როგორ გავუადვილოთ მცირეწლოვანს უფროსი შვილის როლი.
ახალი ბავშვი ოჯახში სასიხარულო მოვლენაა, თუმცა თუ შვილი უკვე გყავთ, შესაძლოა შფოთვამ შეგიპყროთ, რადგან თქვენ უფრო ნაკლები დრო დაგრჩებათ მისთვის, თქვენი ხელები უფრო დაკავებული იქნება და წინასწარ არ გეცოდინებათ, როგორ შეეგუება ამას თქვენი უფროსი შვილი.
რაც არ უნდა იყოს, ნუ შეშინდებით. ნაცადი და სწორი რჩევები, ცოტაოდენი მომზადება და ეს ცვლილება უფრო მართვადი გახდება, თქვენ კი უკეთ გაიგებთ, რას გრძნობს თქვენი ჯერ კიდევ პატარა, მაგრამ უკვე უფროსი შვილი.
- მოჩქარეს მოუგვიანდესო
ამაღელვებელია იმის გაგება, რომ თქვენ ისევ ბავშვს ელით და კიდევ უფრო ამაღელვებელია ამ ამბის სხვებისთვის გაზიარება. დიდებულია, გაუზიარეთ ეს სიახლე სხვებს, მაგრამ არა თქვენს მცირეწლოვან შვილს, მით უმეტეს, დროზე ადრე. მათ დროის შეზღუდული შეგრძნება აქვთ, რაც ნიშნავს, რომ ამ ამაღელვებელი ამბის თქმა თვეებით ადრე შფოთვასა და მღელვარებას გამოიწვევს. მცირეწლოვნების (Toddlers) აზრით, როცა რაიმე მოვლენის შესახებ ესმით, ეს ახლა ხდება და ლოდინი მათთვის რთულია. გირჩევდით, მოგეთმინათ შეძლებისდაგვარად დიდხანს, შემდეგ კი თქვენი პატარასთვის მოგეთხროთ კონკრეტული დეტალებით, „რომ გაზაფხულდება და ახალი ყვავილები ამოვა, ჩვენ ბავშვი გვეყოლება”. ბოლო თვემდე მოცდა თქვენი ბავშვისათვის ამის სათქმელად თქვენს ოჯახს სიმშვიდეს შეუნარჩუნებს.
2. “შენ სულ ჩემი პირველი შვილი იქნები”
შესაძლოა, თქვენთვის ამაღელვებელია, რომ თქვენი მცირეწლოვანი შვილი უფროსი ძმა ან და გახდება, მაგრამ თქვენს შვილს წარმოდგენა არა აქვს, რას ნიშნავს ეს. ბავშვები ეს-ესა არკვევენ, რას ნიშნავს „მედ” ყოფნა. და უკვე ახალი როლი – უფროსი და ან ძმა. ამაზე ყურადღების გამახვილების ნაცვლად, შეახსენეთ თქვენს შვილს, რომ ის ყოველთვის თქვენი შვილი იქნება, მაშინაც კი, როცა ახალი ბავშვი შემოვა ოჯახში. ამის თქმა არასოდეს იქნება ზედმეტი. აგრეთვე, გაიხსენეთ ხოლმე, რა პატარაა თქვენი უფროსი შვილი. როცა ახალი ბავშვი ჩნდება, ჩვენ გვჩვევია ჩვენი პირმშო აღვიქვათ უფრო დიდად, უფროსად, ვიდრე სინამდვილეშია. ისინი ჯერ კიდევ მოუმზადებელი არიან ცხოვრებისთვის. და თქვენმა უფროსმა შვილმა უნდა იცოდეს, რომ ისევ მის გვერდით იქნებით მათი ბავშვური საჭიროებ(ებ)ისას.
3. ელოდეთ რეგრესს
მცირეწლოვნები განიცდიან რეგრესს. მოზრდილი ბავშვებიც. ეს შესაძლოა მოხდეს, როგორც ახალი ბავშვის მოსვლამდე, ისე ამის შემდეგ (ან – ორივე შემთხვევაში). ეს კომუნიკაციის მათეული გზაა, როცა არ იციან, რა ხდება. ისინი არიან აღელვებულნი, მოლოდინითა და შიშით აღსავსენი. მოსალოდნელია მეტი მიჯაჭვულობა, ტუალეტის ჩვევის მოშლა, მომატებული ტირილი ან ტანტრუმი და ძილის დარღვევები. ეცადეთ, არ დაგავიწყდეთ, რა პატარაა თქვენი უფროსი შვილი და შეძლებისდაგვარად მოერიდეთ მასთან კონფლიქტს. იყოლიეთ ის უფრო ახლოს, რადგან მას მეტად სჭირდებით. დამატებითი ჩახუტებები, მათთან ბავშვივით მოქცევა დიდად დაეხმარება მათ თქვენი ოჯახის ამ უმნიშვნელოვანეს ცვლილებასთან შეგუებაში.
