დუმილი, როგორც გამოსავალი

1. თოვლის ბაბუაზე მეტად სანტა მიყვარს. სანტა უფრო მხიარულია, თან უფრო საახალწლოდაც გამოიყურება: შესაძლოა, ამაში დამნაშავე ფერებია

2. არაფერი არსებობს ბუხარზე ჯადოსნური, იყო ბუხრის მწმენდავი, ნიშნავს, გქონდეს ცოტაოდენი შანსი, რომელიმე წელიწადს შეხვდე ბავშვობას

3. თოვლი, ეს ის ატრიბუტია, რომელიც თავის დროზე ახალი წლისთვის შეიქმნა. ამ ბოლო დროს კი მოსვლა ეზარება

4. ბავშვობა ის დროა, როცა არ ოცნებობ, გაიკეთო ტატუ სპილოგადაყლაპული გველის გამოსახულებით

5. 90– იანი წლების ბავშვები ახალ წელს დუმილით ვხვდებოდით. გვჯეროდა, რომ სანტა ღარიბი იყო. მგონი ირმებიც კი არ ჰყავდა

6. მე მახსოვს ლამპის შუქით განათებული ახალი წელი. მახსოვს ნავთის სუნი

7. საახალწლოდ წიგნებს არ მჩუქნიდნენ. მაშინ წიგნების ჩუქება “მოსული პონტი” არ იყო

8. არ მიყვარდა ჩიჩილაკი. არც არასდროს გვქონია. ვფიქრობდი, რომ ფუმფულა, მწვანე, ხელოვნური ნაძვის ხე უფრო თემატური და პომპეზური იყო

9. ახალი წელი აუცილებლად პომპეზური უნდა იყოს

10. მანდარინებს გვჩუქნიდნენ. არადა, ის ისედაც ბევრი იყო

11. სკოლაშიც მანდარინებს გვჩუქნიდნენ. მგონი, მანდარინების თაობა ვართ. კარგად ჟღერს

12. ჩვენ ორი ზომით დიდი “დუბლიონკები” გვეცვა. ძველი ზამთარები “დუბლიონკის” გარეშე იგივეა, ჩიზბურგერს კიტრის მწნილის თხელი ნაჭრები გამოაცალო

13. ვან დამი გმირი იყო. მაშინ ჩაკ ნორისი და ვან დამი ხდებოდა. გმირებიც იცვლებიან, რა თქმა უნდა. ვან დამიდან ბილბო ბეგინსამდე.  

14.  ძალიან იშვიათად გამოვხატავდით პროტესტს, რადგან დარწმუნებულები ვიყავით, ჩვენს პროტესტს ვერ დაინახავდნენ. გაიხსენეთ მე– 9 ბლოკი

15. ვერ წარმოგვედგინა, რომ პროტესტის ვიზუალიზაცია თუ მოსახერხებელი ფორმა არ იყო, ყვირილი შეგვეძლო

16. მაგრამ, მგონი, მაინც ბევრი რამე გვეზარებოდა. ან თუ არ გვეზარებოდა, უბრალოდ, არაფერი ვიცოდით გამოხატვის თავისუფლებისა და მისი ფორმების შესახებ

17. როგორც ყველა ბავშვს, ჩვენც არაფერი გვსმენოდა ჩვენი განსაკუთრებულობის შესახებ. ამით გვჯობიხართ უფროსებს: წარმოდგენა არ გაქვთ თქვენი ჯადოსნური თვისებების შესახებ, ჩვენ კი თავი უზარმაზარები გვგონია

18. საახალწლოდ დედამ საკუთარი ხელით ააკრა შპალერი და მერე თითოეული კედელი სხვადასხვა, პასტელურ ფერში გადაღება. განსაკუთრებული დღესასწაული მქონდა. მაშინ შემიყვარდა ფერები

19. ახალ წელს სადღესასწაულო,  გემრიელ და განსხვავებულ კერძებს ჩემი არაგურმანობის გამო ვერ ვუკავშირებ. განწყობა არა გემოთი, ფორმით მოდის. შუბა მხოლოდ იმიტომ არის გემრიელი, რომ ლამაზია, თან– ჭრელი

20. გაითვალისწინეთ: პატარა, ფერადი შუშხუნები მნიშვნელოვანია. რა თქმა უნდა, ფეიერვერკებიც. დასაწყისში ახალი წელის პომპეზურობის შესახებ გელაპარაკეთ

21. მიწერეთ წერილები სანტას. სთხოვეთ ყველაფერი მიწიერი, პლანშეტებიდან დაწყებული ლეონარდო დი კაპრიოს ცოლობით დამთავრებული. სანტამ, კარგა ხანია, ირმები იშოვა და მის უზარმაზარ მარხილში ლეონარდოს ადგილიც გამოიძებნება

22. არ დაგავიწყდეთ, საჩუქრების გარეშე ახალი წელი არ გამოვა. დიდებს ხომ სანტა სურვილებს აღარ უსრულებთ. გაუკეთეთ სიურპრიზები მშობლებს: მათ ყველაზე მეტად თქვენი შესანიშნავი გრაფიკული ნამუშევრები გაუხარდებათ. ნახატის უკანა მხარეს არ დაგავიწყდეთ მიძღვნის გაკეთება: კეთილი სურვილები უფროსებისთვის იგივეა, რაც თქვენთვის შოკოლადი

23. ენის მოჩლექით კი არ გელაპარაკებით. ჩემთვისაც ძვირფასია შოკოლადი, აბა, წარმოდგინეთ, რა ტრაგიკული იქნებოდა ჩვენი ცხოვრება, შოკოლადი ისეთ ფუფუნებად რომ ითვლებოდეს, როგორც ადრე. გახსოვთ წუწურაქი კროკერების  საკონდიტროს ვიტრინებთან ატუზული გროვერი?!

24. წინასაახალწლოდ უყურეთ ბევრ საახალწლო ფილმსა და მულტფილმს. შეაგროვეთ იდეები. ისინი აუცილებლად გამოგადგებათ განსაკუთრებული განწყობის შესაქმნელად. 

25. გადაიღეთ ბევრი ფოტო და ვიდეო. აუცილებლად. მე ისიც კი არ მახსოვს, რა მეცვა წინა ახალ წელს

26. დრესკოდი ისეთი რამეა, რომლის გარეშეც დღესასწაული საძირკველამოყვანილი, მშენებარე სახლივით არასახარბიელოდ გამოიყურება

27. აიძულეთ მშობლები, გამოეწყვნენ ისე, როგორც ამ დღეს შეჰფერის. 

28. ყველა კედელზე ჩამოკიდეთ წინდები, ბუხრის ქონა აუცილებელი სულაც არ არის. ასე უფრო დიდი შანსია, სანტას არცერთი თქვენი სურვილი არ გამორჩეს. ის ცოტათი გულმავიწყია.

29. ახალი წელი მხოლოდ მაშინ არ მოდის, როცა მისთვის საგანგებოდ ემზადებიან

30. ის არ დაგელოდებათ, თუ თქვენ სათანადო განწყობის შექმნა ვერ მოასწარით

31. ბედნიერ ახალ წელს გისურვებთ!