|
იმის გასაგებად, როგორ არის მოწყობილი მსოფლიო, რა თქმა უნდა, შეიძლება, ძალიან ბევრი ვიკითხოთ, ვიძრომიალოთ ინტერნეტში, ჩავატაროთ ექსპერიმენტები და გამოვიტანოთ დასკვნები, თუმცა ასევე შესაძლებელია, ვნახოთ საინტერესო და ამავე დროს უცნაური რუკებიც, რომლებზეც მსოფლიოს შესახებ სტატისტიკური ინფორმაცია შედარებით გასაგებად და თვალსაჩინოდაა მოცემული.
დღეს მინდა შემოგთავაზოთ რამდენიმე ასეთი რუკა, რომლებიც ასახავს არა სასარგებლო წიაღისეულის მოპოვების ადგილებს ან მოსახლეობის სიმჭიდროვეს, არამედ სხვა ფაქტებს, მაგალითად, ინტერნეტსაიტებისა და ინტერნეტბრაუზერების გავრცელების გეოგრაფიას, Facebook-ის მეგობრებს შორის კავშირებს, ქვეყნებს, სადაც „მაკდონალდსის” რესტორნებია და სხვ. განვიხილოთ რამდენიმე ასეთი არასტანდარტული რუკა.
1. მსოფლიოს 40-მდე ქვეყანას არ აქვს ზღვაზე გასასვლელი. რუკაზე მწვანე ფერით სწორედ ასეთი ქვეყნებია აღნიშნული.
2. ეს კი ჰიპოთეტური რუკაა. იმ შემთხვევაში, თუ ქვეყნები, რომელთაც ზღვაზე გასასვლელი აქვთ, უცბად ჩაიძირებიან, მსოფლიო ასეთ სახეს მიიღებს. თავად ხედავთ, რამდენი ქვეყანა გაქრება.
3. დღეს ჩვენი ცხოვრება ინტერნეტის გარეშე, შეიძლება ითქვას, წარმოუდგენელია. ინტერნეტი ქმნის გლობალურ საინფორმაციო სივრცეს და წარმოადგენს მსოფლიო ქსელის საფუძველს.
ინტერნეტსაიტი ერთობლიობაა ვებგვერდების, სურათების, ვიდეოებისა და ა. შ., რომლებიც ატვირთულია ერთ ან რამდენიმე სერვერზე და, ჩვეულებრივ, ხელმისაწვდომია ინტერნეტით ან ტელეფონით. რუკაზე ნაჩვენებია ყველაზე პოპულარული ინტერნეტსაიტების გეოგრაფია მსოფლიოში.
4. ინტერნეტბრაუზერი წარმოადგენს პროგრამას, რომელიც მომხმარებელს საშუალებას აძლევს, ნახოს HTML დოკუმენტების ინფორმაცია ვებსერვერიდან ან ფაილური სისტემიდან. ამჟამად მრავალი ინტერნეტბრაუზერი არსებობს. მათ შორის პერსონალური კომპიუტერებისთვის ყველაზე პოპულარულია: Internet Explorer, Mozilla Firefox, Safari, Google Chrome, Opera. ეს რუკა გვიჩვენებს ყველაზე პოპულარული ბრაუზერების გავრცელებას მსოფლიო მასშტაბით.
5. მსოფლიოში ჯერ კიდევ არსებობს ქვეყნები, სადაც ინტერნეტის გამოყენებას მთავრობა მკაცრად აკონტროლებს. ამ რუკაზე შავი ფერით სწორედ ასეთი ქვეყნებია აღნიშნული.
6. როცა მარკ ცუკერბერგმა თავის კოლეჯის მეგობრებსა და საინფორმაციო მეცნიერების სტუდენტებთან ედუარდო სავერინთან, დასტინ მოსკოვიცსა და კრის ჰაგისთან ერთად ჰარვარდის უნივერსიტეტის სტუდენტობის დროს Facebook-ი დააარსა, ალბათ ვერც კი წარმოიდგენდა, რომ სულ მალე ეს სოციალური ქსელი ძალიან პოპულარული გახდებოდა და თითქმის მთელ მსოფლიოს მოიცავდა. Facebook-ის მომხმარებლებს შეუძლიათ დაამატონ მეგობრები და გაგზავნონ მესიჯები, შექმნან და განაახლონ პერსონალური პროფაილები, რომ თავის შესახებ აცნობონ მეგობრებს. ამასთან, მომხმარებელს შეუძლია შეუერთდეს ქსელს ქალაქის, სამუშაო ადგილის, სკოლის ან რეგიონის მონაცემების მიხედვით. რუკა Facebook-ის მეგობრებს შორის კავშირების გეოგრაფიას ასახავს.
7. ცათამბჯენი თავისუფლად მდგომი ნაგებობაა, სადაც ერთზომიერად განაწილებული სართულები ვერტიკალურადაა განლაგებული და ბოლო სართული არანაკლებ 500 ფუტ (152 მ) სიმაღლეზე მდებარეობს. ის ადამიანთა საცხოვრებლად და სამუშაოდ არის განკუთვნილი. თანამედროვე მსოფლიოში 1500-ზე მეტი ცათამბჯენია. რუკაზე წითლითა და ფორთოხლისფერით ის ქვეყნებია აღნიშნული, სადაც ცათამბჯენები დგას.