- ყველაფერი უფროსი შვილისთვის
დააჯერეთ თქვენი შვილი, რომ ახალი და ან ძმა სწორედ მისთვის არის აქ: „ნახე, შენი პატარა გეძებს. აინტერესებს, სად ხარ”. „შეხედე, პატარავ! შენი დაიკო სკოლიდან დაბრუნდა”. საჩუქრები კართან? დაე, თქვენმა უფროსმა შვილმა გახსნას ისინი, ითამაშოს, წაიკითხოს წიგნები და ა.შ. თქვენ მადლობელი იქნებით იმ მეგობრების, რომლებსაც არ ავიწყდებათ საჩუქრის ჩუქება თქვენი უფროსი შვილისთვისაც.
- ეჭვიანობა ნორმალურია
ჩვენ ვაფართოებთ ოჯახებს იმ იმედით, რომ შვილებს ერთმანეთი ეყვარებათ და სამუდამოდ იმეგობრებენ ერთმანეთთან. ასეც მოხდება. ოღონდ მოგვიანებით. ახლა კი, ახალმა ბავშვმა შესაძლოა თქვენს მცირეწლოვან შვილში გამოიწვიოს არა მხოლოდ სიყვარული, არამედ ეჭვიანობა და სხვა გრძნობები. ეცადეთ, გაიგოთ ის ბრაზი და დაბნეულობა, რომელსაც თქვენი შვილი განიცდის, „დამთრგუნველია, როცა დედას ისევ ამ ბავშვის კვება უწევს!” – ეს დაეხმარება მათ ამ რთულ ემოციებთან გამკლავებაში. გაგებით მოეკიდეთ მის საჭიროებას, იყოს თქვენთან. უთხარით – „მე მალე გამოვუცვლი ბავშვს საფენს, რათა მალევე შევძლო დაბრუნება და შენთვის წიგნის წაკითხვა”. ეს აგრძნობინებს მას, რომ მისი ესმით.
6. დედიკოს დამხმარე
პატარა ბავშვებს უყვართ დახმარება. ჩართეთ თქვენი მცირეწლოვანი შვილი თქვენთან ერთად მართვის საქმეში, მიეცით მას მარტივი დავალებები. ვთქვათ, მოგიტანოთ საფენი ბავშვისთვის, ან დაგიჭიროთ ბავშვის სათამაშო, სანამ მას მანქანის სავარძელში სვამთ. ეს უფლებამოსილების მინიჭება თქვენს პირმშოს საქმიანობის თანამონაწილედ და „დედიკოს პატარა დამხმარედ” აქცევს.
- ჩაეჭიდეთ უფროს შვილთან განმარტოების უმცირეს მომენტებსაც კი
ორის მოვლამ შესაძლოა სირთულეები შექმნას. დროის მცირე მონაკვეთები, რომლებიც მხოლოდ უფროს შვილთან ურთიერთობისთვის გაქვთ, შეიძლება საკმაოდ მოსახერხებელი იყოს. რამდენიმე წუთით წიგნის ერთად კითხვა დაეხმარება თქვენს შვილს, იგრძნოს კავშირი თქვენთან. დაარქვით ამ დროს ზუსტი სახელი – „მხოლოდ დედიკოს და (ბავშვის სახელი) კითხვის დროა. ჩვილი აქ არ არის”. თქვენს შვილს ეცოდინება, რომ რაღაც განსაკუთრებული აკავშირებს თქვენთან.
- სთხოვეთ დახმარება ყველას, ვისაც შეუძლია
მეორე შვილი ნიშნავს სიხარულს და დიდ ცვლილებას, რომელსაც უნდა მოერგოთ. შესაძლოა, თქვენ ხართ ის, ვისაც მოსწონს, ყველაფერი თვითონ აკეთოს, მაგრამ ახლა ამის დრო არ არის. საკვები, ბავშვის უფასო მოვლა; ვინმე, ვინც თქვენს შვილს პარკში ან სკოლაში წაიყვანს – დასთანხმდით დახმარებას. შეგიძლიათ, მოგვიანებით თქვენც გასწიოთ საპასუხო სამსახური.
- დაივიწყეთ სრულყოფილება
სრულყოფილება – ძალიან ხშირად მივილტვით ამისკენ. ხშირად დედები გადაჭარბებულად მომთხოვნი არიან საკუთარი თავის მიმართ. ახლა ამის დრო არ არის. თუ უარს იტყვით სრულყოფილებაზე, მეტს დაისვენებთ და მეტ სიხარულს იგრძნობთ თქვენს „სიხარულებთან” ურთიერთობისას. ჭურჭელი შეიძლება ჭუჭყიანი დარჩეს; ძილის დრო შეიძლება შემცირდეს, მაგრამ დაღლილობა, რომელსაც ორი შვილის დედა დღის ბოლოს იგრძნობს, დამსახურებული დაღლილობა იქნება.
წყარო: https://www.psychologytoday.com/blog/our-thriving-children/201706/welcoming-new-baby-the-family
