს, ასეთი მარცვლის მონელება უკვე შეუძლია ადამიანის საჭმლის მომნელებელ სისტემას.

მნიშვნელოვანი პროდუქტია სასმელი სოდა, რომელიც ძლიერი ტუტისა და სუსტი მჟავას მარილია, სოდა გამოიყენება ობის მოსაშორებლად, კბილის პასტებში, 70⁰ C-ზე სასმელი სოდა იშლება და მიიღება სარეცხი სოდა, ასევე გამოიყოფა წყლის ორთქლი და ნახშირორჟანგი. ამიტომ ნატრიუმის ბიკარბონატი გამოიყენება შუშხუნა კანფეტების დასამზადებლად. ცხელ სიროფში უმატებენ სასმელ სოდას.

pH-ისადმი მგრძნობიარე ფერები

ბევრი ფერადი ნივთიერება ურთიერთქმედებს მჟავებთან და ტუტეებთან, რის შედეგადაც იცვლება შეფერილობა. ანტოციანები ინდიკატორების დიდი ჯგუფია. ეს მოლეკულები ირეკლავენ წითელ ფერს მჟავების და ლურჯ ფერს ტუტეების ხსნარებიდან. ბევრი ფერადი ხილი, ყვავილი, ფოთოლი ადამიანს იზიდავს ანტოციანების წყალობით. ანტოციანები განაპირობებენ ვაშლის კანის წითელ ფერს, ყურძნის, იაჟუჟუნას წითელსა და ლურჯ ფერებს. შაქრის შემცველობის მიუხედავად, ბევრ ხილს მჟავე გემო აქვს, ლიმონათი მჟავე ხილის წვენზე შაქრის დამატებით მიიღება. ლიმონი უფრო ნაკლებ მჟავას შეიცავს ვიდრე ფორთოხალი, მაგრამ რადგან ფორთოხალში შაქარი მეტია, ვიდრე ლიმონში, მისი სიმჟავე ძალიან მცირდება. ენა და ტვინი განსხვავებულ ინფორმაციას იძლევიან მჟავების შესახებ. ჩვენი გემოვნების რეცეპტორები ამ სიტუაციასთან ადაპტირებული არიან.

ლიმონათი „ქამელეონი კვერცხებით“

ნატრიუმის ალგინატი – ის გამოყოფილია ლამინარიასებრი წყალმცენარის, კელპისგან. მასზე წყლის დამატებით მიიღება სქელი სიროფი. სიროფზე კალციუმის იონების დამატებით კატიონები მიმოიცვლება და მიიღება ჟელე. თუ ამ მასას პიპეტით ჩაასხამ ლიმონათში, მიიღება პატარა, ქვირითის მსგავსი ჟელეს ბურთები.

საჭიროა:

1 სუფრის კოვზი (9 გრამი) ნატრიუმის ალგინატი;

1 სუფრის კოვზი შაქრის ფხვნილი;

1-2 ჩაის კოვზი სასმელი სოდა;

1 ბოთლი ყურძნის კონცენტრატი, რომელსაც არ აქვს დამატებული მჟავა (ან ყურძნის წვენი);

1 ჩაის კოვზი კალციუმის ქლორიდი;

3 აბი ანტაციდი – მაგნიუმის ქლორიდი კალციუმთან ერთად ან მის გარეშე.

თუ ყურძნის წვენი გაყინულია, დაელოდე მის გადნობას. გაანეიტრალე ყურძნის კონცენტრატი სასმელი სოდით – ყურძნის წვენში ჩაყარე სასმელი სოდა და კარგად მოურიე. დააყოვნე ორი საათი და მასას შეურიე შაქრისა და ნატრიუმის ალგინატის ნარევი. ერთ ჯერზე ჩაყარე ნარევი კოვზის წვერით, ძალიან მცირე ულუფებად. ყველა ჩაყრის შემდეგ მოურიე კარგად, სრულ გახსნამდე. დააყოვნე ორი საათი. წყლიან ჭიქაში გახსენი ანტაციდისა და კალციუმის ქლორიდის აბები, კარგად მოურიე. პიპეტით პირველი ხსნარი ჩააწვეთე მეორე ხსნარში. მიღებული ჟელეს ბურთები დატოვე ხსნარში, ვიდრე არ გალურჯდება. ერთ ჭიქაში ჩაასხი სუფთა წყალი, მეორეში ლიმონის წვენი და წყალი, მესამეში – ლიმონათი. გადაიტანე ქამელეონი კვერცხები სამივე მათგანში თანაბარი რაოდენობით. ბურთები ჭიქებში დატოვე გაწითლებამდე. სახალისო ექსპერიმენტის შესაბამისი უამრავი რეაქციის დაწერა შეიძლება.

კიდევ მრავალი ქიმიური ნაერთი გამოიყენება სამზარეულოში, მათზე მოგვიანებით გიამბობთ.

გამოყენებული ლიტერატურა:

Simon Quellen Field – Culinari reaction – The everyday chemistry of cooking – 2012

ხშირად ვწერ იმ საკითხზე, თუ რამდენად მნიშვნელოვანია ადამიანმა, საკუთარი ენის სიღრმეების შესასწავლად და გასაცნობად, მშობლიურ ენასთან მტკიცე კავშირის დასამყარებლად, ამ ენის ფრაზეოლოგიზმები ბავშვობიდანვე ისწავლოს, ივარჯიშოს, მიეჩვიოს. გამოიყენოს. ენის სიმდიდრე და სიღრმე ხომ სწორედ ასეთ გამონათქვამებშია ჩაბუდებული.

ენასთან გაშინაურება, ენასთან დამეგობრება ოჯახის შემდეგ სკოლაში, ქართულის გაკვეთილზე ხდება. სწორედ ქართულის მასწავლებელია ის წინამძღოლი, რომელიც ამ საოცარ სამყაროში მიგვიძღვის.

გთავაზობთ სამუშაო აქტივობებს კიდევ ერთ ფრაზეოლოგიზმზე, რომელთა განხორციელებაც, დარწმუნებული ვარ ჩვენს ბავშვებს კიდევ უფრო დააახლოებს დიდებულ ქართულ ენასთან.

ბავშვებს ვაცნობთ ფრაზეოლოგიზმს: „აკვანი დარწეულა“. ისინი საკუთარ ვერსების გამოთქვამენ, მსჯელობენ, რას ნიშნავს, როგორ ესმით. მასწავლებელი ინიშნავს დაფაზე. ამის შემდეგ კი სთავაზობს მოკლე ამბავს ამ გამონათქვამის შესახებ:

გამონათქვამი „აკვნის დარწევა“ – დაბადებას, აღმოცენებას აღნიშნავს. როგორც კულტურის რომელიმე სახეობის, ცივილიზაციის, ხელოვნების დარგების, ასევე კონკრეტული ადამიანისაც. მაგალითად: აკაკი წერეთლის აკვანი სოფელ სხვიტორში დარწეულა; ოპერის აკვანი პირველად იტალიაში დარწეულა. ესე იგი აკაკი სხვიტორში დაბადებულა, ოპერა კი – იტალიაში (ვკითხულობთ ქართული იდიომების ლექსიკონში).

აკვანი ჩვილი ბავშვის ძველებური ქართული საწოლია. მეგრულად გამოითქმის როგორც – „აკავან“, სვანურად – „ჰენწ“, რაჭულ-ლეჩხუმურად – „ავაკან“.

აკვანს უმნიშვნელოვანესი როლი ეკისრა, მასში იზრდებოდნენ ოჯახის გვარის გამგრძელებლები, ოჯახის იმედები. მას ხისგან ამზადებდნენ, რთავდნენ მზეებით, ბორჯღალებით, ჩვილის დამცავი ჯვრებით.

ქართველებს ძველად მზე ღვთაებად მიაჩნდათ, სწამდათ, რომ თუკი ჩვილის საწოლზე ღვთაების ნიშანს გამოსახავდნენ, ის დაცული იქნებოდა.

ტრადიციებიც ჰქონიათ: როდესაც ბავშვს პირველად აწვენდნენ აკვანში, ოჯახის უფროსი ქალი გულიან, ტკბილ პურებს – ქადების ცხობას იწყებდა. ახლად გამომცხვარ, სურნელოვან ტკბილ პურებს, აკვანში ბავშვის თავთან, შუაში და ფეხებთან აწყობდა, და თან ლოცავდა ჩვილს. ხოლო, როდესაც აკვანი სახლის გარეთ პირველად გაჰქონდათ, ბავშვის მშობლები, ნათესავები – ქადებსა და ნამცხვრებს გამვლელებს, შემხვედრებს ურიგებდნენ, ჩიტებს უყრიდნენ. ფიქრობდნენ, რომ თუკი ფრინველები შეჭამდნენ მათ მიერ დაცხობილ ტკბილეულს, ბავშვი ფეხს მალევე აიდგამდა, ჩიტივით იფრენდა.

საინტერესო თქმულებამაც მოაღწია ჩვენამდე, თურმე ერთი ქალი ყანაში ყოფილა სამუშაოდ, თან აკვანიც ჰქონია წაღებული, წამოსვლისას კი აკვანი ყანაში დარჩენია. უკან მიბრუნებულს დაუნახავს: აკვანი საოცარ სინათლეში ყოფილა გახვეული, ზემოდან სამი მტრედი დაფარფატებდა და ღუღუნით ტკბილ ნანას უმღეროდნენ შიგ მწოლ ჩვილს.

ლეგენდა ბაზალეთის ტბის შესახებ უფრო გავრცელებულია, ლეგენდის მიხედვით, ბაზალეთის ტბის ფსკერზე დაკარგული სამოთხეა, შუა გულში ოქროს აკვანი დგას, აკვანში კი მძინარე ყრმა წევს. როდესაც ის გაიღვიძებს, ქვეყნიერებას იხსნის ბოროტებისგან და დედამიწაზე მარადიულ გაზაფხულს მოიტანს.

რადგან აკვანი ჩვენთვის ასეთი მნიშვნელოვანი, წმინდა ნივთია, იქნებ ამიტომაც დავუკავშირეთ ის დაბადებას და ახლის აღმოცენების სიმბოლოდ ვაქციეთ.

ლექსიკონი

აღმოცენება – ამოსვლა, აქ როგორც დაბადება, ჩასახვა.

ბორჯღალო – ძველი ქართული ორნამენტი, გამოსახავს მზეს.

ყანა – მიწა სადაც ხორბალი, სიმინდი ან სხვა მარცვლეული არის დათესილი.

აქტივობა 1:

დაწერე შენი ბიოგრაფია, დაბადების ნაცვლად გამოიყენე ფრაზა: „ჩემი აკვანი დარწეულა…“, დახატე ავტოპორტრეტიც.

აქტივობა 2:

დახატე აკვანი შენი წარმოსახვით, გააფორმე მზეებითა და ბორჯღალებით.

აქტივობა 3:

ტექსტში რამდენიმე თქმულებაა მოკლედ გადმოცემული, აირჩიე ერთ-ერთი მათგანი, განავრცე სიუჟეტი, აქციე ამბად, შექმენი პერსონაჟები, დაასათაურე და დაუხატე ილუსტრაცია.

აქტივობა 4:

იპოვე ტექსტში…

1. ტექსტის რომელ ნაწილშია გადმოცემული ქართველების ტრადიციების შესახებ, რომელიც აკვნის გარეთ გატანას უკავშირდებოდა? დასაწყისში, შუა ნაწილში, ბოლოს.

2. ტექსტის რომელ ნაწილშია აღწერილი აკვანი? დასაწყისში, შუა ნაწილში, ბოლოს.

