პარასკევი, მარტი 29, 2024
29 მარტი, პარასკევი, 2024

როგორ მუშაობს სკოლამდელი განათლება თურქეთში

თურქეთში მუშაობს როგორც კერძო, ასევე საჯარო საბავშვო ბაღები. სახელმწიფო ბაღში მოსახვედრად თქვენ უბრალოდ წინასწარ უნდა წარადგინოთ განცხადება თქვენი საცხოვრებელი რაიონის ადმინისტრაციაში და თან დაურთოთ ცნობა ჯანმრთელობისა და ვაქცინაციის შესახებ. თქვენ შეგირჩევენ იმ ბაღს, რომელშიც თავისუფალი ადგილები ექნებათ. საბავშვო ბაღებში მოსახვედრად თურქეთშიცაა რიგები, თუმცა, როგორც წესი, არცთუ დიდი. უმჯობესია, რაიონის ადმინისტრაციაში განცხადება ივნისში შეიტანოთ, სექტემბრისთვის კი ბაღში ადგილი უკვე გექნებათ. სახელმწიფო საბავშვო ბაღი თვეში დაახლოებით 100 ლირა ღირს (დაახლოებით 15 ლარი).

თუ ვსაუბრობთ კერძო ბაღებზე, სხვადასხვა ბაღში ფასი განსხვავებულია და საშუალოდ თვეში 2000 თურქული ლირიდან (დაახლოებით 280 ლარი) იწყება. ასევე, სურვილისამებრ, თქვენ იხდით დამატებითი მომსახურების საფასურსაც – ბავშვების წაყვანა ბაღში და უკან მოყვანა სკოლის ავტობუსით, დაახლოებით 500 თურქული ლირა ჯდება (დაახლოებით 70 ლარი). ასევე თურქულ ბაღებში ცალკე ფულს კრებენ საკანცელარიო ნივთების, ლაშქრობებისა და ექსკურსიებისთვის.

თურქეთში კერძო საბავშვო ბაღებს კრეშს უწოდებენ. ასევე შეგიძლიათ იპოვოთ მონტესორისა და რეჯიოს სისტემით მომუშავე ბაღები, მაგრამ ისინი გაცილებით ძვირი დაჯდება.

საჯარო საბავშვო ბაღებში ბავშვებს 3 წლიდან იღებენ, კერძო საბავშვო ბაღებში კი შეგიძლიათ ბავშვი 2 წლის ასაკშიც მიაბაროთ. თურქეთში არ არსებობს ბაგა-ბაღები.

თურქეთში 5 წლის ასაკში ბავშვები სკოლის მოსამზადებელ კლასებში დადიან – მათ ანაოკულუ ჰქვია, 7 წლის ასაკში კი – სკოლაში გადადიან.

თურქეთში საბავშვო ბაღების სამუშაო საათები საკმაოდ სტანდარტულია. საჯარო ბაღები 16:00 საათამდე მუშაობენ. გარდა ამისა, არის ორი ცვლა: 9-დან ლანჩამდე და ლანჩიდან 16-მდე. კერძო ბაღები კი 9:00-დან 18:00 საათამდე მუშაობენ.

თურქეთში დეკრეტი მხოლოდ 4 თვე გრძელდება.ა ქალები აქ უპირატესად შვილებთან ერთად რჩებიან სახლში. არიან, რა თქმა უნდა, ისეთი ოჯახებიც, სადაც ბავშვის მოვლა ბებიებსა და დეიდებს ბარდება, დედები კი სამსახურში დადიან.

საინტერესოა, რომ თურქულ საბავშვო ბაღებში ბავშვებს არ აძინებენ. ბაღებს არ აქვთ საძინებლები. თუ გინდათ, რომ თქვენმა ბავშვმა საბავშვო ბაღში დაიძინოს, კერძო ბაღის მოძებნა მოგიწევთ.

თურქეთში ჰიგიენას ბევრად უფრო მარტივად უყურებენ. ყველაფერი დამოკიდებულია ბაღის ხელმძღვანელობასა და მასწავლებელზე. სადღაც ჰიგიენას მკაცრად იცავენ და მშობლებს ბახილების ჩაცმას ავალდებულებენ, სადღაც კი თვალს ხუჭავენ ბაღის სტუმრების დაუბანელ ხელებზე.

თურქულ საბავშვო ბაღში ღამის ქოთნის გამოყენებას ბავშვს არავინ ასწავლის, მაგრამ აქ არის ძიძა, რომელიც საჭიროების შემთხვევაში, ბავშვს პამპერსსაც გამოუცვლის და გულმოდგინედ დაბანს კიდეც. ინდივიდუალური სავარცხელი და პირსახოცი ბავშვებს იმ შემთხვევაში აქვთ, თუ მშობლები ამ ყველაფერს სახლიდან მოიტანენ.

