თანამედროვე თაობა მრავალფეროვან სამყაროში ცხოვრობს, ამიტომ მრავალფეროვანი უნარ-ჩვევები სჭირდება მასში წარმატებული ინტეგრაციისთვის. ბავშვებისთვის მოსაწყენია ინფორმაციის მიღება ლექციის სახით. როცა ისინი თავად აქტიურობენ მის შეკრების პროცესში, შედეგიც უკეთესია.
პროექტი, რომლის შესახებაც მინდა მოგიყვეთ, ჩემს მეოთხეკლასელებთან განვახორციელე, თუმცა მისი ფორმატი საშუალებას იძლევა, უფროსკლასელებსაც შევთავაზოთ. მას შემდეგ, რაც წინა ორი წლის განმავლობაში ჩვენს კლასში წარმატებით განხორციელდა პროექტი „ის, რაც ჩვენ გვაინტერესებს“, რომლის შეს ახებაც უკვე მოგიყევით ერთ-ერთ სტატიაში როგორ ვაქციოთ მოსწავლის ინტერესები სასწავლო პროექტადსაჭიროდ მივიჩნიე, მასში მცირედი ცვლილება შეგვეტანა, რათა მოსწავლეებისთვის მოსაწყენი არ ყოფილიყო ამ პროექტში მონაწილეობა. ბავშვებს შევთავაზე, რომ, ვინაიდან ორი წლის განმავლობაში თითოეული მათგანის ინტერესთა სფეროს გავეცანით, მასზე შეკრებილი ინფორმაცია მოვისმინეთ, ახლა სასკოლო საზოგადოების ინტერესთა სფერო გამოგვეკვლია და ამაზე შეგვეკრიბა ინფორმაცია. სახელი მოსწავლეებთან ერთად შევარჩიე – პროექტს დავარქვით „ის, რაც სასკოლო საზოგადოებას აინტერესებს“.
პირველ ეტაპზე მოსწავლეებს ინდივიდუალურად უნდა ჩაეტარებინათ ერთგვარი კვლევა, შეერჩიათ ხუთი სასურველი რესპონდენტი, აუცილებლად სკოლის კედლებში, და ჩაენიშნათ თითოეული მათგანის პასუხი კითხვაზე: რა აინტერესებს. გამოკითხეს პარალელურკლასელები, თანასკოლელები, მანდატურები, დარაჯები, დამლაგებლები, ადმინისტრაცია, მოკლედ, ვისაც ვინ უნდოდა. ჩაინიშნეს მათი ინტერესის სფეროები.
მეორე ეტაპზე მოსწავლეები გაერთიანდნენ ჯგუფებად (თითოეულში – 4 მოსწავლე). განიხილეს შეგროვებული პასუხები, სულ – 20 ცალი (რადგან თითოეულს 5 ადამიანისგან ჰქონდა მიღებული პასუხი). მსგავსი პასუხები გააერთიანეს და ჩამოაყალიბეს ერთი თემა, იმ სფეროზე, რომელიც მიღებულ პასუხებში ყველაზე მეტჯერ ფიგურირებდა.
მესამე ეტაპზე თითოეულმა ჯგუფმა შეაგროვა ინფორმაცია შერჩეული თემის შესახებ. დაიწყეს მზადება საბოლოოდ წარდგენისთვის.
მეოთხე ეტაპზე გაიმართა პრეზენტაცია, რომელზეც მოწვეულნი იყვნენ არა მარტო თანაკლასელები, არამედ ის ადამიანებიც, რომლებიც გამოკითხეს.
პროექტი თავისი ფორმატით საინტერესო აღმოჩნდა მოსწავლეებისთვის. სასკოლო საზოგადოების პასუხებიდან გამომდინარე, შეირჩა საინტერესო თემებიც:
- „წარმატებული, მშვიდობიანი, ბედნიერი ცხოვრება, სადაც ბავშვები დაცულნი არიან“.
- „რა არის განათლება და გვადგება თუ არა პროფესიის არჩევისას?“ (ყურადღება მახვილდება შემდეგ პროფესიებზე: დანტისტობა, მომღერლობა, დიზაინერობა, მხატვრობა)
- სწავლის აქტიური სახეები (ცეკვა, კარატე…)
- „კოსმოსის უცნაური ამბები“
- „ზოგადი განათლება“
- მუსიკის როლი სპორტში (კალათბურთი, ფეხბურთი)
- „ცეკვის სიკეთეები“
- „ჟურნალისტების როლი მოდის, სპორტისა და ხელოვნების განვითარებაში“
აღსანიშნავია, რომ პრექტის ფარგლებში მოსწავლეებს უნდა მოეწვიათ ერთი ან ორი ისეთი სტუმარი, რომელიც კომპეტენტურად მიაჩნდათ იმ სფეროში, რომელსაც მათი პრეზენტაცია ეხებოდა. მაგალითად, გუნდმა, რომელსაც ჰქონდა თემა „წარმატებული, მშვიდობიანი, ბედნიერი ცხოვრება, სადაც ბავშვები დაცულები არიან“, სტუმრად მოიწვია მასწავლებლის ეროვნული ჯილდოს მფლობელი ლადო აფხაზავა და ეროვნული ბიბლიოთეკის ხელმძღვანელი გიორგი კეკელიძე. მოწვეული სტუმრებიც აქტიურად ჩართეს საკუთარ გამოსვლებში და, საბოლოო ჯამში, ძალიან საინტერესო და ინფორმაციულად დატვირთული გამოსვლა გამოუვიდათ, რასაც აუდიტორიის შეფასებებიც მოწმობდა. ერთ-ერთმა გუნდმა, რომლის თემაც იყო „ზოგადი განათლება“, სტუმრად სკოლის ხელმღვანელის, საგანმანათლებლო პორტალ „izrune.ge“-ს დამფუძნებლის, ზოგადი განათლების განვითარების დარგში აქტიურად მოღვაწე გოჩა ტყეშელაშვილის მოწვევა გადაწყვიტა.
ბავშვები წერენ წერილებს, უხსნიან სასურველ სტუმრებს, რატომ სურთ მათი მოწვევა და არწმუნებენ, რომ ესტუმრონ.
პროექტის ფარგლებში შვილებს აქტიურად ეხმარებიან მშობლებიც.
მიზანი, რომ მოსწავლეებმა განივითარონ კვლევის, შემოქმედებითი, ინდივიდუალური და ჯგუფური მუშაობის, გადაწყვეტილების მიღების, ინფორმაციის შეგროვების, დამუშავების, პრეზენტაციის, აუდიტორიის წინაშე საუბრის და სხვა უნარ-ჩვევები, პროექტის ფარგლებში მიიღწევა.