8. ბოლო რამდენიმე წელია, ერთობ მოდური გახდა ეგრეთ წოდებული IQ ტესტები, რომელთა საშუალებითაც თითქოსდა შესაძლებელია ადამიანის ინტელექტუალური დონის შეფასება. ინტელექტის კოეფიციენტი – IQ (ინგლის. IQ – Intelligence Quotient; იკითხება როგორც „აი ქიუ”) ადამიანის ინტელექტის დონის რაოდენობრივი შეფასებაა და აღნიშნავს ინდივიდის ინტელექტის დონის შეფარდებას იმავე ასაკის საშუალოსტატისტიკური ადამიანის ინტელექტის დონესთან. იგი ითვალისწინებს ლოგიკურ აზროვნებას, დასახული მიზნის მიღწევისა და დასაბუთებული მსჯელობის უნარს, თვითკრიტიკას. 0-დან 19-მდე IQ გონებაჩლუნგობას მოწმობს, 20-36 ერთეული – აზროვნების უკმარობას, 69-85 ერთეული ნორმასთან ახლოა, 86-114 ნორმაა, 115-124 ერთეული ნორმაზე მეტია, 125-134 ერთეული ინტელექტის მაღალი დონეა, 135 ერთეულზე მეტის მფლობელები კი გენიოსები არიან. IQ ტესტები აზროვნებაზეა გათვლილი და არა ცოდნის დონეზე (ერუდიციაზე). ერთი სიტყვით, ინტელექტის კოეფიციენტი საერთოინტელექტუალური ფაქტორის შეფასების მცდელობაა. რუკა გვიჩვენებს IQ-ს დონეს მსოფლიოს ქვეყნებში.
9. ალბათ საინტერესოა იმის ცოდნა, სად ცხოვრობს ყველზე მეტი მეცნიერი. რუკა გვიჩვენებს მეცნიერთა რაოდენობას 1 მლნ კაცზე მსოფლიოს ქვეყნებში.
10. თუ გიყვართ ბიგ-მაკი და კარტოფილი ფრი, ამ რუკის დახმარებით შეიტყობთ, მსოფლიოს რომელ ქვეყნებში შეძლებთ მათ დაგემოვნებას. რუკაზე წითელი ფერით ის ქვეყნებია აღნიშნული, სადაც „მაკდონალდსის” რესტორნებს შეხვდებით.
11. ყავა ყველა ქვეყანაში ალბათ ყველაზე პოპულარული სასმელია. კოფეინის შემცველობის გამო იგი მასტიმულირებელ მოქმედებას ახდენს. ყავა მოჰყავთ ლათინურ ამერიკაში, აღმოსავლეთ აფრიკაში, არაბეთსა და აზიაში, მაგრამ მას მთელი მსოფლიო მოიხმარს. რუკაზე ასახულია ყავის მოხმარების გეოგრაფია მსოფლიოს ქვეყნებში.
12. მსოფლიოს ზოგიერთ ქვეყანაში ავტომობილები მარცხენა ზოლში მოძრაობენ. აღმოჩნდა, რომ მარცხენა ზოლში სიარულს საკმაოდ დიდი ხნის ისტორია ჰქონია. ზოგიერთი ისტორიკოსი მიიჩნევს, რომ ძველად ცხენით მოგზაურნი ძირითადად მარცხენა ზოლში მოძრაობდნენ. ვინაიდან ადამიანთა უმრავლესობა მემარჯვენეა, ცხენოსნები მარცხენა მხარეს მოძრაობისას უფრო ადვილად მოახერხებდნენ ერთმანეთისთვის რამის მიწოდებას. პირველი სამართლებრივი აქტი, რომელიც მარცხენა ზოლში მოძრაობას დაარეგულირებდა, დიდ ბრიტანეთში 1756 წელს ლონდონის ხიდთან დაკავშირებით შეიქმნა.
მეთვრამეტე საუკუნის ბოლოს აშშ-შიც დაიწყო მოძრაობის გადატანა მარცხნიდან მარჯვნივ, მარჯვენა მხარეს მასობრივი მოძრაობა კი მხოლოდ მეოცე საუკუნის დასაწყისიდან იღებს სათავეს. პორტუგალიაში 1928 წელს შეიცვალა მარცხნივ მოძრაობის წესი მარჯვნივ მოძრაობით, იტალიაში – მე-20 საუკუნის 20-იან წლებში, ხელისუფლების სათავეში მუსოლინის მოსვლის შემდეგ, ავსტრალიამ და ჩეხოსლოვაკიამ ეს წესი გერმანიის მიერ ანექსიისა და ოკუპაციის შემდეგ შეცვალეს, ლათინური ამერიკის ქვეყნებმა, პანამამ და არგენტინამ – მხოლოდ 1943 და 1945 წლებში, ჩინეთში კი მარჯვნივ მოძრაობა შემოღებულ იქნა 1946 წელს.
1978 წელს იაპონიის პრეფექტმა ამერიკული ოკუპაციის შემდეგ შემოღებული მარჯვნივ მოძრაობის წესი კვლავ მარცხნივ მოძრაობით შეცვალა, სამოამ კი მარცხნივ მოძრაობა 2009 წელს შემოიღო, რომ სამხრეთ წყნარი ოკეანის სხვა ქვეყნებს შეერთებოდა.
ამ რუკაზე წითელი ფერით ის ქვეყნებია აღნიშნული, სადაც ავტომობილები გზებზე მარჯვენა ზოლში მოძრაობენ, ხოლო ლურჯით – ის ქვეყნები, სადაც მარცხენა ზოლში მოძრაობაა წესი.
|
