მედიასა და ინფორმაციის მნიშვნელობაზე წინა სტატიაში უკვე ვისაუბრე. ჩემს მოსწავლეებს ამ საკითხთან დაკავშირებით გარკვეული გამოცდილება და მზაობა უკვე აქვთ. ის აქტივობა, რომელსაც ახლა შემოგთავაზებთ, გარკვეულწილად ეხმაურება ჩემს წინა სტატიას და მისი ერთგვარი გაგრძელებაა.
მოსწავლეებმა უკვე იციან, რომ რეკლამა ლათინური სიტყვაა და ყვირილს ნიშნავს. ის სხვა ადამიანებს, მომხმარებლებს მომსახურებისადმი ინტერესს უღვივებს, მოუწოდებს პროდუქციის ყიდვისკენ. რეკლამის ერთ-ერთი სახეობაა სოციალური რეკლამა. რა არის ეს? რეკლამა, რომლის მიზანია საზოგადოების ყურადღების კონცენტრირება რომელიმე პრობლემაზე, სოციალური რეკლამა გახლავთ.
გაკვეთილზე განვიხილეთ რამდენიმე სიტუაცია. მოსწავლეების გააქტიურების მიზნით დავსვი შეკითხვები:
- შესულხართ თუ არა სწრაფი კვების ობიექტში, მას შემდეგ, რაც მისი რეკლამით მოიხიბლეთ?
- რამდენჯერ გითხოვიათ მშობლისთვის იმ ნივთის შეძენა, რომელიც ტელევიზორში ნახეთ?
- გაგჩენიათ თუ არა სურვილი შესულიყავით სხვადასხვა წრეზე მას შემდეგ, რაც ის თქვენმა თანატოლმა შეგიქოთ?
კლასის გააქტიურების შემდეგ მოსწავლეებთან ერთად „მე და საზოგადოების“ სახელმძღვანელოში მოცემული სიტუაციები განვიხილე.
შეაფასეთ მოცემული რეკლამები:
- მოგინდებოდათ თუ არა ამ პროდუქტების ყიდვა?
- რას მიაქციეთ ყურადღება?
- რამდენად სანდოა ის?
ამის შემდეგ მოსწავლეებს შევთავაზე წყვილებში სამუშაო. მათ უნდა მოეფიქრებინათ სარეკლამო ტექსტი, ანუ დევიზი რეკლამისთვის:
ა) სკოლის ბიბლიოთეკისთვის;
ბ) სკოლის ეზოსთვის;
გ) სკოლის სპორტული მოედნისთვის.
ამის შემდეგ მოსწავლეებს გავაცანი ინფორმაცია სკოლის შესახებ, მისი გერბი, ჰიმნი, მიზანი. ჩამოვთვალეთ სკოლის ძლიერი მხარეები – რა მოგვწონდა, რას შევცვლიდით, რას ვისურვებდით მისი განვითარებისთვის.
ამ აქტივობის შემდეგ მოსწავლეებს შევთავაზე დავალება, რომლის ფარგლებშიც მათ უნდა მოეფიქრებინათ სკოლის რეკლამა. მივეცი საშუალება, ემუშავათ სურვილის მიხედვით: ინდივიდუალურად, წყვილებში ან ჯგუფურად.
დავალების შინაარსი: მოიფიქრეთ სკოლის მოკლე რეკლამა, რომელშიც ნათლად იქნება წარმოდგენილი –
- სკოლის დასახელება, მახასიათებელი ნიშნები (ემბლემა, ფორმა, გამოსახულება);
- სკოლის მიზნები, მისი პირობები, ძლიერი მხარე.
სამიზნე აუდიტორია: პირველკლასელები
რეკლამის ფორმა: აირჩიეთ ერთ-ერთი: ფოტო, ვიდეო, პლაკატი.
დავალების შესრულების შემდეგ მოსწავლეებმა გააკეთეს მისი პრეზენტაცია, რის შემდეგაც მოხდა მისი ანალიზი, რომელი რეკლამა გამოიყენეს (ტექსტური, მხატვრული, გრაფიკა თუ სხვა). ასევე ისაუბრეს ერთმანეთის ნამუშევრებზე, შეაფასეს და კითხვა-პასუხის რეჟიმში გაცვალეს მოსაზრებები.
გთავაზობთ მოსწავლეების ნამუშევრებს ვიდეოს სახით:
ასევე შექმნილ ნამუშევრებს:
ეს დავალება დაეხმარა მოსწავლეებს, გაეგოთ რეკლამის არსი, ესწავლათ მისი შექმნა და სხვისთვის გაზიარება. უშუალოდ სკოლის თემატიკის რეკლამაზე მუშაობა დაეხმარა მათ, მიეღოთ და მოეძიებინათ დამატებითი ინფორმაცია სკოლის შესახებ, გაიღრმავეს ცოდნა და მოახდინეს ცოდნის ერთგვარი რეფლექსია. ვფიქრობ, პირველკლასელებისთვის და მათი მშობლებისთვის შექმნეს არაჩვეულებრივი გზამკვლევი, რომელიც დაეხმარება მათ სკოლის არჩევაში. ბავშვებისგან მიღებული ინფორმაცია და შეფასება, ხომ ყველაზე გულწრფელი და საინტერესოა.