3. ტექსტის რომელ ნაწილშია ნახსენები ქართველი მწერალი აკაკი წერეთელი?

დასაწყისში, შუა ნაწილში, ბოლოს.

4. ტექსტის რომელ ნაწილშია ჩამოთვლილი აკვნის სხვა ქართული სახელები? დასაწყისში, შუა ნაწილში, ბოლოს.

5. ტექსტის რომელ ნაწილშია საუბარი ბაზალეთის ლეგენდის შესახებ? დასაწყისში, შუა ნაწილში, ბოლოს.

აქტივობა 5:

დაუკვირდი ასო-ბგერებს, რომლებისგანაც გამონათქვამი „აკვანი დარწეულა“ არის შედგენილი. ამ ასო-ბგერებისგან შეგიძლია სხვადასხვა სიტყვის შექმნა, თუ რომელი სიტყვების, ამას მინიშნებები მიგახვედრებენ.

გაითვალისწინე: სიტყვების შესაქმნელად მხოლოდ ის ასო-ბგერები გამოიყენე, რომლებიც კონკრეტულ სიტყვებშია.

ა კ ვ ა ნ ი

ქალაქი დასავლეთ საქართველოში, სადაც აღმოჩენილია ანტიკური ნაქალაქარი – (ვანი)

გოგონას სახელი – (ანი);

ნიჩბიანი, პატარა, სამდინარო გემი – (ნავი);

ადამიანისა და ცხოველის სხეული ზედაპირული საფარველი – (კანი);

მოკაუჭებული ჯოხი რაიმეზე გამოსადებად, კაუჭი – (კავი).

დ ა რ წ ე უ ლ ა

რაიმე აზრის წერილობით გამოთქმის პროცესი – (წერა);

გვიანის ანტონიმი – (ადრე);

მარტოდ – სინონიმი – (ეულად);

მცირე ზომის სარწყავი არხი – (რუ);

რაიმეს ამკრძალავი, უარყოფითი ნაწილაკი – (არ).

XXI საუკუნეში მედიის ყველა (ტრადიციული თუ სოციალური) ტიპის საშუალება აქტიურად გამოიყენება შიშების დანერგვის ინსტრუმენტად. პანდემიის პერიოდში, კოვიდ 19-ის საწინააღმდეგო ვაქცინის შექმნის შემდეგ, მოსახლეობაში ინერგებოდა  ვაქცინისადმი შიშები. ჩვენი საზოგადოებისთვის უცხო არ არის, რელიგიის, ტრადიციებისა თუ იდენტობის დაკარგვის საფრთხეებით მანიპულაცია. ამ მითების დასამსხვრევად, სსიპ ნატოსა და ევროკავშირის შესახებ საინფორმაციო ცენტრი აქტიურად ავრცელებდა პუბლიკაციას „10 მითი ევროკავშირის შესახებ“.

შიშს უდიდესი ისტორია აქვს. მისი აღმოჩენის შემდეგ, მეფეები თუ დიდგვაროვნები, შიშის დათესვას აქტიურად იყენებდნენ მაშინდელი საზოგადოების სამართავად. ძველად და ახლაც, მასების მართვის ერთ-ერთ წარმატებულ ხერხად ომის შიშის გავრცელება წარმოადგენს.

სად არის შიში? შიში ჩვენს ტვინშია და აქედან მთელს სხეულზე ვრცელდება. უფრო კონკრეტულად შიში იწყება ტვინის იმ რეგიონში, რომელსაც ამიგდალა ეწოდება. ეს ლიმბური სისტემის ქერქქვეშა სტრუქტურაა, რომელიც მოთავსებულია თავის ტვინში საფეთქლის წილის სიღრმეში და აქვს ნუშისებრი ფორმა.  ეს სისტემა მონაწილეობს არაცნობიერი ემოციური სტიმულების გადამუშავებაში და განსაზღვრავს ადამიანის ემოციებს: აგრესიას, შფოთს და შიშს.[1]

მედიის კრიტიკული გააზრება არის გზა, რომელიც გამოგვიმუშავებს  ერთგვარ „იმუნიტეტს“ მედიის მიერ დაგებული ხაფანგებისგან თავის ასარიდებლად. ამ მიზნამდე მისასვლელი რამდენიმე გზა არსებობს. სტატიაში განვიხილავ ცნობილ მხატვრულ ფილმებს, რომლებიც დააფიქრებს მოსწავლეებს იმაზე თუ როგორ შეიძლება ტელეარხმა დათესოს ომის შიში, შექმნას საზოგადოებრივი აზრი, შეცვალოს განწყობები, დამოკიდებულებები, მოიპოვოს პოპულარობა, ბოროტად გამოიყენოს მაყურებელთა ნდობა და ა.შ.

ჩვენი ჟურნალის მკითხველისთვის, აქვე, განვმარტავ, რომ ამ სტატიის მიზანია ვიმსჯელოთ თუ რა მიზნები შეიძლება ჰქონდეთ მედია პროდუქტის შემქმნელებს, სხვადასხვა გზავნილების გამხმოვანებლებს, დავფიქრდეთ მით დღის წესრიგზე და ავყვეთ ემოციებს…

კუდის ქიცინი

სკანდალები და რეიტინგ დაქვეითებული  აშშ-ს პრეზიდენტი, მოახლოებული არჩევნები და მისი წაგების რეალური საფრთხე. რა გამოსავალია ამ შემთხვევაში? მედია კამპანია და ომის ინსპირაცია. ომს სჭირდება მოწინააღმდეგე. რეჟისორი კი, ამ დროს, საინტერესო გამოსავალს გვთავაზობს – ალბანეთი მოწინააღმდეგის სახით. კუდის ქიცინი პოლიტიკური მანიპულაციის ეკრანზე გადმოტანის კარგი მაგალითია. ფილმში ნაჩვენებია თუ როგორ ცდილობს პრეზიდენტობის კანდიდატის რეიტინგის გაზრდას სპეციალურად დაქირავებული ადამიანების ჯგუფები.

