პროფესიული განათლება ერთ-ერთი ყველაზე დინამიკური და ცვალებადი მიმართულებაა განათლების სისტემაში. დინამიკურობასა და ცვალებადობას განაპიროებებს შრომის ბაზრის ის ტენდენციები, რომლებიც სწრაფად იცვლება და ეკონომიკის საჭიროებებს ერგება.
პროფესიული განათლება იმითაც არის განსაკუთრებული, რომ მას ბევრი აქტორი და დაინტერესებული მხარე ჰყავს: სახელმწიფო სექტორი, კერძო სექტორი, პროფესიული განათლების მიღების მსურველი, ზრდასრული საზოგადოება. სხვაგვარად რომ ვთქვათ, პროფესიული განათლება საზოგადოების ყველა ფენის ინტერსსა და საჭიროებებს მოიცავს.
ელექტრონული ჟურნალი „პროფესიული განათლება“ მნიშვნელოვან როლს შეიტანს საზოგადოების ინფორმირებულობასა და პროფესიული სწავლების მნიშვნელობის გააზრებაში. როგორც აღვნიშნეთ, პროფესიულ განათლებას ბევრი დაინტერესებული მხარე ჰყავს, რაც ელექტრონულ ჟურნალს განსაკუთრებული გამოწვევის წინაშე აყენებს. მან უნდა შეძლოს, ყველა მხარის ინტერესს უპასუხოს. ამ კომუნიკაციაში ორი მთავარი გზავნილი დომინირებს: პირველი გზავნილის სამიზნე არის მოზარდი ან ზრდასრული, უბრალოდ პროფესიული განათლებით დაინტერესებული პირი – შეძლოს, იპოვოს ის პროფესია, რომელიც უყვარს, აინტერესებს და სურს, გახდეს პროფესიონალი. მეორე გზავნილი კი კერძო სექტორისთვისაა – იპოვოს მისი ბიზნესის განვითარებისთვის აუცილებელი პროფესიონალი კადრი. კერძო სექტორს პროფესიულ განათლებასთან თანამშრომლობა ეხმარება, მოიძიოს ისეთი კადრი, რომელიც მას ორგანიზაციული განვითარებისთვის ესაჭიროება. თანამშრომლობა კერძო სექტორსა და საჯარო სექტორს შორის ურთიერთნდობას აძლიერებს. ჟურნალი, კერძო-საჯარო სექტორებს შორის დიალოგი ამ ნდობის გაღრმავებას შეუწყობს ხელს.
პროფესიული განათლების უკეთესი კოორდინაციისთვის, გაეროს პროგრამისა და შვეიცარიის მთავრობის მხარდაჭერით, პროფესიული უნარების სააგენტო დაფუძნდა. სააგენტო პროფესიულ განათლებაში ყველა აქტორის ჩართულობაზე იზრუნებს. მის პრიორიტეტულ მიმართულებათაგან ერთ-ერთი შრომის ბაზრის შესაბამისი პროგრამების იდენტიფიცირება, მომზადება და შემდეგ ამ პროგრამებით მომზადებული პროფესიონალების დასაქმების ხელშეწყობაა. მით უფრო წარმატებულია პროფესიული განათლება, რაც უფრო წარმატებულია პროფესიული სტუდენტი ჯერ სასწავლებელში და სწავლის დასრულების შემდეგ – შრომის ბაზარზე. ადამიანის, მოქალაქის კეთილდღეობა პროფესიული განათლების უმთავრესი მიზანია.
ჟურნალი ხელს შეუწყობს დაინტერესებულ მხარეებს, გამოხატონ პოზიცია, მოქალაქეს – მიიღოს რელევანტური ინფორმაცია და დაგეგმოს საკუთარი პროფესიული მომავალი, პროფესიულ მასწავლებელს – მიიღოს და გააზიაროს სასწავლო რესურსები, ადმინისტრაციულ პერსონალს – ჰქონდეს წვდომა მართვის თანამედროვე და ინოვაციურ მეთოდებზე, ბიზნესს – გაარკვიოს, როგორ და სად ითანამშრომლოს პროფესიულ განათლებასთან, მშობლებს – იცოდნენ, რა შესაძლებლობებს სთავაზობს პროფესიული განათლება მათ შვილებს, ზრდასრულებს – გაიღრმავონ პროფესიული ცოდნა ან შეიცვალონ პროფესია, გაიფართოონ ინტერესის სფერო.
ჩვენ გვინდა, ხმა მივაწვდინოთ ყველას, ვისაც აქვს სურვილი, მუდმივად ვითარდებოდეს.
ჟურნალ “პროფესიული განათლების” წაკითხვა და ჩამოწერა შესაძლებელია ბმულიდან:
სიახლეების გაცნობა შესაძლებელია აქ :
https://www.facebook.com/vetgeorgia
