ანჯელინა ჯოლი: ქალთა უფლებები
მიუხედავად იმისა, რომ მსახიობს კოლეჯის დიპლომიც კი არ გააჩნია, ის მოწვეული მასწავლებლის სტატუსით საკმაოდ წარმატებულად სარგებლობს. წელს ჰოლივუდის ვარსკვლავი და გაეროს მშვიდობის ელჩი ანჯელინა ჯოლი ლონდონის ეკონომიკისა და პოლიტიკური მეცნიერებების სკოლაში სალექციო კურს უძღვება. ბრიტანულ უნივერსიტეტში ლექციებს სხვა მოწვეული პირებიც, მათ შორის უფლებადამცველი ჯეინ კონორსი და მშვიდობისა და თავისუფლებისთვის მებრძოლი, საერთაშორისო ქალთა ლიგის ხელმძღვანელი მადლენ რიზიც კითხულობენ. ისინი ითავსებენ ექსპერტთა როლს ახალ სასწავლო დაწესებულებაში, რომელიც ქალთა პრობლემების, მშვიდობისა და უსაფრთხოების საკითხების კვლევით დაკავდა. ცნობილია, რომ ამ ცენტრის ბაზაზე სტუდენტები მაგისტრატურას გადიან. სასწავლო განრიგში მითითებულია ასეთი კურსები: „სქესი და მილიტარიზაცია“, „გენდერული პრობლემატიკა და ადამიანის უფლებები“.
ანჯელინა ჯოლის თქმით, ის სიამოვნებით იწყებს სასწავლო პრაქტიკას. სურს ახლგაზრდებს საკუთარი გამოცდილება გაუზიაროს. მოგვიანებით ჯოლის ლექციები ვაშინგტონში, აშშ-ის იმ უძველეს კერძო უნივერსიტეტშიც ჩატარდება, სადაც სხვადასხვა დროს ბილ კლინტონი და ესპანეთის მეფე, ხუან-კარლოსი სწავლობდა. ანჯელინა აზუსტებს, რომ ლექციების განმავლობაში ის ბევრს ისაუბრებს ქალთა უფლებებზე და იმაზე, თუ რატომ უნდა აღიკვეთოს ქალთა წინააღმდეგ მიმართული დანაშაული.
სპაიკ ლი: კინემატოგრაფია
ამერიკელი მსახიობი და სცენარისტი, სპაიკ ლი ნიუ-იორკის უნივერსიტეტში კინემატოგრაფიის განხრით მაგისტრატურის პროგრამას 2002 წლიდან უძღვება. მისი ხელმძღვანელობით სტუდენტები ფილმების შექმნის პროცესს სწავლობენ, სცენარის დაწერიდან – პროდიუსერობამდე. ლის მიზანია პროგრამის ფარგლებში სტუდენტებს კინოს ისტორია გააცნოს, როგორც კლასიკური, ისე თანამედროვე ფილმების. ამისათვის მან 95 ფილმისგან სია შეადგინა. დამწყები რეჟისორებისთვის ამ ფილმების ნახვა სავალდებულოა. სტუდენტებს ძალიან უყვართ თავიანთი პროფესორი. ის მათთვის წარმატების ცოცხალი მაგალითია.
მარტინ ემისი: კრეატიული წერა
მარტინ ემისი თანამედროვე ბრიტანული ლიტერატურის ერთ-ერთი საუკეთესო წარმომადგენელია (ცნობილი რომანები: „ორსული ქვრივი“, „ფული: თვითმკვლელის წერილი“, „ღამის მატარებელი“ და სხვ.). ექვსი წლის განმავლობაში ის კრეატიული წერის კურს კითხულობდა მანჩესტერის უნივერსიტეტში, რაშიც რეკორდულ თანხას – საათში 3 ათას ევროს უხდიდნენ. მასტერ კლასების დროს პროფესორი ემისი არა მხოლოდ ტექსტების შექმნას ასწავლიდა სტუდენტებს, არამედ სხვა ავტორების (ნაბოკოვი, სოლა ბელოუ) ნაწარმოებებსაც არჩევინებდა. ის მონაწილეობდა არაერთ საგანმანათლებლო ღონისძიებაში, რომელიც ყოველთვის ანშლაგით სრულდებოდა.
2011 წელს ოჯახური პრობლემების გამო ემისმა უნივერსიტეტი დატოვა და საცხოვრებლად ნიუ-იორკში გადავიდა. უნივერსიტეტში გატარებულ პერიოდს მწერალი აღფთოვანებით იხსენებს და აღნიშნავს, რომ მასწავლებლობის ხანა მისთვის ძალიან საინტერესო და ბევრის მომცემი იყო.