ნელ-ნელა პრესის ფურცლებზე თუ ტელევიზიაში პრეზიდენტის სკანდალი იხსნება მთავარი გვერდებიდან და მთავარი თემა ხდება ალბანეთთან მოსალოდნელი ომის საფრთხე. იქმნება, პატრიოტული ჟანრის სიმღერები, ამ ყველაფერს წარმატებულად უბამს მხარს მედია. ისინი მყისიერად ავრცელებენ კონსპირაციული ჯგუფის მიერ გადაღებულ ვიდეო მასალას თუ გადაუმოწმებელ ინფორმაციას.

CIA-ის (აშშ-ს ცენტრალური სადაზვერვო სააგენტო) წარმომადგენლები, აღმოაჩენენ რომ ალბანეთთან ამერიკის შეერთებული შტატების ომი გამოგონილია. ამიტომ, მოსახლეობას მის დასრულებას აუწყებენ. ამის გამო, კონსპირაციული ჯგუფების წევრებს უხდებათ დღის წესრიგის შეცვლა.  ტყვეობაში დარჩენილი ჯარისკაცი და მისი დაბრუნების ოპერაცია – ეს არის საკითხი რომლის ირგვლივაც კეთდება მთელი აქცენტი.

ფილმი ნათელი მაგალითია, როგორ შეიძლება გამოიყენოს მედია  ხელისუფლებამ საკუთარი თავის გადასარჩენად, ხოლო ამისთვის არ მოერიდოს კონფლიქტების გამოგონებას.

სადისკუსიო კითხვები:

• რამდენად რეალისტურია დღევანდელ ციფრულ ეპოქაში ასეთი მასშტაბის დეზინფორმაციის გავრცელება და შენარჩუნება, როდესაც ინფორმაციის გადამოწმება გაცილებით უფრო ადვილია ვიდრე 90-იან წლებში?
• რას გვეუბნება ფილმი საზოგადოების პასიურობისა და მედიის მიმართ ბრმა ნდობის შესახებ? არის თუ არა მაყურებელი საკმარისად კრიტიკული მედიის მიერ მიწოდებული ინფორმაციის მიმართ?
• როგორ შეიცვალა ფილმში ნაჩვენები მედია-მანიპულაციის მეთოდები თანამედროვე სოციალური მედიის ეპოქაში და რა ახალი გამოწვევები გაჩნდა დეზინფორმაციასთან ბრძოლის კუთხით?
• რა გავლენას ახდენს მედიის მიერ გავრცელებული ინფორმაციის ნაკადი მოსახლეობის განწყობებზე?
• რატომ არის მნიშვნელოვანი ხელისუფლების დამოუკიდებელი შტოს არსებობა და რატომ არ უნდა იყოს თავმოყრილი ძალაუფლება ერთი ადამიანის/ჯგუფის ხელში?

დასკვნის სახით შეიძლება ითქვას, რომ შიში საზოგადოების მართვის ერთ-ერთი უძველესი და ეფექტური ინსტრუმენტია, რომელიც დღესაც აქტიურად გამოიყენება მედიის საშუალებით. ფილმი „კუდის ქიცინი“ გვიჩვენებს, თუ როგორ შეიძლება მედია გახდეს მანიპულაციის იარაღი და პოლიტიკური მიზნების მიღწევის საშუალება. თანამედროვე ციფრულ ეპოქაში, როდესაც დეზინფორმაციის გავრცელება და შიშების დანერგვა კიდევ უფრო გამარტივდა სოციალური მედიის მეშვეობით, განსაკუთრებით მნიშვნელოვანია მედიაწიგნიერების განვითარება და კრიტიკული აზროვნების უნარების გამომუშავება. მხოლოდ ინფორმირებულ და კრიტიკულად მოაზროვნე საზოგადოებას შეუძლია დაიცვას თავი მანიპულაციებისგან და არ გახდეს შიშზე დაფუძნებული საზოგადოების წევრი.

[1] შიშის მეცნიერება: რატომ გვეშინია და რა ხდება ამ დროს ჩვენში

2023 წლის მიწურულს დიდი საქმე გაკეთდა. მასწავლებელთა პროფესიული განვითარების ეროვნული ცენტრის საინფორმაციო-საგანმანათლებლო რესურსების, ჟურნალ „მასწავლებლისა“ და ინტერნეტგაზეთ „mastsavlebeli.ge“-ს მიერ დაფუძნებული კონკურსის „ვწერ მასწავლებლისთვის“ ეგიდით შექმნილი ნაწარმოებები ერთ წიგნად შეიკრა და გამოიცა. ავტორთა შორის თანამედროვე ქართული ლიტერატურის თითქმის ყველა გამორჩეულ ფიგურას აღმოაჩენთ. პუბლიკაციის სარჩევში ალექსანდრე ლორთქიფანიძის, დიანა ანფიმიადის, ირმა ტაველიძის, ცოტნე ცხვედიანისა და ლუკა ბაქანიძის გვერდით ერთ ნაკლებად ცნობილ გვარს გადააწყდებით. ალბათ, ბევრს არაფერი გსმენიათ სოფო გოგალაძის შესახებ. ის პროფესიონალი მწერალი არ გახლავთ, მაგრამ მაინც წერს და თავისი კალმის წყალობით ერთ პატარა დასახლებაში მდებარე ჩვეულებრივი სკოლის არაჩვეულებრივ ისტორიებს სამუდამოდ ინახავს თითოეული ჩვენგანისათვის.