რაც შეეხება ჯანდაცვის მუშაკებს, საბავშვო ბაღს ისინი არ ჰყავს. გაციებული ბავშვით აქ ვერავის გააკვირვებ. ბაღში არის პირველადი სამედიცინო დახმარების ნაკრები და თუ ბავშვს სიცხე აქვს, დამწევ საშუალებას მისცემენ, ხოლო თუ ბავშვმა რაიმე დაზიანება მიიღო, სასწრაფოსა და მშობლებს ერთდროულად გამოიძახებენ.

სახელმწიფო ბაღებში ორჯერადი კვებაა – საუზმე და ლანჩი, კერძო ბაღებში კი სამჯერადი. ეს განპირობებულია ბაღის სამუშაო გრაფიკით. ამავდროულად, ბაღებში არ არსებობს სპეციალურად შემუშავებული საბავშვო მენიუ.

ბაღებში იკვებებიან ისევე, როგორც სახლში. საუზმეზე აქვთ კიტრი, პომიდორი, ზეთისხილი და ყველი. ტიპური თურქული საუზმეა ბევრი ბოსტნეულითა და ახალი პურით. ზოგჯერ შეიძლება იყოს კვერცხი, კარაქი და ჯემი. ლანჩისთვის კი ყოველთვის არის წვნიანი და მეორე კერძი. მეორე კერძი საკმაოდ მრავალფეროვანია. ეს შეიძლება იყოს ლობიო ბრინჯით და სოიას კატლეტი, ჩაშუშული კომბოსტო, ისპანახი კვერცხით, ძეხვეული. თურქები ბევრ მაკარონსა და პურს მიირთმევენ.

თურქეთში სკოლისთვის ძირითადი სამზადისი 5-7 წლის ასაკში იწყება, როდესაც ბავშვები უკვე მიდიან ანაოკულში. საბავშვო ბაღში ისინი ბევრს ხატავენ, ძერწავენ, უყურებენ მულტფილმებს, სწავლობენ ანბანს, თვლას, გეომეტრიულ ფორმებსა და მათ გარშემო არსებულ სამყაროს, მაგრამ საკმაოდ მარტივი ფორმატით. თუ საბავშვო ბაღი კერძოა, შეიძლება ინგლისური ან სხვა ენა ასწავლონ.

სახელმწიფო ბაღში უცხო ენებს არ ასწავლიან. საჯარო საბავშვო ბაღებში დამატებითი გაკვეთილები გათვალისწინებული არ არის.

მაგრამ ის, რაც ხალხს ნამდვილად უყვარს თურქეთში, დღესასწაულებია. აქ აუცილებლად აღნიშნავენ ბავშვთა დღეს (23 აპრილი). როგორც წესი, ბავშვები ამ დღეს წითელ-თეთრებში არიან გამოწყობილი (თურქეთის დროშის ფერებში), ამბობენ ლექსებს, მღერიან ჰიმნს, აღნიშნავენ ათათურქის გარდაცვალებას წუთიერი დუმილით, ემზადებიან ბაირამისთვის. მაისში აღინიშნება დედის დღე. სასწავლო წლის დასასრულს კი ყოველთვის დიდი კონცერტია, რომელზეც ყველა ნათესავი იყრის თავს. მშობლებს შეუძლიათ, მონაწილეობა მიიღონ საკონცერტო კოსტიუმების მომზადებაში, ოღონდ მხოლოდ საკუთარი სურვილით. როგორც წესი, ყველაფერს აღმზრდელები ამზადებენ, მშობლები კი მხოლოდ საპატიო მაყურებლები არიან.

ამავე დროს, პარადოქსულია, რომ აქ მიუღებელია დაბადების დღის აღნიშვნა. თუმცა, ამ მხრივ ბავშვების დაბადების დღეები გამონაკლისია. მათ იხდიან საჩუქრების გარეშე. მაქსიმუმ შეგიძლიათ ბაღში ტორტის მოტანა.

სხვა ამბავია პიკნიკები, რომლებსაც საბავშვო ბაღები საკმაოდ ხშირად აწყობენ. მშობლებს შეუძლიათ სახლიდან მოიტანონ კერძები. აქ ყველა ერთად ილხენს. საბავშვო ბაღების ეზოები პატარაა, მაგრამ გასართობები მაინც აქვთ. ზოგიერთ ბაღს აქვს ბოსტანი და ბავშვებს მცენარეები მოჰყავთ.

ზოგადად, ბევრი რამ დამოკიდებულია კონკრეტულ ბაღზე და იქ მომუშავე ადამიანებზე. ყველა ბაღი განსხვავდება ერთმანეთისგან, თუ პიკნიკების სიყვარულს არ ჩავთვლით.

 

მოამზადა ირმა კახურაშვილმა

 

კომენტარები

მსგავსი სიახლეები

ბოლო სიახლეები

ვიდეობლოგი

ბიბლიოთეკა

ჟურნალი „მასწავლებელი“

შრიფტის ზომა
კონტრასტი