სასკოლო მათემატიკის ერთ-ერთ მიმართულებას ეწოდება „რიცხვები და მოქმედებები”. ეს მიმართულება თავიდან ბოლომდე უწყვეტად გასდევს მათემატიკის საგნობრივ პროგრამას და შეიძლება ითქვას რომ მათემატიკის სწავლების საფუძველს წარმოადგენს. მათემატიკური აზროვნების პირველი ნაბიჯები სწორედ რიცხვებთან და რაოდენობებთან დაკავშირებული ცნებების და პროცედურების გააზრებასთანაა დაკავშირებული. ამასთან, რიცხვები და მათზე მოქმედებები წარმოადგენს მათემატიკის სხვა მიმართულებების აუცილებელ საყრდენს. სწორედ მათი საშუალებით ხდება გეომეტრიული ობიექტების თვისებების კვლევა, ალგებრული ცნებების შემოტანა ეფუძნება რიცხვებთან დაკავშირებული შესაბამისი ცნებების განზოგადებას, ხოლო მონაცემთა ანალიზის ყველა ძირითადი პროცედურა დაკავშირებულია რაოდენობრივი (რიცხვითი) მახასიათებლების გამოყენებასთან. ყოველივე აქედან გამომდინარე, რიცხვითი სისტემების და მათი თვისებების ღრმად გააზრება აუცილებელია ყველა სხვა მათემატიკური სტრუქტურების შესწავლისათვის.