„დილა მშვიდობის, მეგობრებო, ანუ Guten Morgen Freunde” სურამის ერთ-ერთი სასწავლებლის გამოცდილებას აღწერს, რომელიც სკოლამ სუსხიან 90-იან წლებში გამოიარა. მასწავლებლებსა და მოსწავლეებს უჭირდათ, სციოდათ, შიოდათ, წესით და რიგით ყველაფრის ხალისი უნდა ჰქონოდათ დაკარგული, მაგრამ მაინც მყარად იდგენენ ფეხზე და ხალისით მიუყვებოდნენ სკოლისკენ მიმავალ გზას. ათობით ადამიანი იმედსა და მხნეობას ერთი ქალის – თამრიკო მასწავლებლის დამსახურებით ინარჩუნებდა. ავტორი თამრიკო მასწავლებელს ყველა იმ თვისებას მიაწერს, რომელიც დღემდე აუცილებელია ყველა დირექტორისა თუ პედაგოგისთვის: „იცოდა რამდენიმე ენა, იყო დიდი დიპლომატი და იცოდა ადამიანების (მასწავლებლების) შექება, მაშინ, როცა თავად ის პიროვნება ამას არ ელოდა, იყო დიდი მოტივატორი და ესმოდა ყველა ბავშვის, ცელქის, ჭკვიანის, „შატალოს“ მომწყობების, აი, იმ ბიჭების ტუალეტში ჩუმად სიგარეტს რომ ეწევიან, აი, იმ მშობლების პრეტენზიები რომ აქვთ, აი, იმ მასწავლებლების ზოგჯერ სულ უკმაყოფილებით რომ გამოირჩევიან, ცის ესმოდა, მიწის ესმოდა…“.

დასახელებული თვისებების გარდა, თამრიკო მასწავლებელს მშვენიერებისკენ სწრაფვაც გამოარჩევდა. მოთხრობაში ავტორი დაწვრილებით აღწერს მის სამუშაო ოთახს. 90-იანი წლების საყოველთაო სიბნელესა და უსუფთაობაში, ალბათ, განსაკუთრებით რთული იქნებოდა მწვანე ხავერდით გამშვენებული და ჭრელი ფარდებით გახალისებული კაბინეტის მოწყობა. ამგვარი სივრცეზე დაკვირვებით, ალბათ, მოსწავლეებს კვლავ უბრუნდებოდათ განცდა იმისა, რომ რაოდენ მძიმეც არ უნდა იყოს სიტუაცია, სილამაზის შექმნა მაინც შესაძლებელია. ძველი ნივთები, ძველი ნაჭრებიც შეიძლება გამოდგეს იმისთვის, რომ საყოველთაო სიმახინჯეს, ილაჯგამოცლილობისგან გამოწვეულ უწესრიგობასა და ქაოსს დააღწიო თავი.

სოფო გოგალაძე შესანიშნავად აღწერს ერთ უცნაურ გრძნობას, რომელიც ხშირად თავადაც დამუფლებია. არის შემთხვევები, როდესაც მგონია, რომ ადამიანის მიმართ სათანადოდ ვერ გამოვხატავ პატივისცემასა და მადლიერებას. ვფიქრობ, ხანდახან სიტყვა, ყურადღება არ არის საკმარისი შენი დამოკიდებულების მკაფიოდ გამოსაკვეთად. ასეთ დროს ადამიანი იბნევა ხოლმე და აღარ იცის, რა მოიმოქმედოს. იმავე დღეშია მოთხრობის ლირიკული გმირიც და არის შემთხვევები, როდესაც მადლიერების ნიშნად უცნაური წინადადებით მიმართავს თავის მასწავლებელს. მაგალითად, სთავაზობს, რომ ქარისგან აწეწილი თმის გასწორებაში დაეხმაროს მას.

ახალგაზრდა ქალის მიერ დაწერილ ტექსტს სევდის განსაკუთრებული განცდა გამოარჩევს. სევდიანი განწყობის შექმნას მრავალი გარემოება უწყობს ხელს: ავტორის მშობლიური სკოლა დაიწვა; ცეცხლმა კედლებთან ერთან მოგონებების დიდი ნაწილი გაანადგურა; გაქრა გარემო, სადაც ძველი, ყველაზე ძვირფასი და ძლევამოსილი მოგონებების წამის მეათასედით გაცოცხლება მაინც შეიძლებოდა; მეგობრები დიდ ქალაქში დაიფანტნენ, ხშირად ვეღარ ხვდებიან ერთმანეთს… პატარა მოთხრობის ბოლოს მკითხველს ერთბაშად შეიპყრობს სასოწარკვეთილების განცდა, ამ შემთხვევაშიც მხსნელად გვევლინება ავტორის მიერ ზეციდან გამოგზავნილ ანგელოზად მიჩნეული თამრიკო მასწავლებელი.

სკოლა დაიწვა, მოსწავლეებმა საშუალო ასაკს მიაღწიეს, ყველას აუტანელი რუტინისკენ ექაჩება ოჯახი და სამსახური, მაგრამ სურამში, ერთი ჯადოსნური აღმართის ბოლოს კვლავ მყარად დგას თამრიკო მასწავლებლის სახლი. ეს სახლი ახერხებს ყველა ქარიშხლისთვის წინააღმდეგობის გაწევას და კვლავ ერთ გუნდად კრავს ათობით ზრდასრულ ადამიანს, მხოლოდ ამ სახლს შეუძლია ორმოცი წლის გოგო-ბიჭების ღრმა ბავშვობაში დაბრუნება. თამრიკო მასწავლებელსა და მის ოთახებს შესწევთ ძალა, რომ ნაცრისფერ ეპოქაში ერთი პატარა შემადგენლობისთვის კვლავ აღასრულონ სასწაულები.

მოთხრობის წაკითხვის შემდეგ ერთი კითხვა მიღრღნის გულს – რა იქნება შემდეგ, როდესაც თამრიკო მასწავლებელი აღარ იქნება? ვინღა აღასრულებს საოცრებას? სამწუხაროდ, ავტორი ამ კითხვას ღიად ტოვებს და ურთულესი ამოცანის გადაწყვეტას მკითხველს მიანდობს.

