ონლაინ სწავლებამ გაკვეთილების ჩატარების ფორმატის შეცვლა გვაიძულა. ზოგიერთ საგანში დისტანციურ სწავლებაზე მორგება შედარებით რთული აღმოჩნდა. ჩემთვის, მაგალითად, ასეთი იყო ფიზიკური აღზრდა. გთავაზობთ რამდენიმე აქტივობას, რომლებიც ფიზიკური აღზრდის გაკვეთილებზე გამოვიყენე.
ვივარჯიშოთ ერთად
თუ სკოლაში ვარჯიშობდით ერთად, რატომ არ შეიძლება, ეს დისტანციურ ფორმატშიც გაგრძელდეს? ამიტომ ერთ დღეს სპორტულად გამოვეწყვე, ხალიჩა გავშალე, ხმადაბლა ჩავრთე მუსიკა, ჩემი კომპიუტერი ოთახის კუთხეში დავდგი (რათა სივრცე კარგად გამოჩენილიყო) და მოსწავლეებს ვთხოვე, ჩემთან ერთად გაემეორებინათ მოძრაობები. ერთად ვარჯიში სახალისო აღმოჩნდა. ისეთი განცდაც კი გაგვიჩნდა, თითქოს ყველაფერი თითქოს ძველებურად იყო.
გარდა ამისა, მოსწავლეებს ეკრანის გაზიარების საშუალებით ვუზიარებ ვარჯიშის ვიდეოს, რომელიც ძალიან მოსწონთ. ვიდეოში წარმოდგენილ ვარჯიშებს მოსწავლეები იმეორებენ. ვარჯიშიდან ვარჯიშამდე ეძლევათ შესვენების საშუალებაც. ზოგჯერ ვარჯიშში ოჯახის სხვა წევრებიც ერთვებიან და ყველაფერი უფრო სახალისო გამოდის.
მოვიგონოთ თამაში
ფიზიკური აღზრდის ერთ-ერთ გაკვეთილზე ვისაუბრეთ თამაშის მნიშვნელობაზე. იმაზე, თუ რისგან შედგება ის, რა არის საჭირო იმისთვის, რომ თამაში შედგეს. მოსწავლეებმა აღნიშნეს, რომ მნიშვნელოვანია წესების დაცვა, რომ თამაშის შინაარსი ყველა წევრს უნდა ესმოდეს. გავიხსენეთ ყველა ის თამაში, რომელიც გვითამაშია და მოგვწონს. დავასახელეთ თამაშის მიზნები, რადგან ზოგიერთი თამაში გონებრივ განვითარებას ემსახურება, ზოგიერთი კი ფიზიკურს. ამ დისკუსიის შემდეგ ვთხოვე, მოეფიქრებინათ თამაში, შეედგინათ თამაშის ბარათი და გადაეღოთ ვიდეო. დავალების შესრულება შეეძლოთ როგორც ინდივიდუალურად, ისე ჯგუფურადაც. მოსწავლეების უმრავლესობამ დავალების ჯგუფურად შესრულება არჩია.
აი მათ მიერ მოფიქრებული რამდენიმე თამაშის ბარათები:
ვფიქრობ, ამ აქტივობას სკოლაში დაბრუნების შემდეგაც გამოვიყენებთ, ამჯერად – პრაქტიკაში და მთელ კლასთან. მოსწავლეებს საშუალება ექნებათ, ითამაშონ თავიანთი მოფიქრებული თამაშები.
საინფორმაციო გაკვეთილები და ონლაინ თამაშები
მნიშვნელოვანია, მოსწავლეებს ჰქონდეთ თეორიული ცოდნა სპორტის სხვადასხვა სახეობაზე, სპორტსმენებზე, ოლიმპიადებზე და ა.შ. ამისთვის საინფორმაციო გაკვეთილებს ვატარებ. წინასწარ შედგენილი პრეზენტაციის დახმარებით მოსწავლეებს ვაწვდი ინფორმაციას. მიღებული ცოდნის მიხედვით მათ ვთავაზობ თამაშებს, რომლებიც ასევე წინასწარ მაქვს შერჩეული. ეკრანის გაზიარებით ვრთავ თამაშს და მოსწავლეებს თეორიული ცოდნის გამოვლენის საშუალებას ვაძლევ. ამაში მეხმარება ჯგუფში ,,აქტივობები კლასში“ ჩემი კოლეგების მიერ განთავსებული რესურსები.
ვფიქრობ, გაკვეთილების მრავალფეროვნება ფიზიკურ აღზრდას აქცევს ერთ-ერთ იმ საგნად, რომელსაც მოსწავლეები მოუთმენლად დაელოდებიან.
