ყველაფერი სამი წლის წინ დაიწყო, როდესაც დღის წესრიგში აქტუალური კითხვა – როგორ შეიძლება მასწავლებლის პროფესიის პოპულარიზაცია და მხარდაჭერა საქართველოში, კიდევ ერთხელ დაისვა. კითხვაზე პასუხი გენიალური და მარტივი იყო – ლიტერატურის გზით, რაც თავისთავად, ამ შესანიშნავი პროფესიის გარდა, ლიტერატურის მხარდაჭერასაც მოიაზრებდა. სწორედ ქართული ლიტერატურა, სადაც არცთუ ხშირად გხვდება მასწავლებლის სახე, გადაიქცა ერთგვარ ხიდად სხვადასხვა ასაკის მკითხველის გულამდე და, რაც არანაკლებ მნიშვნელოვანია, სათქმელად მასწავლებლისთვის. მას კიდევ ერთხელ მიეცა შანსი, რომ გვერდიდან შეეხედა საკუთარი თავისთვის, პრობლემებისთვის, გამოწვევებისთვის. ეს კი თვითშეფასების და ალბათ ადეკვატური თვითკრიტიკის შესაძლებლობას მისცემდა.
ლიტერატურული კონკურსის – „საუკეთესო მოთხრობა მასწავლებელზე“ გამარჯვებულთა სამეული გუშინ საზეიმოდ დასახელდა, ხოლო მასწავლებლებს, ჟურნალ „მასწავლებლის“ სპეციალური ნომრის სახით, დარჩა ათი საუკეთესო ლიტერატურული პროდუქტის ნაკრები, რომლის უცვლელი თემა მასწავლებელია, მისი საქმიანობა და სკოლის ცხოვრება. ჟურნალი საქართველოს ყველა სკოლას საჩუქრად გადაეცემა, ჩვეულებრივ მკითხველს კი საუკეთესო მოთხრობებთან ზიარება ინტერნეტგაზეთში „mastsavlebeli.ge“-ზე შეუძლიათ.
ტრადიციულად კონკურსის ორგანიზება მასწავლებელთა პროფესიული განვითარების ეროვნული ცენტრის მიერ, კონკრეტულად კი საინფორმაციო საგანმანათლებლო რესურსების, ჟურნალ „მასწავლებლისა“ და ინტერნეტგაზეთ „mastsavlebeli.ge“-ს მესვეურთა აქტიური ჩართულობით მოხერხდა.
დაჯილდოების ცერემონიალზე კონკურსის სულისჩამდგმელმა და ინიციატორმა, ჟურნალ „მასწავლებლისა“ და ინტერნეტგაზეთ „mastsavlebeli.ge“-ს მთავარმა რედაქტორმა ნატო ინგოროყვამ მადლობა გადაუხადა ყველას, ვინც მონაწილეობა მიიღო ლიტერატურული კონკურსის დაგეგმვაში და ჟურნალ „მასწავლებლის“ ლიტერატურული ნომრის მომზადებაში, ასევე, მადლიერება გამოხატა კონკურსის ფინანსურ მხარდამჭერ ლიბერთი ბანკისა და სხვა პარტნიორთა – გამომცემლობა „ინტელექტსა“ და „პროფესიონალ ქიმიკოსთა ასოციაციის“ მიმართ, სწორედ მათ დააჯილდოვეს განსაკუთრებული პრიზებით თავიანთი რჩეული ავტორები.
გამომცემლობა „ინტელექტის“ განსაკუთრებული პრიზი ერგო კონკურსის მონაწილე სოფიო კუბლაშვილს და თეა თოფურიას.
„პროფესიონალ ქიმიკოსთა ასოციაციის“ პრიზი საბუნებისმეტყველო საგნის მასწავლებელთა პროფესიის პოპულარიზაციასა და მხარდაჭერისთვის, ორგანიზაციის ხელმძღვანელმა ელიზბარ ელიზბარაშვილმა, ალექსანდრე ლორთქიფანიძეს გადასცა.
რაც შეეხება მასწავლებელთა პროფესიული განვითარების ეროვნული ცენტრის პრიზებს, ისინი კონკურსის სხვა მონაწილეებს: მიშა ბახსოლიანს, ნათია როსტიაშვილს, ლუკა ბაქანიძეს ადა ეთერ ქუთათელაძეს გადაეცა.
საინტერესოა, რომ წლევანდელმა ჟიურიმ საკმაოდ ბევრი – 72 საკონკურსო ლიტერატურული ნამუშევარი შეაფასა. ჟიური წარმომადგენლობითი იყო: ლიტერატურათმცოდნე და ლიტერატურის კრიტიკოსი ლევან ბერძენიშვილი, გამომცემლობა „ინტელექტის“ მთავარი რედაქტორი და მწერალი ზვიად კვარაცხელია, პარლამენტის ეროვნული ბიბლიოთეკის დირექტორი და მწერალი გიორგი კეკელიძე, მწერალი და ტელეკომპანია „რუსთავი 2“-ის ლიტერატურული გადაცემის წამყვანი, პროდიუსერი ნესტან-ნენე კვინიკაძე, უცხოეთში მოღვაწე მწერალი და მთარგმნელი კატია ვოლტერსი. ჟიურის წევრებმა მოთხრობების ხარისხი და თემასთან შესაბამისობა სპეციალური კრიტერიუმებით (ავტორთა ვინაობა ანონიმური ჟიურისთვის იყო) განსაზღვრეს.
