სასკოლო სპორტულ ოლიმპიადა დაიწყო. ოლიმპიადის პროგრამის მიხედვით, საქართველოს 11 ქალაქში (გორი, თბილისი, ბათუმი, მცხეთა, რუსთავი, თელავი, ახალციხე, ქუთაისი, ოზურგეთი, ზუგდიდი, ამბროლაური) 2015 წლის მარტიდან ივლისის ჩათვლით, სასკოლო სპორტული ოლიმპიადა ჩატარდება. მასში მონაწილეობას 400-ზე მეტი სკოლა მიიღებს.
ოლიმპიადა შემდეგ სახეობებს მოიცავს:
– მინიფეხბურთი (ვაჟები);
– კალათბურთი (ვაჟები);
– კალათბურთი (გოგონები);
– მაგიდის ჩოგბურთი (გოგონები);
– მძლეოსნობა (შერეული);
– მოძრავი თამაშები (მხიარული სტარტები).
რეგიონალური თამაშები, მარტიდან ივნისის ჩათვლით, ხოლო დასკვნითი ფინალური ეტაპი – 2015 წლის 1-10 ივლისს – ანაკლიის ,,მომავლის ბანაკში” ტარდება. სასკოლო სპორტული ოლიმპიადის წარმატებულ მონაწილეებს, მინიფეხბურთში, 2016 წლის სასკოლო მსოფლიო ჩემპიონატის საგზურის მოპოვების პერსპექტივა აქვს, რომელიც ხორვატიაში გაიმართება.
კალათბურთში (3×3) წარმატებულები 2016 წლის ესტონეთის სასკოლო მსოფლიო ჩემპიონატის საგზურს მიიღებენ. მაგიდის ჩოგბურთში წარმატებულებს – 2016 წლის სასკოლო მსოფლიო ჩემპიონატი ისრაელში, ხოლო კროსში წარმატებულებს – უნგრეთში 2016 წლის სასკოლო მსოფლიო ჩემპიონატის საგზურები ელოდებათ. საქართველოს სასკოლო სპორტული ოლიმპიადის სპორტულ თამაშებში მონაწილეობის უფლება VIII-X კლასის მოსწავლეებს აქვთ, ხოლო – მოძრავ თამაშებში – III-VII კლასების მოსწავლეებს.
ოლიმპიადაში მონაწილეობის მსურველმა სკოლის გუნდმა რეგისტრაცია შემდეგი წესით უნდა გაიაროს: ოლიმპიადის პირველ ეტაპზე – მონაწილეობის მსურველი სკოლები სახეობების მიხედვით განაცხადებს სპორტული ოლიმპიადის ადგილობრივ საორგანიზაციო ჯგუფს წარუდგენენ. ოლიმპიადის მეორე ეტაპზე – განაცხადი ცენტრალურ სარეგისტრაციო კომისიას უნდა მიაწოდონ.
23 მარტს ქალაქ გორმა სასკოლო სპორტული ოლიმპიადის პროგრამით გათვალისწინებული შეჯიბრების ფინალურ ეტაპს უმასპინძლა.
ფინალურ ეტაპზე უშუალოდ დასასწრებად გორს საქართველოს სპორტის და ახალგაზრდულ საქმეთა მინისტრი, ლევან ყიფიანი, და განათლებისა და მეცნიერების მინისტრი, თამარ სანიკიძე ეწვივნენ. ისინი მძლეოსნობისა და მხიარული სტარტების შეჯიბრებათა ფინალურ ასპარეზობებს დაესწრნენ და ოლიმპიადის პროგრამის ყველა სახეობაში გამარჯვებულებიც დააჯილდოვეს.
მძლეოსნურ ესტაფეტაში პირველი ადგილი დაიკავა გორის II საჯარო სკოლამ, მომდევნო ადგილებზე შესაბამისად I და IV სკოლა გავიდნენ. კალათბურთში ვაჟთა შორის ყველას II სკოლამ აჯობა, გოგონებიდან კი საუკეთესო III სკოლა იყო. ეს სკოლა გახდა მინი ფეხბურთში ვაჟთა შორის გამართული ტურნირის გამარჯვებულიც. მაგიდის ჩოგბურთში გოგონათა შორის საუკეთესო აღმოჩნდა ანა მარიამიძე (გორის ღირსი გიორგი მთაწმინდელის სახელობის გიმნაზია), ხოლო ვაჟებში – გიორგი მჭედლიძე (IV სკოლა). ღირსი მამა გიორგი მთაწმინდელის სახელობის გიმნაზიის გუნდმა მხიარულ სტარტებშიც ყველას აჯობა, მეორე და მესამე ადგილებზე კი გორის VIII და VII საჯარო სკოლის გუნდები გავიდნენ.
შეჯიბრების შემდეგ დაჯილდოების ცერემონიალში მონაწილეობა გორის მერმა, ზურაბ ჯირკველიშვილმა და გორის რაიონის გამგებელმა, დავით ონიაშვილმა მიიღეს. სხვადასხვა სახეობებში სასკოლო ოლიმპიადის გამარჯვებულები ჩვენი ქვეყნის 11-ვე ქალაქიდან მონაწილეობას გადამწყვეტ შეჯიბრებებში მიიღებენ, რომელიც ანაკლიაში გაიმართება. იქ გამოვლენილი საუკეთესოები კი სასკოლო მსოფლიო ჩემპიონატში იასპარეზებენ, რომელიც ხორვატიაში, უნგრეთში, ესტონეთსა და ისრაელში გაიმართება.
სპორტული ოლიმპიადა წლეულს საქართველოში პირველად იმართება. პროექტი საპილოტეა და გაისად მასში ჩვენი ქვეყნის მასშტაბით ყველა სკოლის ჩართვა იგეგმება.
ლევან ყიფიანი გორში გამართული შეჯიბრების და გამარჯვებულთა დაჯილდოების შემდეგ, ცენტრალურ სასპორტო სკოლაში ძიუდოისტ ქალთა ნაკრების სავარჯიშო პროცესს დაესწრო. ეს გუნდი მთავარი მწვრთნელის გია თენაძის ხელმძღვანელობით მოსამზადებელ შეკრებას გადის. ბოლოს ბატონმა მინისტრმა ნუგზარ სხირელის სახელობის ჭიდაობის დარბაზიც მოინახულა. შეგახსენებთ, რომ დარბაზის მშენებლობა შარშანდელი წლის მიწურულს დასრულდა. იქ გორელი ფალავნებიც უკვე ვარჯიშობენ, თუმცა მიზეზთა გამო ჯერჯერობით ვერ მოხერხდა მუნიციპალიტეტის დაქვემდებარებაში შესაბამისი ჭიდაობის სკოლის დაფუძნება, რაც ბუნებრივია პრობლემას უქმნის დარბაზში სრულფასოვან მუშაობას.
როგორც უკვე ვთქვით, სასკოლო სპორტული ოლიმპიადის ფინალური თამაშები დაგეგმილია ანაკლიის „მომავლის ბანაკში”, სადაც სპორტულ შეჯიბრებებთან ერთად, კულტურული და გასართობი სანახაობაც გაიმართება. პროექტის სპონსორია კომპანია „IDS ბორჯომი საქართველო”.
სასკოლო სპორტული ოლიმპიადა წელს პირველად იმართება. პროექტი საპილოტეა. მომავალ წელს ოლიმპიადაში საქართველოს მასშტაბით ყველა სკოლის ჩართვა იგეგმება.
