ხუთშაბათი, მარტი 28, 2024
28 მარტი, ხუთშაბათი, 2024

     სახალისო  „იმპროვიზაციები“

მეცნიერების საფუძვლებს ისე აზიარო მოსწავლე, რომ არ მოეწყინოს, მეტიც, არ შეიძულოს და არ განუდგეს საკმაოდ რთულია. ადვილი არ არის, გაკვეთილების მთავარ გმირებად იგრძნონ თავი მოსწავლეებმა, ხოლო მასწავლებელი ყოველთვის დარჩეს მათ ერთგულ თანაშემწედ, მეგზურად,გამოცდილ მეგობრად. ამისთვის უამრავი მეთოდი თუ აქტივობა მოუფიქრებიათ პედაგოგებს ჩვენშიც,დასავლეთშიც,უძველეს აღმოსავლურ სკოლებშიც კი.
ბოლო წლების ჩვენი ერთი-ერთი ნაცადი და საყვარელი ხერხია,ჩვეულებრივი საგაკვეთილო მომენტები ვაქციოთ სახალისო აქტივობებად,წინდაწინ დაუგეგმავად. რამდენიმე ასეთი „აკადემიური ცელქობის“ შესახებ გიამბობთ.
ერთ-ერთ ასეთ მომენტს, პირობითად, „ფრაზებზე ნადირობა“ შეგვიძლია ვუწოდოთ.
წერითი დავალების პრეზენტაციას როგორმე უნდა მივანიჭოთ მეტი მნიშვნელობა,რომ მის ავტორს მოტივაცია შევმატოთ,წავახალისოთ,ხოლო ვიდრე მოსწავლე ნაშრომის წაკითხვას დაიწყებს,კლასს ვაძლევთ დავალებას: პრეზენტატორს უსმინეთ ყურადღებით; შეეცადეთ „დაიჭიროთ“ და ჩაინიშნოთ ფრაზა ან წინადადება,რომელიც თქვენთვის საკამათო აზრს შეიცავს,შეიძლება ვაქციოთ საკლასო დისკუსიის თემად ან არგუმენტირებული ესეს თეზისად.თუ ერთსა და იმავა მოსაზრებას რამდენიმე მოსწავლე  ჩაინიშნავს,სწორედ მას შევარჩევთ.შესაძლოა შერჩეული წინადადებები დაფაზეც ჩამოვწეროთ,როგორც საყურადღებო და მნიშვნელოვანი.
ასეთ წუთებში წარმოუდგენლად  დიდია იმ  მოსწავლის მოტივაცია,სიხარული,რომელიც თავის დავალებას წარუდგენს კლასს.დანარჩენი მოსწავლეებიც,აუდიტორიის წევრები,მონაწილენი არიან აკადემიური პროცესისა-ყურს უგდებენ,გაიაზრებემ, არჩევენ. მათი აზრიც მნიშვნელოვანი და გასათვალისწინებელია.
ერთ-ერთი ასეთი „იმპროვიზებული“ მომენტია შემოქმედებითი სამუშაოს შერჩევის დროს,ზოგადი მიმართულების განსაზღვრის შემდეგ,კონკრეტული დავალებების (საკითხების,სათაურების) მოფიქრება მოსწავლეთა მიერ.ყველა მსურველი,რომელსაც უკვე მოფიქრებული აქვს დავალების  სათაური,გამოდის დაფასთან და წერს.ზოგჯერ ერთდროულად რამდენიმე ბავშვი გამოდის და ისინი გვერდიგვერდ მუშაობენ.ჩამოწერა როცა დასრულდება,მთლიანად კლასი  ერთვება სახალისო აქტივობაში,რომელსაც, პირობითად,შეგვიძლია ასე ვუწოდოთ: „უყარეთ კენჭი!“ ჩვენ თითოეულ დავალებას „ვუყრით კენჭს“ და მიღებულ ხმათა რაოდენობას დაფაზე მივუწერთ.საბოლოოდ,კლასი იმუშავებს იმ დავალებაზე,რომელიც ყველაზე მეტ ხმას მიიღებს(თუ პედაგოგი ამ დავალებას ნაკლებად კომპეტენტურად

მიიჩნევს, შეუძლია, მოსწავლეებთან შეთანხმებით, კორექტივები შეიტანოს მასში.ამ დავალების ინიციატორი ძალიან ბედნიერია,რაც მთავარია,პროცესში ყველა ჩართულია და სამომავლოდაც მოტივაცია თითოეულს შეემატება.
ასეთიც შეიძლება გავიხსენოთ:
ამა თუ იმ მწერლის შემოქმედების  შესწავლას ყოველთვის უძღვის წინ მისი ბიოგრაფიის გაცნობა.ჩვენ ყოველთვის ვცდილობთ,არ შემოვიფარგლოთ სახელმძღვანელოში ჩაწერილი მოკლე ბიოგრაფიული მონაცემებით,ამიტომ კლასს ვავალებთ,მოიძიოს დამატებითი მასალები მწერლის განვლილი გზის შესახებ.მოსწავლეები უმეტესად,ინტერნეტით სარგებლობენ,თუმცა ზოგიერთს,მშობლის ჩართულობითა და ჩვენი რჩევით,წიგნები,ჟურნალ-გაზეთების სტატიებიც  მოუძიებია.შეუძლებელია ყველას მივცეთ საშუალება,თავიდან ბოლომდე წარმოადგინოს მოძიებული ინფორმაცია.ამიტომ,ვისაც დავალების კლასის წინაშე  წარდგენის სურვილი აქვს,მოვუწოდებთ: – შექმენით ჯგუფი და ითანამშრომლეთ!
ისინი გამოდიან აუდიტორიის  წინაშე და წინასწარ დაფაზე ჩამოწერილი ბიოგრაფიული ეტაპების მიხედვით წარმოადგენენ მწერლის ცხოვრებისა და შემოქმედების შესახებ მრაფალფეროვან  ინფორმაციას.თითოეული კითხულობს ან გვიყვება მისი ბავშვობის,სწავლის,საზოგადო მოღვაწეობისა და სხვა მნიშვნელოვანი ეტაპების შესახებ,ცდილობენ შეავსონ სხვების წაკითხული თუ მონათხრობი.
კლასს ვთხოვთ,კითხვები დაუსვან სახელდახელოდ შექმნილი მაძიებელთა ჯგუფის წევრებს.ბოლო ეტაპზე თვითონ ჯგუფის წევრები უსვამენ კლასს კითხვებს: რა დაამახსოვრდათ?რას მიაქციეს ყურადღრება?
ასეთი „იმპროვიზაციები“ უსასრულოდ შეიძლება გაგრძელდეს.გულწრფელად ვიტყვით,ამგვარი წუთები ალამაზებს გაკვეთილს,ხალისსა და მოტივაციას მატებს მოსწავლეებს,უბიძგენს მათ აკადემოურ პროცესში მეტი ჩართულობისაკენ…და,რაც მთავარია,სწორედ ასეთი მომენტებით იქმნება თავისუფალი გარემო გაკვეთილზე,ასპარები თავისუფალი ურთიერთობებისა  მოსწავლეებს შორის,მოსწავლეებსა და მასწავლებლებს შორის.

ნინო ბილოხოძე
ქ.ოზურგეთის ნოდარ  დუმბაძის სახელობის მე-2 საჯარო სკოლის  ქართული ენისა და ლიტერატურის მასწავლებელი.

კომენტარები

მსგავსი სიახლეები

ბოლო სიახლეები

ვიდეობლოგი

ბიბლიოთეკა

ჟურნალი „მასწავლებელი“

შრიფტის ზომა
კონტრასტი