ვინაიდან სკოლის მოსწავლეები სტუდენტები არ არიან და, ამასთან, მოზარდებს ხშირად მძიმე ხასიათი აქვთ, საკლასო ოთახში ფილმის ჩვენებისთვის მომზადებისას და თავად ჩვენების პროცესშიც რამდენიმე მითითება უნდა გავითვალისწინოთ.
- მოამზადეთ საშინაო დავალება
სანამ კლასს აჩვენებთ, თავად უყურეთ ფილმს. ჩაინიშნეთ, სად გააკეთოთ პაუზა მსჯელობისთვის. ჩაიწერეთ კითხვები, რომელთა დასმაც გსურთ, მოინიშნეთ ის ადგილები, რომლებიც, თქვენი აზრით, განმარტებას მოითხოვს.
- მოამზადეთ საბაზისო ინფორმაცია
მოსწავლეებისთვის საბაზისო ინფორმაციის მიწოდება აუცილებელია, რათა ფილმის დაწყებამდე იმის გარკვევაში არ დაკარგონ დრო, „სად არიან“. ეს უნდა იყოს ინფორმაცია იმ დროისა და გარემოს შესახებ, რომელშიც ფილმი მიმდინარეობს, იმ საკითხების შესახებ, რომლებსაც ფილმი ეხება, და, საზოგადოდ, კულტურული კონტექსტის შესახებ.
- დაუკავშირეთ ფილმი თქვენი მოსწავლეების ცხოვრებას
ფილმის დაწყებამდე ჩაატარეთ „ემპათიის გამომწვევი“ და „კავშირის დამამყარებელი“ აქტივობები, რომლებიც თქვენს მოსწავლეებს ფილმში დასმულ საკითხებსა და საკუთარ ცხოვრებასთან მათ კავშირზე ფიქრისკენ უბიძგებს.
- 4. ასწავლეთ ფილმის ენა
კინოს თეორიას ვერ შეასწავლით, მაგრამ უნდა აუხსნათ ძირითადი ცნებები, როგორიცაა, მაგალითად, მონტაჟი, ფოკუსი, ჩარჩო, ახლო და შორი ხედი. ეს მათ ნანახის უკეთ აღქმასა და ნააზრევის უფრო მკაფიოდ გამოხატვაში დაეხმარება.
- მოაქციეთ ფილმი განსაზღვრულ ჩარჩოში
მოამზადეთ კითხვები და პატარ–პატარა აქტივობები, რომლებიც ხაზს გაუსვამს იმას, რისთვისაც გსურთ მოსწავლეთა ყურადღების მიქცევა ფილმის ყურებისას. მაგალითად, დაიწყეთ გაკვეთილი შესავალი განხილვით და დაასრულეთ რეფლექსიით – სთხოვეთ მოსწავლეებს, წერილობით გადმოსცენ, რატომ უყურებენ ამა თუ იმ ფილმს. ეს მათ იმის გაგებაში დაეხმარება, რას უნდა დააკვირდნენ ყურების დროს.
- დარწმუნდით, რომ კონცენტრირებულები არიან ფილმზე
მოამარაგეთ მოსწავლეები შენიშვნების ჩასაწერი ფურცლებით – ცხრილით, გრაფიკული ორგანიზატორით ან შეკითხვების კომპლექტით. ძალიან მოხერხებულია სპეციალურად დამზადებული „მაყურებლის სქემა“, რომელშიც მოსწავლეებს შეუძლიათ ჩაინიშონ ცალკეული სცენები და მიუთითონ, როგორ უკავშირდება ისინი კონკრეტულ საკითხებს. ეს მათ ფილმის შინაარსისა და სათქმელის უკეთ გააზრების საშუალებას მისცემს.
- დააკისრეთ ბავშვებს პასუხისმგებლობა
ეს ერთჯერადი გამოკითხვა კი არ უნდა იყოს, არამედ ყოველდღიური დისკუსია, საშინაო დავალებები, ჟურნალის ჩანაწერები, რომლებიც შექმნის ერთგვარ პორტფელს თვითშეფასებისა და მომავალი რეკომენდაციისთვის.
- მიეცით ფილმი საშინაო დავალებად
შესაძლოა, მთელი კვირა ვერ დაუთმოთ ფილმს. საბედნიეროდ, დღეს სავსებით შესაძლებელია, მოსწავლეებმა მისი ყურება შინ დაასრულონ. ინტერესის აღსაძრავად აყურებინეთ 30 წუთი საკლასო ოთახში, ხოლო დანარჩენი საშინაო დავალებად მიეცით.
- 9. იზრუნეთ ტექნიკის გამართულობაზე
შეამოწმეთ პროექტორი გაკვეთილის დაწყებამდე და წინასწარ მოამზადეთ ფილმი ჩასართავად. გაუთვალისწინებელი შემთხვევებისთვის მზად გქონდეთ სტატიის ასლები ან ფილმთან დაკავშირებული პატარა ჯგუფური აქტივობები.
- არ ჩააქროთ შუქი
ბევრი ამტკიცებს, რომ სიბნელეში ფილმის ყურება ყველაზე სასიამოვნოა, მაგრამ სინათლეში მოსწავლეთა ქცევის კონტროლი უფრო ადვილია.
ახლა უკვე გაქვთ თეორიული ცოდნა სასიამოვნო სეანსების დასაწყებად. სულ მალე რჩევებით დაგიბრუნდებით, რომლებიც საშუალებას მოგცემთ, მოსწავლეებისთვის საინტერესო ფილმები შეარჩიოთ.