მახსოვს, როგორი გაოცებული ვიყავი, როდესაც ავტორის საქმიანობის  შესახებ შევიტყვე. სოფო პოლიციაში მუშაობს. ამაზე უკეთესი რა უნდა ინატრო? ჩვენს გვერდით ყოფილან პოლიციის თანამშრომლები, რომელთაც ბრწყინვალედ შეუძლიათ ადამიანის იდეალური ტიპის ამოცნობა, ასეთი პიროვნების მიმართ პატივისცემის სათანადოდ გამოხატვა, იციან აუტანელი სევდის ფასი და, ასაკის მატების მიუხედავად, კვლავ სწამთ სასწაულების. ალბათ, უპრიანი იქნება, თუ ასეთი შემთხვევის დროს სრულიად სერიოზულად გავიმეორებთ „ცისფერი მთების“ პროტაგონისტის სიტყვებს: „გადავრჩენილვართ, მეგობრებო!“.

ალბათ უჩვეულო არაფერი იქნება იმაში, თუ ვიტყვი, რომ დღეს ჩვენს საზოგადოებაში განქორწინებული მშობლების და დარღვეულ ოჯახებში აღზრდილი ბავშვების ხილვა აღარავის უკვირს. პირიქით, შეიძლება სრული, მტკიცე და ბედნიერი ოჯახის ნახვა უფრო მეტ გაოცებას იწვევდეს.

გადაუჭარბებლად შეიძლება ითქვას, რომ მშობლების განქორწინების გავლენა ბავშვის ფსიქოლოგიურ მდგომარეობაზე, მის მომავალ ცხოვრებაზე განუზომლად დიდია. ოჯახი არის ყველაზე მნიშვნელოვანი რამ, რაც კი ბავშვს გააჩნია, რადგან მისთვის ის ხდება სიყვარულის, ურთიერთობის, უსაფრთხოების მოთხოვნილების დაკმაყოფილების ძირითადი საშუალება. დაბადების პირველივე დღეებიდან მშობლების წაბაძვით ბავშვი სწავლობს გრძნობების გამოხატვას, სიყვარულს, ნდობას. მშობლების მაგალითის გამოყენებით ბავშვი სწავლობს გარშემომყოფებთან ურთიერთობის დამყარებას, განვითარების კრიზისული პერიოდების გადალახვას. ყოველივე აღნიშნულის გამო, ოჯახის დანგრევამ არ შეიძლება გავლენა არ იქონიოს მოზარდის ფსიქოემოციურ მდგომარეობაზე და მის შემდგომ ცხოვრებაზე, ის სერიოზული სტრესის და დეპრესიის გამომწვევ მიზეზად შეიძლება იქცეს.

განქორწინების მიზეზი შეიძლება ბევრი რამ გახდეს. განქორწინება ეხება ოჯახის ყველა წევრს, მაგრამ სხვადასხვანაირად აღიქმება მშობლებისა და ბავშვების მიერ. მშობლებისთვის ეს არის გამოუვალი სიტუაციიდან გამოსვლის, საყოფაცხოვრებო საკითხების მოგვარების, ფსიქოლოგიური შეუთავსებლობის და ბევრი სხვა საკითხის გადაწყვეტის გზა. ბავშვებისთვის კი მშობლების განქორწინება სამყაროს ნგრევაა, უსაფრთხოებისა და სიყვარულის დაკარგვაა. ზოგიერთი მოზარდი მშობლების დაცილებაში საკუთარ თავს ადანაშაულებს, თვლის, რომ მან არაფერი გააკეთა მომხდარის თავიდან ასაცილებლად. ამასთან, ეშინია, რომ ის მშობელი, რომელიც ოჯახიდან წავიდა, შეწყვეტს მის სიყვარულს. საყვედურობს, ემდურება, უწყრება იმ მშობელს, რომელთანაც საცხოვრებლად დარჩა. ზოგიერთი იწყებს მშობლებით მანიპულირებას. ცდილობს, მიიღოს დამატებითი საჩუქრები, ან თავიდან აიცილოს დასჯა ცუდი შეფასების გამო. არიან ისეთებიც, რომლებიც მშობლების დაცილების შემდეგ ხშირად ავადმყოფობენ, მუდმივად გაღიზიანებული და ზედმეტად მგრძნობიარენი არიან, იკეტებიან საკუთარ თავში, გაურბიან ურთიერთობებს. როგორც წესი, გარდატეხის ასაკში მყოფი მოზარდები გაცილებით უფრო მწვავედ განიცდიან მშობლების დაცილებას, ვიდრე პატარა ბავშვები. მოზარდების რეაქცია მშობლების დაცილებაზე შეიძლება იყოს ამბოხი სკოლის, ან თავად მშობლების წინააღმდეგ. ხშირად ისინი ხდებიან უმართავები, აგრესიულები, შფოთიანები, კარგავენ თვითკონტროლს, აწყობენ ისტერიულ სცენებს, ტირიან, იტანჯებიან უძილობით, ფიქსირდება სუიციდის მცდელობაც. მოზარდს აშინებს ცვლილებები, რომლებიც შეიძლება მოხდეს მის პირად ცხოვრებაში – საცხოვრებელი ადგილის, სკოლის, ურთიერთობების წრის შეცვლის აუცილებლობა, შესაძლო ცვლილებები მატერიალურ მდგომარეობაში. მოზარდს ასევე შეიძლება რცხვენოდეს, აშინებდეს კიდეც ის, რომ მისი ოჯახური პრობლემები თანატოლებისთვის გახდება ცნობილი. ხანდახან ის განიცდის მრისხანებას, მტრულ დამოკიდებულებას იმ მშობლის მიმართ, რომელიც გახდა ოჯახის ნგრევის ინიციატორი, ან შეიძლება ასეთი გრძნობა ორივეს მიმართ გაუჩნდეს. არის შემთხვევები, როცა მოზარდი ადანაშაულებს ოჯახიდან წასულ მშობელს იმაში, რომ მიატოვა ოჯახი, პირდაპირ უცხადებს, რომ ის მას ეჯავრება და არასოდეს აპატიებს ამას. როგორც უკვე ითქვა, მოზარდი შეიძლება საკუთარ თავსაც ადანაშაულებდეს მშობლების დაცილებაში, თვლიდეს, რომ მშობლების განქორწინებაზე პასუხისმგებლობა მას ეკისრება, რადგანაც წინააღმდეგობა ვერ გაუწია მათ გადაწყვეტილებას. ხანდახან თავს იმითაც იდანაშაულებს, რომ ვერ გაამართლა იმ მშობლის მოლოდინები, რომელმაც დატოვა ოჯახი. ასეთი სახის მტანჯველი განცდები მოზარდმა შეიძლება გულმოდგინედ დამალოს. მან შეიძლება ეჭვიანობაც დაიწყოს, თუ დედა ან მამა ცდილობს ახალი ოჯახის შექმნას, ხვდება სხვა, ბავშვისთვის უცხო ადამიანს და ემოციურად ეჯაჭვება მას. ასეთ სიტუაციაში მოზარდი თავს მიტოვებულად გრძნობს და აქვს შიში, რომ ის მშობლისთვის საინტერესო აღარ იქნება და მის ადგილს მშობლის გულში სრულიად უცხო ადამიანი დაიკავებს.

