პირადი გამოცდილებიდან რომ ვთქვა, სკლის ბიბლიოთეკაში ორი სხვადასხვა სტატუსით შევდიოდი, როგორც მოსწავლე და შემდეგ – მასწავლებელი. თუმცა, მიუხედავად იმისა, რომ სკოლაში თერთმეტი წლის განმავლობაში ვსწავლობდი, ხოლო მასწავლებელი სულ რაღაც სამი წელი ვიყავი, ამ უკანასკნელის დროს უფრო ხშირი და პროდუქტიული იყო ჩემი ყოფნა ბიბლიოთეკაში. რა იყო ამის მიზეზი?.. ალბათ ის, რომ მე არ მქონდა სკოლის კარგი ბიბლიოთეკა, უფრო სწროად თუ ვიტყვი, თითქმის საერთოდ არ მქონდა.
რამდენიმე წლის წინ სკოლებს დაურიგდათ წიგნები, ე.წ. პრეზიდენტის საჩუქრის მანიშნებელი ბეჭდით. მათ შორის იყო ზღაპრები, მარკესის რამდენიმე რომანი და პოეზიის კრებულები. დღეს კი იმ სკოლათა უმეტესობაში, რომლების ბიბლიოთეკებშიც მე ვყოფილვარ ისეთი სიტუაციაა, რომ აქვთ საბჭოთა კავშირის დროს გამოცემული და მხოლოდ ეს პრეზიდენტის საჩუქარი წიგნები. ისეთი შთაბეჭდილება მრჩება, რომ დირექტორები ნაკლებად, ან საერთოდ არ იყენებენ სკოლისათის გამოყოფილ თანხას ახალი წიგების შესაძენად. უფრო მეტიც, ზოგგან ბიბლიოთეკარის შტატი აქვს მასწავლებელს, რომელიც იქ მხოლოდ მაშინ შედის, როცა ვინმე სთხოვს კარის გაღებას. წიგნების თაროები დამტვერილია და დაულაგებელია, სადმე კუთხეში დგას ერთი დიდი მაგიდა და სულ ესაა მთელი აღწერილობა იმისა, რაც ყველაზე მიმზიდველი უნდა იყოს სკოლაში.
ბიბლიოთეკა, როგორც საშუალება, მიიღო განათლება, ბიბლიოთეკა – პარალელური განზომილება, თუ ალტერნატიული სამყარო, თითქმის სრულად იგნორირებულია. კი, რა თქმა უნდა, არის ისეთი სკოლები, განსაკუთრებით კერძო, სადაც ყველაფერი კარგად აქვთ მოწყობილი, შეხვალ და თითქოს ყველაფერი რიგზეა; თვალსაჩინოდ დალაგებული წიგნები კარგ თაროებზე, მოწყობილი სამკითხველო დარბაზი, მაგრამ იშვიათად რომ იქ მჯდარი მოსწავლე დაინახო, მოსწავლე და მასწავლებელიც, რადგან მასწავლებლის პროფესიული ზრდაც არანაკლებ მნიშვნელოვანია მოსწავლის განვითარებაზე.
რა არის მიზეზი იმისა, რაც ვთვქი?.. იქნებ რაღაც ფასადურობა ყველაფერის, რაც დღესდღეობით მრავლადაა ჩვენს საზოგადოებაში. რატომ ვერ გახდა მიმზიდველი მუშაობა, კითხვა, მაშინ როცა დღეს სტუდენტთა და დამამთავრებელ კლასის მოსწავლეთა უმეტესობა მხარზე ჩანთაგადაკიდებულები ჯიუტად დადიან და სხვადასხვა ელექტრონული წიგნით ხელდამშვენებულნი მსჯელობენ წიგნებზე.
საბოლოოდ, მინდა გითხრათ, მოსწავლეებსაც, მასწავლებლებსაც, რომ სკოლაში, სახლში, – მოკლედ ყველგან, სადაც კი არის, საუკეთესო ადგილი ბიბლიოთეკაა და ნუ მოშორდებით საუკეთესო ადგილებს, რადგან ისინი ჩვენც თავისნაირებად გვაქცევენ ხოლმე.
