პარასკევი, მარტი 29, 2024
29 მარტი, პარასკევი, 2024

როგორ ვუშველოთ მოსწავლის შფოთვას

( რამდენიმე მარტივი რეკომენდაცია)

 

მეცადინეობის დროს შფოთვა ბავშვებში ძალიან ხშირია, ამის მიზეზი ბევრი რამ შეიძლება იყოს, იქნებ მეტისმეტად ბევრს ვითხოვთ ბავშვისგან? იქნებ შეცდომების შიში ჩვენ ჩავაგონეთ? იქნებ თვითშეფასების პრობლემა აქვს. დღემდე არ ვიცი, რატომ ნერვიულობს ასე ჩემი შვილი, გიორგი, წერითი დავალების შესრულებისას, რატომ განიცდის პატარა გადაცდომასაც კი.

ერთი შეცდომა თუ დაუშვა, დავალების დასრულების მოტივაცია საერთოდ უქრება. თითქოს არასდროს მომითხოვია მისთვის იდეალურობა, საუკეთესოდ და უშეცდომოდ წერა, თითქოს ყველა მის აქტივობას ვაქებ და ვაფასებ.  მგონია, კარგად ვიქცევი, მაგრამ…

მოკლედ, მიზეზების ძიება შორს წამიყვანს. ახლა ამ შფოთვის უბრალო, ადვილი წამლის გაზიარებას ვაპირებ, ზოგჯერ საიდუმლო უფრო მარტივია, ვიდრე წარმოვიდგენთ:

ეს ჩვეულებრივი, უბრალო კალამია, რომელსაც წაშლის ფუნქციაც აქვს. თურმე ჯადოსნურიცაა,  უცებ აგვარებს პრობლემას, აღარც შეცდომის შიშია და აღარც უსასრულო ზეგისთვის გადადებული დავალებები. გიორგი დამშვიდდა და  წერისგან სიამოვნებასაც იღებს. ასეა, ყოფით დეტალებს დააკვირდით, სწორედ დეტალებშია დამალული ცხოვრების მთავარი საიდუმლო.

 

2.

იქნებ იმიტომ შფოთავს, რომ გაგება უჭირს? იქნებ ამიტომაცაა მეცადინეობა მისთვის  ასეთი სტრესული? იქნებ გაამარტივებამ უშველოს? ყველა მოსწავლისთვის, განსაკუთრებით აუტიზმის სპექტრის დროს, ძალიან სასარგებლოა დაკონკრეტება, ვიზუალიზაცია, ილუსტრაციის, კოგნიტური რუკის, ფორმულის, ნახაზის შექმნა. არასდროს დაიზაროთ, დახატეთ მათემატიკისა თუ ფიზიკის ამოცანა, მოთხრობა თუ ისტორიის პარაგრაფი, რომელიმე საკითხი ბუნებაში თუ ექსპერიმენტი, ყოველთვის შედეგიანია!

 

ის, რაც თქვენთვის შეიძლება სულ არ იყოს პრობლემური, ბავშვისთვის ძალიან დიდი შფოთვისა და სტრესის მიზეზი შეიძლება აღმოჩნდეს. მაგალითად, თუ უთხარით, რომ ერთი საათის განმავლობაში უნდა წაიკითხოთ, ყოველი ზედმეტი წუთი გააღიზიანებს მას. თუ უთხარით, რომ ახლა ქართულის სამეცადინოდ ჯდებით, არ დააწერინოთ მას მათემატიკა და ა.შ. ეს ძალიან მნიშვნელოვანია მათთვის.  ასევე, თუ შემთხვევით ადრე დაასრულა მეცადინეობა, ნუ დაუმატებთ ახალ მასალას. დაე,  როგორც უნდა ისე გამოიყენოს, თავისუფალი დრო, რომელიც მოიპოვა.

 

  1. მშვიდად ხართ, როცა ბევრი სამუშაო გაქვთ? როცა დედლაინები გახრჩობთ, ყველაფრის მოსწრებას ცდილობთ და ვერ ახერხებთ? არც ისე, ხომ მართალია?

ახლა წარმოდგინეთ, რომ თქვენი მხრები კიდევ უფრო სუსტია, კონცენტრაცია გიჭირთ, მეგობრებთან თამაშს ეშურებით, ისედაც სამსახურში  დაიღალეთ. კარგით, სამსახურში არა, სკოლაში.

მოკლედ, ბავშვი ხართ, რომელსაც უამრავი სამეცადინო აქვს, დრო კი- ცოტა. არადა, დავალების გარეშე სკოლაში მისვლის უფლებას თქვენი პასუხისმგებლობის გრძნობაა არ მოგცემთ. მოკლედ, შფოთავთ, ვერ ისვენებთ, დაძინება გიჭირთ.

სასკოლო შფოთვის მიზეზი შეიძლება დიდი მოცულობის საშინაო დავალებაც იყოს. ამიტომ მასწავლებლებმა ამას ყურადღება უნდა მიაქციონ.

 

 

 

კომენტარები

მსგავსი სიახლეები

ბოლო სიახლეები

ვიდეობლოგი

ბიბლიოთეკა

ჟურნალი „მასწავლებელი“

შრიფტის ზომა
კონტრასტი