„დღემდე ჯერ მხოლოდ სამასი ისეთი ქალი მოუმზადებია, რომელნიც მასწავლებლად
არიან აქა თუ იქ, ან საკუთარი სახელოსნოები აქვთ გურია-სამეგრელოს სხვადასხვა
სოფელში. მოწაფენი ჰყავს გურია-სამეგრელოდან და ქართლ-კახეთიდანაც კი…“ – ეს
გახლავთ ამონარიდი იოსებ იმედაშვილის საუკუნის წინანდელი წერილიდან, რომლითაც მადლობას უხდის და წარმატებას უსურვებს ნოტიო ლოლუას სკოლასა და
მის მასწავლებლებს, რომლებიც მუყაითად და მხნეობით ემსახურებოდნენ ქალების
თვითმოქმედება-განვითარების საქმეს.
არც ამ ნომერში ვღალატობთ ჩვენს გადაწყვეტილებას, რომ დღეისთვის არსებული
ყველაზე აქტუალური და ყველაზე პროგრესული იდეებისა და საჭიროებების პასუხად
მაგალითები ჩვენივე წარსულიდან მოვიყვანოთ. დღეს ბევრს ვსაუბრობთ ქალთა ეკონომიკური გაძლიერების, ცოდნის ეკონომიკის, რეალურ ცხოვრებისეულ საჭიროებებზე
ორიენტირებული სკოლის შესახებ. ნოტიო ლოლუას სკოლა კი, გასული საუკუნის დასაწყისში, სწორედ ამ პრინციპებს ემსახურებოდა და რეალური ცვლილებებიც შეჰქონდა საზოგადოების განვითარებაში.ცვლილებები ვახსენეთ და – ამ ნომერში, ასევე, გაგაცნობთ იმ თეორიებს, რომლებიც დაგვეხმარება სასკოლო კულტურის განვითარებაში.
არაფორმალური განათლება ჩვენი საგანმანათლებლო რეფორმის ერთ-ერთი პრიორიტეტული მიმართულებაა. სწორედ ამიტომ გადავწყვიტეთ, გაგაცნოთ ის საერთაშორისო პოლიტიკური ჩარჩოები, რომელთა გათვალისწინებაც ევროინტეგრაციის გზაზე მდგარ ქვეყანას, განათლების ხარისხის გაუმჯობესების მიზნით, აუცილებლად სჭირდება.
ასევე, გაგაცნობთ კვლევას, რომელიც კიდევ ერთხელ დაგვაფიქრებს სკოლის გარეთ
არსებული რესურსების გამოყენების შესაძლებლობებზე.
ამ ნომერში კათედრების საქმიანობასთნ დაკავშირებული ძალიან წარმატებული
პროექტის შეჯამებასა და პროექტის მონაწილე სკოლების პრაქტიკულ გამოცდილებასაც გაეცნობით. სკოლის ავტონომიისა და გარე კონტროლის მექანიზმებთან დაკავშირებული სტატია დაგეხმარებათ, გადაავლოთ თვალი ამ მიმართულებით დაწესებულ
საკანონმდებლო რეკომენდაციებს.
და ბოლოს – დემოკრატია ჩვენი არჩევანია, რომლის შენებაშიც სკოლას უდიდესი
წვლილი მიუძღვის, სადაც ყველას თავისი როლი აქვს – მასწავლებელს, დირექტორს,
მშობელს. იმედი გვაქვს, მულტილინგვური ვებგვერდი www.living-democracy.com
და სპეციალურად ქართულენოვანი მკითხველისთვის მოცემული მასალა ღირებულ
დახმარებას გაგვიწევს ჩვენი სკოლის დემოკრატიულად მართვაში, შესაბამისად, საზოგადოების დემოკრატიულ განვითარებაში.
რედაქტორი : ნათია ნაცვლიშვილი
ნომრის ავტორები:
ლელა მახოხაშვილი, იოსებ იმედაშვილი, ბერიკა შუკაკიძე, სიმონ ჯანაშია, ჰელმუტ ფენესი, გია მურღულია, მორის დანდურიშვილი, ლალი ხაჩიძე, დენის წურწუმია, ნათია ნაცვლიშვილი,
ჟურნალის წაკითხვა და ჩამოტვირთვა შესაძლებელია ბმულიდან:
