მშობლები და მასწავლებლები რეგულარულად ხვდებიან სპეციალური საჭიროების მქონე ბავშვებს, რომლებსაც აქვთ, მაგ. სწავლის პრობლემები, ემოციური დარღვევები ან ფიზიკური პრობლემები. ეს შეხვედრები შეიძლება ბევრ მშობელს აშინებდეს. შეხვედრისას სიმშვიდისა და ფოკუსირების შენარჩუნება მისი პროდუქტიულობის საწინდარია.
ქვემოთ მოცემულია 10 რჩევა მშობლებისათვის მასწავლებელთან შეხვედრისას.
- მოითხოვეთ შეხვედრა სკოლის საათებამდე ან მათ შემდეგ. მასწავლებლები დღის განმავლობაში ხშირად დაკავებული არიან, თავისუფალ პერიოდებშიც კი. ისინი დამატებით დროს შეიძლება იყენებდნენ საკლასო სამუშაოების შესაფასებლად, საშინაო დავალებების შესამოწმებლად ან სხვა მშობლების მეილებზე საპასუხოდ. მასწავლებელთან შეხვედრისას თქვენ დარწმუნებული უნდა იყოთ, რომ არაფერი შეგიძლით ხელს. შეხვედრების დანიშვნა მოსწავლეების მოსვლამდე ან მათი წასვლის შემდეგ საშუალებას აძლევს მასწავლებელს, მთელი ყურადღება თქვენ დაგითმოთ.
- თუკი რაიმე გაშფოთებთ, დაუყოვნებლივ მოითხოვეთ შეხვედრა, ნუ დაელოდებით მომდევნო დაგეგმილ შეხვედრას. სკოლაში პრობლემები უმალ იზრდება, როგორც კი ყურადღებას მოადუნებთ. მაშინვე, როგორც კი შეხვედრის საჭიროებას იგრძნობთ, დაუკავშირდით მასწავლებელს და შესთავაზეთ შეხვედრა. მასწავლებლები მოხარული იქნებიან, გაგესაუბრონ და თქვენთან ერთად მიიღონ გადაწყვეტილება, სანამ სიტუაცია შესამჩნევ პრობლემად იქცევა.
- ზუსტად განსაზღვრეთ მიზეზი, რატომ გსურთ შეხვედრა. თუკი არსებობს სპეციფიკური პრობლემა, შეხვედრის დანიშნულებაა საკითხზე ყურადღების გამახვილება და გონებრივი იერიშით გადაწყვეტის სხვადასხვა გზის მოძიება. წარმოიდგინეთ, რომ შეხვედრა ეხება საერთო აკადემიურ ან ქცევის პრობლემებს. ამ შემთხვევაში, გამოიყენეთ დისკუსია, რათა შეიმუშაოთ სტრატეგიები სკოლისა და სახლისათვის, ბავშვს რომ დაეხმაროთ. იმის ზუსტად ცოდნა, თუ რატომ გსურთ შეხვედრა, დაგეხმარებათ უკეთ ფოკუსირდეთ გადაწყვეტის გზების მოძიებაზე.
- მოამზადეთ მასწავლებელი შეხვედრამდე. გაუგზავნეთ შეტყობინება, მეილი ან გაესაუბრეთ ტელეფონზე, რათა შეატყობინოთ თქვენი შფოთვის მიზეზი და საშუალება მისცეთ, შეაგროვოს ინფორმაცია ან დააკვირდეს სიტუაციას თქვენთან შეხვედრამდე. როდესაც ორივე მხარე წინასწარ ემზადება, დისკუსიაც უფრო ფოკუსირებულია.
- მოემზადეთ შეხვედრისათვის. გაესაუბრეთ ბავშვს შეხვედრამდე, რათა გაიგოთ მისი აზრი. თუკი პრობლემა აკადემიურია, მოაგროვეთ საშინაო ან სასკოლო დავალებების ფრაგმენტები, რათა უკეთ შეძლოთ თქვენი პრობლემის ახსნა. თუკი პრობლემა უფრო ქცევას უკავშირდება, ჰკითხეთ ბავშვს, რა ხდება, რათა გაარკვიოთ, რატომ იქცევა ასე.
- ჩამოწერეთ კითხვები. მარტივად შეიძლება, დაგავიწყდეთ ყველაფერი, რაზე საუბარსაც მასწავლებელთან აპირებთ. კითხვების ჩამოწერა დაგეხმარებათ, შეინარჩუნოთ ფოკუსი. არაფერია იმაზე გამაღიზიანებელი სახლში მისვლისას რომ იტყვი – „აი, კიდევ რისი კითხვა მინდოდა!“.
- გაუზიარეთ ინფორმაცია თქვენი შვილის შესახებ, რათა დაეხმაროთ მასწავლებელს. მასწავლებლები აფასებენ, როდესაც იციან „შიდა“ ინფორმაცია თავიანთი მოსწავლეების შესახებ, რათა დაეხმარონ მათ წარმატების მიღწევაში. მაგ. თქვენ შვილს კრეატიული იდეები ხმამაღლა საუბრისას მოსდის, თუ წყნარ გარემოში უკეთ მუშაობს? მსგავსი ინფორმაციის გაზიარება მასწავლებელს აძლევს ინფორმაციას საკლასო სტრატეგიების შესამუშავებლად.
- დაგეგმეთ მომავალი შეხვედრები. რაც არ უნდა იყოს საწყისი შეხვედრის მიზეზი, თქვენ გექნებათ სურვილი, თვალ-ყური ადევნოთ სიტუაციის განვითარებას. საუბრისას განიხილეთ, როგორ გეგმავთ მასწავლებელთან რეგულარულ კომუნიკაციას. ეს შეიძლება იყოს ყოველდღიური ან ყოველკვირეული მეილი ან ყოველკვირეული მოკლე სატელეფონო ზარი. კარგი იქნება, თუკი ერთად გადაწყვეტთ მომავალი კომუნიკაციის მეთოდსა და სიხშირეს.
- იყავით მშვიდი და ფოკუსირებული შეხვედრის განმავლობაში. მართალია, ყველა მშობელი ემოციურია საკუთარ ბავშვზე საუბრისას, მაგრამ შეხვედრისას სიმშვიდის შენარჩუნება მნიშვნელოვანია. როგორც წესი, მოთმინების დაკარგვა კონტრპროდუქტიულია და იწვევს შეხვედრის ორივე მონაწილის მიერ თავდაცვითი პოზიციის მორგებას. თუ არ ხართ დარწმუნებული, რომ სიმშვიდეს შეინარჩუნებთ, სთხოვეთ ვინმეს წამოგყვეთ, რათა დაგეხმაროთ შეხვედრისას.
- პატივი ეცით მასწავლებლის შესაძლებლობას და როლს, რომელსაც ის თამაშობს თქვენი შვილის ცხოვრებაში. მასწავლებლები თქვენი პარტნიორები არიან თქვენი შვილის განათლებაში. მოეპყარით მასწავლებელს პატივისცემით და ისიც პატივისცემით გიპასუხებთ.
ძალიან ხშირად, მშობლები მხოლოდ მაშინ ეკონტაქტებიან მასწავლებლებს, როდესაც მწიფდება პრობლემა და ემოციური დაძაბულობა. გამონახეთ დრო შეხვედრებს შორის, რათა გაესაუბროთ მასწავლებელს. თუკი შვილი გიყვებათ, რომ მასწავლებელი მას დაეხმარა წარმატების მიღწევაში, ან მისმა რომელიღაც ქცევამ თავი კომფორტულად აგრძნობინა, გაუგზავნეთ მასწავლებელს სამადლობელი შეტყობინება. შეგიძლიათ იფიქროთ მოხალისეობაზე საკლასო ოთახში (ეს შეიძლება იყოს დოკუმენტაციის შევსება, დამხმარე მასალის დალაგება, კარადების დასუფთავება). მასწავლებელი დააფასებს თქვენს ძალისხმევას და შეიძლება, მოგეცეთ მასთან პირისპირ საუბრის შესაძლებლობა. მასთან ურთიერთობის დამყარება და თქვენი შვილის განათლებაში ჩართულობა შეიძლება დაეხმაროს თქვენს შვილს კლასში წარმატების მიღწევაში.