ჯეიმს ფრანკო: კინემატოგრაფია
ფილმების „ადამიანი ობობა“, „127 საათი“ ვარსკვლავი ჯეიმს ფრანკო სხვადასხვა დროს მასწავლებლობდა ლოს-ანჯელესის კალიფორნიის უნივერსიტეტში და ნიუ-იორკის უნივერსიტეტში. დააფუძნა საკუთარი კინოს სკოლა ორი ფილიალით აშშ-ს დიდ ქალაქებში. ფრანკოს სტუდენტები იხსენებენ, რომ ხშირად მასწავლებელი მათ ზარებს არ პასუხობდა, ლექციებზეც, სულ ცოტა, 15 წუთით იგვიანებდა და ექსტრავაგანტულად იქცეოდა, მაგალითად, ლექციების კითხვის დროს არ იხსნიდა მზის სათვალეს. სტუდენტთა თქმით, ხშირად ფრანკო გამოუძინებლის შთაბეჭდილებას ტოვებდა და ერთსა და იმავე თემაზე თავისი გულმავიწყობის გამო, რამდენჯერმე საუბრობდა. ვაჟი სტუდენტები მას არ სწყალობდნენ, გოგონებს კი ფრანკო ძალიან ესიმპათიურებოდათ და მოუთმენლად ელოდნენ მასთან შეხვედრას. მსახიობი გამოირჩეოდა სიურპრიზებით და საინტერესო პრაქტიკული გაკვეთილებით. ერთხელ მან თავისი სტუდენტები მილანის კინოფესტივალზე წაიყვანა.
ოპრა უინფრი: ლიდერობის დინამიკა
ამერიკული ტელევიზიის ლეგენდა და აშშ-ში ერთ-ერთი უმდიდრესი ქალი ორი წელი კითხულობდა კურსს „ლიდერობის დინამიკა“ Kellogg-ის მენეჯმენტის სკოლაში. კომპანიონობას მას მეუღლე, ბიზნესმენი სტედმენ გრემი უწევდა. სამწუხაროდ, დროის დეფიციტისა და სხვა პროექტებში ჩართულობის გამო, ოპრამ მასწავლებლობა ვეღარ შეძლო.
ოპრას საუნივერსიტეტო ჯგუფში მოხვედრა საკმაოდ ძნელი იყო. ყოველწლიურად მისი ლექციების მოსმენა მხოლოდ 110 მსურველს შეეძლო და იმისათვის, რომ ლექციაზე დასწრების უფლება მოგეპოვებინა, წინა წელს სტუდენტს 2800 ან 3000 ქულა უნდა მოეგროვებინა.
ოპრას ლექციებზე უსაფრთხოების მაღალი ზომები იყო დაცული: აუდიტორიის კართან დაცვა იდგა. ყველა სტუდენტი მოწმდებოდა. ოპრას ლექციის ჩაწერა აკრძალული იყო. სტუდენტებს ეკრძალებოდათ სასწავლო გეგმისა და ოპრას მიერ მომზადებული მასალების სხვებისთვის გაზიარება. თუმცა, ოპრას კურსდამთავრებულები აღფრთოვანებას ვერ მალავდნენ და ამბობდნენ, რომ მისი მასწავლებლური ქარიზმა და ორატორული ნიჭი, მართლაც, განუმეორებელი იყო. „მას კარგი იუმორი აქვს, ჯანსაღად აზროვნებს, მის ლექციებზე ყველა აქტიურად იყო ჩართული. ჩემი მოტივაცია სწრაფად იზრდებოდა. ეს იყო ადამიანი, რომელმაც ნულიდან დაიწყო და გულმოდგინე მუშაობის შედეგად მთელი იმპერია შექმნა,“ – იხსენებს მისი სტუდენტი სიუზან მოზლი.
კანიე უესტი: მოდის ბიზნესი და დიზაინი
ცოტა ვინმემ თუ იცის, რომ ცნობილ რეპერს, პროდიუსერსა და დიზაინერს საკუთარი კრეატიული სააგენტო – DONDA აქვს, რომელიც მისი ალბომების გაფორმებით, კლიპების მომზადებითა და მარკეტინგული პროექტებითაა დაკავებული. ამის გამო უესტს შესაშური რეგულარობით იწვევენ ხელოვნებასა და დიზაინისადმი მიძღვნილი ლექციების ჩასატარებლად. მას წაუკითხავს ლექციები ოქსფორდის სტუდენტებისთვის, ჰარვარდის დიზაინის უმაღლესი სკოლისა და Los Angeles Trade Technical კოლეჯში. რეპერს ძალიან მოსწონს მასწავლებლობა. ის გაცილებით მეტ დროს უთმობს ლექციას, ვიდრე ეს მიღებულია. მას სჯერა, რომ „სილამაზე და დიზაინი გადაარჩენს სამყაროს“.
