პარასკევი, მარტი 29, 2024
29 მარტი, პარასკევი, 2024

წიგნის ყდის გარეშე – ლიტერატურული გამოძიება და სახალისო აქტივობები  ლიტერატურის გაკვეთილზე

ზაფხულობით, როცა ჩემი თანატოლები მთაში თუ ზღვაზე, ბებია-ბაბუასთან სოფელში თუ საზღვარგარეთ მიდიოდნენ, ჩემი არდადეგებიც იწყებოდა. ამისთვის სულ რამდენიმე კილომეტრი უნდა გამევლო მეზობელ უბნამდე. იქ, ერთ ქუჩაზე, 41 და 49 ნომრებში, ჩემი მშობლების მშობლები, ჩემი ბიძები, ბიცოლები და ბიძაშვილები ცხოვრობდნენ. ეს იყო ჩემი არდადეგების ერთადერთი ადგილი.

აბა, ჩემნაირი წიგნის ჭიის ზაფხული უწიგნოდ როგორ ჩაივლიდა? ჰოდა, იქაც მქონდა ჩემი საიდუმლო გამოქვაბული – ბებიაჩემის წიგნების კარადა და პატარა ოთახი დიდი ტახტით, სადაც ამ წიგნებს ვკითხულობდი.

ბევრი რამ იყო იქ, ბულვარული რომანებით დაწყებული, „ცისკრისა“ და „საუნჯის“ ნომრებით გაგრძელებული და საბჭოთა ენციკლოპედიის ტომებით დასრულებული. იქ წავიკითხე ჩემი პირველი ჰემინგუეი, ჯოისი და კიდევ ბევრი სხვა.

ერთი წიგნი განსაკუთრებით მახსოვს. უსინათლო ბიჭისა და მისი კეთილი მეგობრების ამბავი იყო, რომლებმაც ბიჭს დიდი ხნის ოცნება აუსრულეს და ზღვაზე წაიყვანეს.

წიგნის არც ავტორი ვიცოდი და არც სათაური, ისე, უსათაუროდ მიყვარდა. მერე, დიდი ხნის მერე ერთ-ერთ ფორუმზე დავსვი კითხვა, ასეთი წიგნი ხომ არ იცით, ვისია და რა არის-მეთქი? და ვიღაც ჩემზე ჭკვიანმა მომწერა, იტალიელი მწერლის მარჩელო არჯილის „სანლორენცოელი ბიჭებიაო“, წიგნი, რომელმაც ცრემლებიც გვარიანად მაღვრევინა და სიხარულითაც ბევრჯერ გამაღიმა.

უყდო წიგნი – რა შეიძლება იყოს უფრო კარგი საშუალება წარმოსახვის გასავარჯიშებლად და, რაც მთავარია, საინტერესო სასკოლო პროექტის დასაგეგმავად?

(აქვე – ერთი შენიშვნა: თუ უყდო წიგნი არ გაქვთ, ყდას ნუ მოახევთ, უბრალოდ რამე შემოაკარით, რომ წარწერები დაიფაროს).

პროექტის იდეა წიგნის „დაბინავება“ და თავიდან ბოლომდე აღჭურვაა, ანუ ავტორისა და სათაურის გამოცნობა ენის, პერიოდის, თემატიკის, ჟანრის მიხედვით, გარეკანის ილუსტრაციის შექმნა, მისი მომზადება, წიგნის აკინძვა და სკოლის ბიბლიოთეკაში „დაბინავება“.

  1. შეარჩიეთ წიგნი, დაავალეთ მოსწავლეებს რომელიმე უყდო წიგნის მოძებნა, ოღონდ გააფრთხილეთ, რომ ამ პროექტისთვის წიგნს ყდა არ მოახიონ. თუ შესაფერისი ვერაფერი აღმოაჩინეთ, წინასწარ შერჩეულ წიგნს ისეთი გადასაკრავი გადააკარით, რომელიც მთლიანად დაფარავს ყდას.
  2. წინასწარ წაიკითხეთ წიგნი და მოსწავლეებს მოუყევით, რაზეა ის, ვინ არიან პერსონაჟები, რომელ დროში ხდება მოქმედება, როგორ ვითარდება სიუჟეტი და სხვა.
  3. ამოარჩიეთ ტექსტის ეპიზოდები და მოსწავლეებთან ერთად წაიკითხეთ, იმსჯელეთ ენაზე, მეთოდზე, ხომ არ მიგანიშნებთ გამომსახველობითი საშუალებები იმაზე, რომელ ეპოქაში მოღვაწეობდა ავტორი?
  4. წინასწარ მოამზადეთ 5 საიდუმლო მინიშნება, რომლებსაც წიგნში ჩადებთ. ამან მოსწავლეები ავტორის წარმომავლობასთან, ნაწარმოების დაწერის დროსთან, ჟანრსა და სხვა მახასიათებლებთან უნდა მიიყვანოს.
  5. როდესაც წიგნს გამოიცნობთ, მოამზადეთ პრეზენტაცია ამ წიგნის გარეკანის გამოსახულებით, იმსჯელეთ ყდის მხატვრობაზე. თუ წიგნის რამდენიმე გამოცემა არსებობს, პრეზენტაცია კიდევ უფრო მრავალფეროვანი გამოვა.
  6. შეიმუშავეთ ყდის თქვენეული ინტერპრეტაცია, დახატეთ, შექმენით აპლიკაცია, რომელიმე კომპიუტერულ პროგრამაში ააწყვეთ ყდა და ა.შ.

კომენტარები

მსგავსი სიახლეები

ბოლო სიახლეები

ვიდეობლოგი

ბიბლიოთეკა

ჟურნალი „მასწავლებელი“

შრიფტის ზომა
კონტრასტი