მშობლების დაცილებამ შეიძლება გავლენა მოახდინოს მოზარდის მომავალ ქცევაზეც, როცა ის საკუთარ ოჯახს შექმნის. მოზარდები, რომელთა მშობლებიც სცილდებიან, მოგვიანებით ხშირად თავადაც ანგრევენ ოჯახს, რაც შეიძლება აიხსნას განქორწინებისადმი მათი ტოლერანტული დამოკიდებულებით. გარდა ამისა, განქორწინებულ ოჯახებში აღზრდილი ბავშვები ხშირად უფრო ადრე ქორწინდებიან და ქმნიან ოჯახებს, ვიდრე მათი თანატოლები მტკიცე ოჯახებიდან. მათი ასეთი ქცევა, როგორც წესი, მოტივირებულია ემოციური სითბოს ნაკლებობის კომპენსირების სურვილით, ასევე მისწრაფებით, დატოვონ მშობლების სახლი და ამ გზით მოიპოვონ დამოუკიდებლობა. მაგრამ, ასეთი ადრეული ქორწინებები ხშირად განქორწინებით მთავრდება.

მშობლების განქორწინების შემდეგ ახალ მდგომარეობასთან ბავშვის ადაპტაციის წარმატება-წარუმატებლობა დამოკიდებულია მრავალი ფაქტორის ურთიერთქმედებაზე:

• ოჯახური ატმოსფერო განქორწინებამდე – თუ განქორწინება დაასრულებს ჩხუბისა და მძიმე განცდების ხანგრძლივ პერიოდს, მან შეიძლება დადებითი გავლენაც კი მოახდინოს ბავშვის ფსიქოემოციურ მდგომარეობაზე. ბევრი მოზარდისთვის მშობლების განქორწინება უფრო ადვილი გადასატანია, ვიდრე ის კონფლიქტური გარემო, რომელიც არსებობდა ოჯახში განქორწინებამდე, რადგანაც იმ დროს მათ ეშინოდათ ფიზიკური ძალადობის, რცხვენოდათ მშობლების მიერ მოწყობილი სკანდალების და წუხდნენ მათ შორის ჩხუბისა და შერიგების მუდმივი მონაცვლეობის გამო. ასეთ ვითარებაში განქორწინება შვებად აღიქმება;
• განქორწინების ხასიათი – განსაკუთრებით უარყოფით გავლენას ახდენს მოზარდებზე მშობლების განქორწინება „საომარი მოქმედებების“ ფორმით, რაც თავის თავში მოიაზრებს ურთიერთბრალდებებს მეუღლეებს შორის. მდგომარეობა განსაკუთრებით მაშინ მძიმდება, თუ ისინი ერთმანეთთან ბრძოლაში ბავშვებსაც რთავენ, აიძულებენ მათ ერთ-ერთი მშობლის მხარე აირჩიონ და მის გვერდით დადგნენ. მოზარდები იტანჯებიან აღნიშნული მდგომარეობით და არ სურთ არჩევანის გაკეთება მშობლებს შორის. გავითვალისწინოთ, რომ მშობელი არც მარტო დედაა და არც მარტო მამა, ის ორი ადამიანის ერთიანობაა, ერთი მთლიანია. როდესაც ისინი სცილდებიან ეს ერთიანობა იმსხვრევა, რაც ძალიან მტკივნეულია ბავშვისთვის. განქორწინება შედარებით მშვიდი ფორმით, ერთიერთბრალდებების გარეშე ამცირებს მოზარდის ტანჯვის ალბათობას, განსაკუთრებით თუ მშობლებს შეუძლიათ, აუხსნან ბავშვს, რომ ისინი შორდებიან ერთმანეთს და არა მას, დედაც და მამაც მომავალში კვლავაც დარჩებიან მისთვის მოსიყვარულე, ახლობელ ადამიანებად;
• მშობლების ადაპტაციის ხარისხი განქორწინების ფაქტთან – ახალ მდგომარეობასთან განქორწინებული მეუღლეების ადაპტაციის უნარს გადამწყვეტი გავლენის მოხდენა შეუძლია მოზარდის სულიერ მდგომარეობაზე მშობლების განქორწინების შემდეგ. და, პირიქით – რაც უფრო მეტ შფოთვას განიცდიან მშობლები, მით უფრო სერიოზულად ირღვევა მათი შვილების სულიერი წონასწორობა ახალ სიტუაციაში;
• ურთიერთობები ყოფილ მეუღლეებს შორის – ბავშვისთვის გაცილებით ნაკლებ მატრავმირებელი იქნება კეთილგანწყობილი, თანამშრომლობითი, საქმიანი ურთიერთდამოკიდებულება დაცილებულ მეუღლეებს შორის, თუნდაც მხოლოდ მაშინ, როცა საქმე ბავშვებს, მათ აღზრდას და მომავალს ეხება;
• განქორწინების შემდეგ მოზარდთან შეხვედრის შესაძლებლობა – თუ განქორწინების შემდეგ ოჯახიდან წასულ მშობელს შესაძლებლობა ექნება, დაუბრკოლებლად შეხვდეს საკუთარ შვილს, ნეგატიური შედეგები მინიმუმამდე იქნება დაყვანილი, რა თქმა უნდა, იმ პირობით, თუ ასეთი შეხვედრისას მშობელი დადებით გავლენას მოახდენს შვილზე და ყოფილი მეუღლის მიმართ უარყოფითად არ განაწყობს. სიტუაცია რთულდება, როცა ბავშვთან დარჩენილი მშობელი მხოლოდ უარყოფითად მოიხსენებს თავის ყოფილ მეუღლეს, როცა ბავშვს ეკრძალება მისი სიყვარული, საერთოდ მასზე ლაპარაკი და ფიქრიც კი, რადგანაც ამას ბავშვის მხრიდან მის მიმართ ღალატად მიიჩნევს.

