პარასკევი, მარტი 29, 2024
29 მარტი, პარასკევი, 2024

ბოროტება ჩვენ მახლობლად

მსოფლიოს წამყვანი გაზეთები და ტელეარხები ხშირად საუბრობენ
„დაიშის” შესახებ. დასავლური პრესა ამ არაბული აკრონიმით ახლო აღმოსავლეთში მოქმედ
ტერორისტულ ორგანიზაციას – „ერაყისა და ლევანტის ისლამურ სახელმწიფოს” მოიხსენიებს.
საუბედუროდ, ისლამისტ მებრძოლთა გავლენა ჩვენი ქვეყნის საზღვრების მახლობლადაც ვრცელდება.
საქართველოდან რამდენიმე ასეულ კილომეტრზე თანამედროვე მსოფლიოს უდიდესი ტრაგედია თამაშდება.

რა არის „ისლამური სახელმწიფო”?

2003 წელს სადამ ჰუსეინის რეჟიმის დამხობის შემდეგ ერაყის
ხელისუფლების სათავეში შიიტები მოვიდნენ. შიიტური უმრავლესობის წარმომადგენლებმა ჩამოხრჩობილი
დიქტატორის მხარდამჭერი სუნიტები პოლიტიკური და სამხედრო ელიტის რიგებიდან განდევნეს.
სუნიტი ერაყელები წლების განმავლობაში ხელისუფლების მიერ დაღდასმულ და განდევნილ მოქალაქეებად
გრძნობდნენ თავს. შესაბამისად, უფუნქციოდ დარჩენილი ყოფილი მაღალჩინოსნები და გენერლები
ადვილად აღმოჩნდნენ რადიკალი ისლამისტების მხარეს. ისინი ერთად დაუპირისპირდნენ ოფიციალური
ბაღდადის სამხედრო ძალებს.

დაახლოებით იგივე მოხდა სირიაშიც. სირიას თითქმის უკვე
ნახევარი საუკუნეა ალავიტები, ერთ-ერთი შიიტური სექტის წარმომადგენლები მართავენ. ისინიც,
წლებია, მონდომებით ცდილობენ პოლიტიკური და ეკონომიკური პროცესისგან სირიელი სუნიტების
მარგინალიზებას. 2011 წელს „არაბული გაზაფხულის” ტალღამ სირიასაც გადაუარა. რადიკალი
ისლამისტები და სხვა ოპოზიციური ძალები ალავიტ დიქტატორ ბაშარ ალ-ასადს აუჯანყდნენ.
აჯანყება დღემდე გრძელდება და მის ორგანიზატორთა შორის გადამწყვეტ როლს ასადის მიერ
დევნილი სუნიტები ასრულებენ.

ოცდამეერთე საუკუნის ათიანი წლების დასაწყისში „ალ-ქაიდას”
ერაყული ფრთის ლიდერებმა წარმატებით მოახერხეს „ისლამური სახელმწიფოს” ქოლგის ქვეშ
ერაყელი და სირიელი აჯანყებულების გაერთიანება. ახალი კოალიციის პირველადი მიზანი ახლო
აღმოსავლეთის მთელ ტერიტორიაზე, ხმელთაშუა ზღვიდან ინდოეთის ოკეანემდე, ხალიფატის აღდგენა
გახლავთ. ხალიფატი ერთიანი ისლამური სახელმწიფო იქნება, რომელიც შარიათის კანონების
საფუძველზე ჩამოყალიბდება. გრძელვადიან პერსპექტივაში ისინი მთელი მსოფლიოს ისლამური
სამყაროს გაერთიანებაზე ფიქრობენ.

„დაიშს” უკვე უამრავ შემზარავ ფაქტზე ეკისრება პასუხისმგებლობა.
გავბედავ და მხოლოდ რამდენიმე მათგანს შეგახსენებთ.

გასულ ზაფხულს მთელი მსოფლიო ააღელვა ერაყის საკანონმდებლო
ორგანოს საგანგებო სესიაზე პარლამენტის ერთადერთი იეზიდი დეპუტატის, ვიან დახილის,
ემოციურმა გამოსვლამ.



მაშინ „ისლამური სახელმწიფოს” მებრძოლებმა ასობით ათასი
იეზიდი საკუთარი სახლებიდან გამოასახლეს
და დაახლოებით 40 000 მათგანი სინჯარის მთის მწვერვალზე შეიტყუეს. გზადაგზა ტერორისტები
ქალაქებსა და სოფლებს წვავდნენ, ადგილობრივ მოსახლეობას ხოცავდნენ და მოქალაქეებს შეწყალების
სანაცვლოდ „ერთადერთი ჭეშმარიტი ღმერთის” აღიარებას სთხოვდნენ (მას შემდეგ ისინი ყველა
დაპყრობილ ტერიტორიაზე ერთი და იმავე ულტიმატუმით ხელმძღვანელობენ:
მიიღეთ ისლამი, გადაიხადეთ გადასახადი, წინააღმდეგ შემთხვევაში ხმლით სიკვდილი გელით). მთებში გახიზნული იეზიდები და ერაყელი ქურთები
დღემდე მედგარ წინააღმდეგობას უწევენ დაიშელებს.

2015 წლის თებერვალში
„ისლამური სახელმწიფოს” სამიზნედ მორიგი რელიგიური უმცირესობა იქცა. ლიბიაში ჯიჰადისტებმა
ოცდაერთი ეგვიპტელი კოპტი, მონოფიზიტი ქრისტიანი დაატყვევეს და ვიდეოკამერების წინ
სიკვდილით დასაჯეს. კოპტების ერთადერთი „დანაშაულიც” მათი რელიგიური პოზიცია იყო.

გასულ კვირას ისლამისტმა
მებრძოლებმა მორიგი სისასტიკით გააოცეს მთელი სამყარო. მათ ასურეთის უძველესი სახელმწიფოს
ერთ-ერთი ქალაქი, ნამრუდი დაიპყრეს და გენოციდი მოუწყვეს მიმდებარედ მცხოვრებ ასურელებს.
„ისლამური სახელმწიფო” ადამიანების განადგურებას არ დასჯერდა – ნამრუდსა და მოსულში
მათ უმდიდრესი ადგილობრივი მუზეუმები დაარბიეს და გაძარცვეს.



მე რომ ისტორიის ან
სამოქალაქო განათლების მასწავლებელი ვიყო, მოსწავლეებთან ერთად აუცილებლად ვიმსჯელებდი
თანამედროვე მსოფლიოს ერთ-ერთი უდიდესი ბოროტების შესახებ. ასეთი მსჯელობა აუცილებელია
რეალური საფრთხის სათანადოდ აღსაქმელად და დაჩაგრული ჯგუფების აჯანყების მიზეზების
გასაცნობიერებლად.

კომენტარები

მსგავსი სიახლეები

ბოლო სიახლეები

ვიდეობლოგი

ბიბლიოთეკა

ჟურნალი „მასწავლებელი“

შრიფტის ზომა
კონტრასტი