სწავლების პროცესში თავადაც დააკვირდებოდით, რომ იმას, რასაც მოსწავლეები ხედავენ, თვალით აღიქვამენ, ტექსტებს, რომელთაც ილუსტრაცია ახლავს, საკითხებს, რომელიც ვიზუალური ნაწილით არის წარმოდგენილი, უკეთ სწავლობენ. მხედველობითი მეხსიერება სწავლის პროცესში უმნიშვნელოვანესი ინსტრუმენტია, ხოლო როდესაც საქმე აუტიზმის მქონე ბავშვებს ეხება, ვიზუალური ნაწილი, გრაფიკები, კოგნიტური სქემები თუ ილუსტრაციები უბრალოდ შეუცვლელია.
გიცდიათ შეგექმნათ ვიზუალური გრამატიკა, როგორც სასწავლო რესურსი? სხვადასხვა თამაშზე უკვე მომიყოლია, ახლა კიდევ რამდენიმე მაგალითს გაჩვენებთ, თქვენ დანარჩენი მოიფიქრეთ.
- ფონეტიკა და სიტყვის შედგენილობა, მარცვალი
მოსწავლეებს ხშირად უჭირთ ხოლმე დამარცვლა და გადატანისას შეცდომებსაც უშვებენ, ამასთანავე, საწყის ეტაპზე მარცვლებისგან სიტყვების შედგენაც საჭირო და აუცილებელი უნარია.
ამისთვის პლასტმასის პატარა ბურთებს დავაკრათ მარცვლები, შეგიძლიათ სათამაშო ლოტოტრონიც გამოიყენოთ ან უბრალოდ ტომარაში ჩაყაროთ ბურთები და შემდეგ ჯერ მარცვლებისგან სიტყვები შეადგენინოთ და მერე შედგენილი სიტყვების დაშლა ასწავლოთ.
- პუნქტუაციური სტიკერები
სასვენი ნიშნების სწორად დასმა მოუგვარებელი პრობლემააა, სცადეთ და პუნქტუაციის სტიკერები გამოიყენეთ, ამისთვის, ორმაგი წებოვანი ლენტი და მრგვალ, პატარა ქაღალდის წრეებზე დაწერილი პუნქტუაციის ნიშნები დაგჭირდებათ, რომელთაც დავალების შემოწმების დროს თუ საკლასო დავალებისას კარგად გამოიყენებთ.
- გეომეტრიული ფიგურები
თვალსაჩინოებისათვის მეტყველების ნაწილებს გამოვსახავთ სხვადასხვა გეომეტრიული ფიგურით, მაგალითად, არსებითი სახელი კვადრატი იქნება, ზმნა – წრე და ა.შ. წინადადების შედგენისას, უკვე წინასწარ დახაზულ გეომეტრიულ მიმდევრობაში ჩასვამთ მნიშვნელობებს, შეცვლით სიტყვებს და ერთგვარ რებუსებს თუ გრამატიკულ განტოლებებსაც მოამზადებთ.
- თამაში წინადადებით
წინადადება ენის ათვისების, ენობრივ სივრცეში თავისუფლად მოძრაობის, ენის სწორად გამოყენების პროცესში უმთავრესი შემადგენელია. როგორია წინადადების სტრუქტურა და სახეები, წინადადების წევრები, სიტყვათა რიგი წინადადებაში და სხვა, წინადადებით სწორი „თამაში“ დაწყებით კლასებში ნიშნავს, რომ მას უფრო კარგად გავიგებთ და ვისწავლით სწავლების მაღალ საფეხურზე.
წინადადებით თამაშისთვის შეგვიძლია გამოვიყენოთ ბევრი რამ, მაგალითად, სათამაშო კუბები, ლეგოს კონსტრუქტორი.
ბავშვები იზრდებიან და სხვადასხვაგვარი კონსტრუქტორი, რომლითაც თამაშობდნენ, აღარ აინტერესებთ. შეგვიძლია ეს სათამაშოები სასწავლო რესურსად ვაქციოთ. სათამაშო კუბებზე დავაწებოთ მეტყველების ნაწილების, წინადადების წევრების დასახელებები და, ასევე, სხვადასხვა სიტყვები, აუცილებელია, რომ მეტყველების არცერთი ნაწილი არ გამოგვრჩეს. შემდეგ ამ კუბებით ავაშენებთ წინადადებებს და განვიხილავთ მორფოლოგიური თუ სინტაქსური კუთხით.
- ზმნისწინებისა და თანდებულების ლაბირინთები:
ლაბირინთები და თავსატეხები ძალიან უყვართ ბავშვებს, სცადეთ, მათთან ერთად მოამზადოთ სამაგიდო თამაში- ლაბირინთი, სადაც დაბრკოლების გადალახვას ზმნისწინებისა და თანდებულების საშუალებით შეძლებთ. მაგალითად, მოთამაშეს აქვს ოთხი ბარათი- ერთზე უზმნისწინო ფორმაა, მეორეზე ზმნისწინი, მესამეზე- სახელი, მეოთხეზე-თანდებული- მოძრაობას აგრძელებს ის, ვისაც გაუმართლებს და გრამატიკულად სწორ ფორმას შექმნის.
- „ჯენგა“ საგაკვეთილო რესურსად
გამოკითხვა ხშირად სტრესულია ბავშვებისთვის, ამ შემთხვევაში, შეგიძლიათ მხიარული თამაში „ჯენგა“ გამოიყენოთ. ყოველ ცალკეულ ხის დეტალზე დააწერეთ საკითხი თუ კითხვა, რომელსაც მოსწავლემ უნდა უპასუხოს. „ჯენგა“ გამოგადგებათ სამეტყველო თამაშებისას, დიალოგების, წინადადების ასაწყობად. თუ სხვადასხვა ლექსიკურ ერთეულებს დააწერთ, ერთგვარ ხის „ლექსიკონს“ მიიღებთ, მოსწავლეს დაავალეთ, განმარტოს სიტყვა, რომელიც შეხვდა, გრამატიკული, ლექსიკური თუ სხვა კუთხით.
- ჩემი გრამატიკული CV
ამ აქტივობით რამდენიმე კურდღელს დაიჭერთ, ჯერ ერთი, საჭირო ცნებებს გაააქტიურებთ და თეორიულ მასალას პრაქტიკულით განამტკიცებთ მეორე, მოსწავლეებს საკუთარი ავტობიოგრაფიის მომზადებას, აწყობას, ინფორმაციის დახარისხებას ასწავლით.
გრამატიკული CV
ვინ? ( მე, სახელი, გვარი)
რა? ( რა საგანი მიყვარს? რა იქნება ჩემი სამომავლო პროფესია?)
როგორი? ( როგორი ვარ, ხასიათი, გარეგნობა)
სად? ( ქვეყანა, ქალაქი)
როგორ? ( როგორ ვატარებ თავისუფალ დროს, როგორ ვერთობი?)
და ასე ბოლომდე, სანამ თქვენთვის საინტერესო საკითხებს არ მოიცავთ ბოლომდე.