რეკომენდაციები მშობლებისთვის მოზარდის ფსიქოემოციურ მდგომარეობაზე განქორწინების შედეგების უარყოფითი გავლენის შესამცირებლად:

• ვესაუბროთ მოზარდს გულწრფელად. ღიად განვიხილოთ მასთან პრობლემები მისთვის გასაგებ ენაზე. ავუხსნათ ბავშვს, რომ მშობლები შორდებიან ერთმანეთს და არა მას. ისინი მომავალშიც დარჩებიან მისთვის მოსიყვარულე და ახლობელ ადამიანებად;
• ძალიან მნიშვნელოვანია, დავეხმაროთ ბავშვს მიიღოს სიტუაცია ისე, როგორც არის, იმისათვის, რომ შეწყვიტოს საკუთარი თავის და მშობლების დადანაშაულება, საყვედურები. ასევე მნიშვნელოვანია ბავშვმა იცოდეს, რომ დედა და მამა განაგრძობენ მის სიყვარულს მაშინაც კი, თუ ერთ-ერთი მათგანი არ იქნება მის გვერდით. ისინი ყოველთვის დარჩებიან მის საყრდენად, მას ყოველთვის შეუძლია ჰქონდეს მათი იმედი;
• განქორწინების დროს ძალიან მნიშვნელოვანია გავაგებინოთ ბავშვს, რომ არცერთ მშობელს, არც დედას და არც მამას არ უღალატია მისთვის და არ მიუტოვებია ის. განსაკუთრებით მნიშვნელოვანია, არ მოხდეს ბავშვით მანიპულირება იმ დროს, როცა მას უწევს არჩევანის გაკეთება – რომელ მშობელთან დარჩეს საცხოვრებლად;
• ნუ ჩავრთავთ ბავშვს კონფლიქტებში, ნუ დავიწყებთ ურთიერთობების გარკვევას მისი თანდასწრებით. ამან შეიძლება გამოიწვიოს სერიოზული პრობლემები – მშობლებისადმი ნდობის დაკარგვიდან მოულოდნელ აგრესიამდე;
• ნუ განვაწყობთ ბავშვს ოჯახიდან წასული მშობლის საწინააღმდეგოდ, ნუ შევეცდებით ჩამოვუყალიბოთ მას მისდამი უარყოფითი დამოკიდებულება. ოჯახიდან წასული მშობლის დადანაშაულებამ შეიძლება დამატებითი პრობლემები გამოიწვიოს;
• მხარი დავუჭიროთ ბავშვს, მუდმივად გავუმეოროთ და ვუჩვენოთ, რომ ის ჩვენთვის საყვარელი და მნიშვნელოვანია, რომ მის ოჯახს არ შეუწყვეტია არსებობა, უბრალოდ ახლა ის ცოტა სხვანაირი იქნება. მნიშვნელოვანია, რომ ბავშვი არ ჩაიკეტოს საკუთარ თავში, ემოციურად მიტოვებულად არ გრძნობდეს თავს, არ დაკარგოს მშობლების რწმენა, იცოდეს, რომ ის უყვართ, რომ ის არაფერშია დამნაშავე;
• წინააღმდეგობას ნუ გავუწევთ ბავშვის ურთიერთობას ოჯახიდან წასულ მშობელთან. მოზარდმა არ უნდა ჩათვალოს, რომ ერთ მშობელთან შეხვედრა მეორის უარყოფას, მეორეზე უარის თქმას ნიშნავს;
• ვიზრუნოთ, რომ მშობლების განქორწინების შემდეგ ბავშვის ცხოვრება რაც შეიძლება ნაკლებად შეიცვალოს – საცხოვრებლად დარჩეს იმ სახლში, სადაც ადრე ცხოვრობდა, ისწავლოს იმავე სკოლაში, სადაც ადრე სწავლობდა;
• მნიშვნელოვანია, რომ განქორწინების შემდეგ მშობლები აგრძელებდნენ მშობლებად დარჩენას და პირველ რიგში ითვალისწინებდნენ ბავშვის ინტერესებს და გრძნობებს.

ყოველივე ზემოაღნიშნულიდან გამომდინარე, რაც უფრო ნაკლებ პრობლემებს შეუქმნიან და ნაკლებ ტკივილს მიაყენებენ მშობლები ერთმანეთს განქორწინების შემდეგ, მით უფრო ნაკლებად დაზარალდება მოზარდის ფსიქოემოციური მდგომარეობა და მით უფრო მაკლებ მატრავმირებელი იქნება მისთვის მშობლების დაცილება.