წელს კონკურსის მრავალფეროვნებისთვის მის მონაწილეებს აქცენტი სკოლისა და მასწავლებლის ცხოვრებიდან ყველაზე აქტუალურ – ღირებულებების თემაზე უნდა გაეკეთებინათ: უსაფრთხო სასკოლო გარემო, ტოლერანტობა, ინკლუზიური განათლება, მეგობრობა, სამართლიანობა და მასწავლებლის როლი ამ პროცესში.
განათლების , მეცნიერების , კულტურისა და სპორტის სამინისტროს მინისტრის მოადგილემ ზოგადი განათლების მიმართულებით ირინა აბულაძემ განაცხადა, რომ ლიტერატურული კონკურსი ყოველწლიურად სულ უფრო პოპულარული ხდება, რაც გამოიხატება არა მარტო საკონკურსო ნამუშევართა მზარდ რაოდენობაში, არამედ ხარისხის დახვეწის თვალსაზრისითაც.
„ჩვენს საზოგადოებას მასწავლებლის მიმართ მაღალი მოლოდინები აქვს, მაგრამ არ უნდა დაგვავიწყდეს, რომ მასწავლებელი ადამიანია, რომელსაც ჩვენნაირი, ყოველდღიური პრობლემები აქვს და ვალდებულია ისინი სკოლაში შესვლის დროს დაივიწყოს. არ შეიძლება საზოგადოება მუდმივად უსაფრდებოდეს მასწავლებელს. ნეგატივი, რომელიც სკოლებში გროვდება, დამანგრეველია საზოგადოებისთვის. ვფიქრობ, კარგი იქნება, თუკი ამ კონკურსის ფარგლებში შექმნილი ნაწარმოებების ბაზას, გამოვიყენებთ რესურსად როგორც სასწავლო პროცესში, ისე უნივერსიტეტებში, სადაც მასწავლებლებს ამზადებენ.“ – აღნიშნა ირინა აბულაძემ.
გამარჯვებული სამეულის საჯარო გამოცხადებამდე, შეკრებილ საზოგადოებასა და მომლოდინე კონკურსანტებს მასწავლებელთა პროფესიული განვითარების ეროვნული ცენტრის დირექტორის დროებითი შემსრულებელი დავით ხვედელიძე მიესალმა და აცნობა, რომ ბოლო სამი წლის განმავლობაში დაგროვილი ოცდაათი მოთხრობა უახლოეს მომავალში ერთ წიგნად შეიკვრება და გამოიცემა.
ჟიურის ერთ-ერთი წევრის, ნესტან-ნენე კვინიკაძის განმარტებით, განათლების სისტემის დახვეწა ქვეყნის პრიორიტეტი უნდა იყოს. ამიტომ ნებისმიერი აქტივობა ამ მიმართულებით, მით უფრო შემოქმედებითი კონკურსის ორგანიზება, მნიშვნელოვანია. „კონკურსში ყველაზე მნიშვნელოვნად მესახება ერთგვარი სტერეოტიპების დანგრევის მისია და ალბათ, ყოველ ჯერზე, გამარჯვებული ტექსტებით მივუთითებთ იმაზე, თუ რამდენად მნიშვნელოვანია ნამუშევრის ფორმა. ეს ტექსტების კონკურსია და არა ემოციური ამოძახილების. განსაკუთრებით სასიხარულოა, რომ ასეთი კონკურსის დროს შესაძლოა სრულიად ახალი მწერლების, ახალი სახეების აღმოჩენა,“ – აზუსტებს მწერალი.
საღამოზე, რომელიც კონსტანტინე ვარდელის სიმებიანმა კვარტეტი მუსიკალურად აფორმებდა, სამივე გამარჯვებულს ლიბერთი ბანკის ფულადი პრემიები ერგო. მესამე ადგილი დიანა ანფიმიადს ხვდა წილად მოთხრობისთვის „მარსზე წყალი იპოვეს, მეორე ადგილი კი “ნინო ქადაგიძეს მოთხრობისთვის „ოქტომბრელი“.
„ჩვენთვის ძალიან სასიამოვნოა ასეთი კონკურსის სპონსორობა. ლიბერთი ბანკი, მასწავლებელთა პროფესიული განვითარების ეროვნულ ცენტრთან ერთად, უკვე სამი წელია თანამშრომლობს. პირობას გაძლევთ, რომ მომავალშიც თქვენთან ერთად ვიქნებით,“ – განაცხადა დავით ვერულაშვილმა, ლიბერთი ბანკის გენერალური დირექტორის მოადგილემ, რომელმაც პირველი ადგილის მფლობელსა და გამარჯვებულს, დავით გორგილაძეს გადასცა პრიზი მოთხრობისთვის „სცენას ჩამოსასვლელი არ აქვს“. ასევე, დავით გორგილაძეს გადაეცა კონკურსის სიმბოლო – კალმის ყუნწის მქონე ვაშლი, რომლის ფოთოლზეც დაწერილია გამარჯვებულის ვინაობა. კონკურსის პრიზი დიზაინერი მარიამ ელიზბარაშვილმა შექმნა და საჩუქრად გადაცა კონკურს..
„ალბათ სამომავლოდ კონკურსს კიდევ უფრო მეტი ავტორი შეეხმიანება და მასწავლებლის საქმიანობასა და თანამედროვე სკოლის ცხოვრებაზე, ღირებულებებზე, რომლებსაც მასწავლებლები უნდა გადასცემდნენ სკოლაში, უკეთესი მოთხრობები დაიწერება,“ – იმედოვნებს ნატო ინგოროყვა.
შეგახსენებთ, რომ ყოველწლიური ლიტერატურული კონკურსის „საუკეთესო მოთხრობა მასწავლებელზე“ გამარჯვებულები მასწავლებლის საერთაშორისო დღისადმი მიძღვნილი კვირეულის ფარგლებში დაჯილდოვდნენ.