თუკი კანიეს გამოჩენა პრესტიჟულ ჰარვარდსა და ოქსფორდში ნებაყოფილობითი და სასიამოვნო იყო, ლოს-ანჯელესში ამას სხვა საფუძველი ჰქონდა. საქმე ისაა, რომ რეპერს პაპარაციზე თავდასმის გამო სასჯელად საზოგადოებისთვის სასარგებლო შრომა მოსთხოვეს და შემოთავაზებულ ვარიანტებს შორის უესტმა სტუდენტებთან მოდის ინდუსტრიაზე ლექციების ჩატარება არჩია. ჯამში რეპერმა ლოს-ანჯელესელ სტუდენტებს 250-საათინი ექსკლუზიური კურსი ჩაუტარა. მან კარგად მოახერხა ლექციებზე არაფორმალური და საინტერესო გარემოს შექმნა.
ტონი ბლეერი: რელიგია გლობალიზაციის პირობებში
ვიდრე დიდი ბრიტანეთის ყოფილი პრემიერ მინისტრის შვილი იელის უნივერსიტეტში საერთაშორისო ურთიერთობებს სწავლობდა, მამამისმა ამავე უნივერსიტეტში შეთავსებით დაიწყო მუშაობა. ტონი ბლეერი პრესტიჟულ სასწავლებელში გლობალიზაციის პირობებში რელიგიის თემაზე სემინარებს კითხულობდა. „ძალიან ვღელავ. როგორც მოსწავლე არასოდეს ვბრწყინავდი და ამიტომ კარგად მესმის, რომ ბევრი სტუდენტი დღეს ჩემზე გაცილებით განათლებულია“, – ამბობდა ბლეერი კურსის დაწყებამდე.
სტუდენტებს მისი ლექციები ძალიან მოწონდათ. მასწავლებელი ხშირად მართავდა დისკუსიებს და უარყოფდა პრეზენტაციებს.
ვაიკლეფ ჟანი: ჰაიტის კვლევა
კანიე უესტის კოლეგამ, რომელიც ბევრს ახსოვს შაკირასთან ერთად შექმნილი სიმღერა «Hips Don’t Lie» გამო, 2010-2011 წლებში მოწვეულ პროფესორად იმუშავა ბრაუნის უნივერსიტეტის აფრიკის კვლევის დეპარტამენტში. ვაიკლეფ ჟანმა მონაწილეობა მიიღო მრგვალ მაგიდებსა და დისკუსიებში, რომელიც მის სამშობლოს უკავშირდებოდა. წაიკითხა ლექციები. რეპერი ენთუზიაზმით ჩაერთო სტუდენტებისთვის გამოცდილების გაზიარებაში. „უნივერსიტეტის ინტელექტუალური საზოგადოების ცხოვრებაში მე ჩემი წვლილი შემაქვს და ვიმედოვნებ, რომ ჰაიტელებს მხარს დაუჭერენ. ეს ჩემთვისაც სწავლის უნიკალური შესაძლებლობაა. მე კი მთელი ჩემი სიცოცხლის განმავლობაში ვსწავლობ,“ – განაცხადა მუსიკოსმა.
კევინ სპეისი: თეატრალური ხელოვნება და მენეჯმენტი
ორი „ოსკარის“ მფლობელი, ამერიკელი მსახიობი, რეჟისორი, პროდიუსერი და სცენარისტი ახალ თაობას თავის ცოდნას ხელგაშლილად უზიარებს. ის არა მხოლოდ თეატრალური სკოლების სტუდენტებისთვის ატარებს მასტერკლასებს, არამედ მიწვეული პროფესორის სტატუსით ოქსფორდში, წმინდა ეკატერინეს კოლეჯშიც კითხულობს ლექციებს. სპეისმა მასწავლებლობის შეთავაზება სიამოვნებით მიიღო და განაცხადა, რომ მდიდარი ტრადიციების მქონე უნივერსიტეტის გუნდის ნაწილი დიდი პატივით გახდებოდა: „მინდა სტუდენტებს პრაქტიკული ცოდნა მივცე კასტინგებზე და აგენტებთან მუშაობის შესახებ ჩემი გამოცდილება გავუზიარო“. სპეისმა თავის კარიერა თეატრში დაიწყო, 11 წლის მანძილზე მასის მხატვრული ხელმძღვანელი იყო ოლდ ვიკის უძველეს ბრიტანულ თეატრში.
კევინ სპეისი და მისი კომპანიის წარმომადგენლები ახალგაზრდა კინემატოგრაფისტების მხარდაჭერას ცდილობენ. ყოველწლიურად სპეისის მიერ ორგანიზებულ კონკურსზე განაცხადის გაგზავნა შეუძლიათ რეჟისორებს, რომლებიც უკვე 25 წლის შესრულდნენ. გამარჯვებულები პრაქტიკის გასავლელად – კინოს გადასაღებად ჰოლივუდში მიემგზავრებიან.
