1916 წელს სამეცნიერო-პედაგოგიურ და სალიტერატურო ჟურნალ „განათლების“ ფურცლებიდან ილია ნაკაშიძე მშობლებს მიმართავს და უხსნის იმას, რასაც დღესაცმონდომებით იმეორებენ, საგანმანათლებლო-პოლიტიკური რეკომენდაციებითა დაკვლევებით ამყარებენ განათლების სისტემის მესვეურები მთელი მსოფლიოს მასშტაბით.
სტატიაში „მშობელთა ერთობა“ ავტორი მონდომებით უხსნის მშობლებს, რომ დედამიწის ზურგზე ვერანაირი ძალით საზოგადოებრივი აზრი ვერ შეიქმნება, თუ თავად საზოგადოების წევრებმა არ მიიღეს მასში მონაწილეობა; რომ მომავალი თაობა ვერიწამებს იმის ღირსებას, რის რწმენასაც ჩვენ, უფროსი თაობა ვერ დავანახებთ; რომკრიტიკის ნაცვლად, ერთიანი ძალისხმევაა ის, რაც სწავლა-განათლების სისტემისა და სკოლის განვითარებას სჭირდება.
სტატიის ბოლოს ავტორი იმედიანად აღნიშნავს, რა კარგია, რომ ჩვენთანაც იდგმება ნაბიჯები ამ მიმართულებითო – მშობლები ერთიანდებიან, თვითაღზრდას მიმართავენ, იმართება მშობელთა კლუბები და შეხვედრები და ეს ყოველივე კი ბუნებრივად იწვევსდადებით შედეგებს ბავშვებშიო.
ყველა კვლევა, რომელიც მოსწავლის შედეგებსა და სწავლა-სწავლების ხარისხზე მოქმედ ფაქტორებს ეხება, გვეუბნება სწორედ ამას – მშობლის ჩართულობა, სკოლისა და მშობლების პარტნიორობა არის მოსწავლის შედეგებზე ერთ-ერთი ყველაზე მაღალი გავლენის მქონე ფაქტორი. ამავე დროს, მასწავლებელთა პროფესიული განვითარების
ეროვნული ცენტრის მიერ ჩატარებულმა არაერთმა კვლევამ გამოავლინა, რომ სკოლებს ძალიან სჭირდებათ სათანადო ინფორმაცია მშობელთა პედაგოგიზაციის, მათი ჩართულობის უზრუნველსაყოფად.
შესაბამისად, ჩვენი ჟურნალის მიმდინარე ნომერიც მშობელთა ჩართულობის, მშობლებთან თანამშრომლობის, მშობელთა პედაგოგიზაციის თემებს ეძღვნება.
ზემოთ ნახსენები სტატიის გარდა, რომელიც 100 წელზე მეტს ითვლის, მაგრამ მისი შინაარსი მაინც ახალი და აქტუალურია, წარმოგიდგენთ მშობლებთან თანამშრომლობის პოლიტიკურ ასპექტებს, კონცეპტუალურ ჩარჩოებს, ამ კუთხით არსებულ წარმატებულ გამოცდილებას, კვლევებს, კვლევის ინსტრუმენტებს, პრაქტიკულ რჩევებს, საკანონმდებლო რეკომენდაციებსა და სასკოლო გამოცდილებებს.
სკოლა საერთო პასუხისმგებლობის სფეროა და, როგორც ჩვენი ნომრის საუკუნისწინანდელი ავტორი იტყოდა, „დავეხმაროთ ამ საქმეში ყველამ, ვისაც რითიმე შეგვიძლია“, რომ სკოლამ და მშობელმა თანამშრომლობის საუკეთესო გზები გამონახონ ბავშვის საუკეთესო ინტერესების დასაცავად.
რედაქტორი : ნათია ნაცვლიშვილი
დიზაინერი: ბესიკ დანელია
ტექსტების სტილის რედაქტორი: მაია წიკლაური
ნომრის ავტორები: ილია ნაკაშიძე, ბერიკა შუკაკიძე, თეონა სილაგაძე, მაია არავიაშვილი, სალომე ჩხეიძე, ხათუნა ბარაბაძე, ნინო გაგელიძე, დენის წურწუმია, ნატა ვაჭარაძე, თამუნია ჭინჭარაული, სოფიო ხვედელიძე
ნომრის წაკითხვა და ჩამოწერა შესაძლებელია ბმულიდან:
