მასწავლებელი ვალდებულია დაიცვას პროფესიული ქცევის წესები. ქცევის წესები დადგენილია განათლებისა და მეცნიერების მინისტრის 2010 წლის 14 ივნისის N57/ნ ბრძანებით დამტკიცებული მასწავლებლის პროფესიული ეთიკის კოდექსით.
ეთიკის კოდექსი ადგენს პროფესიულ კომპეტენტურობასთან დაკავშირებულ, ასევე მოსწავლეებთან, მშობლებთან, სკოლის დირექციასთან, მასწავლებლებთან და სკოლაში დასაქმებულ სხვა პირებთან ურთიერთობის ქცევის წესებს.
მასწავლებელი ვალდებულია:
– იყოს დამოუკიდებელი, კეთილსინდისიერი და მიუკერძოებელი;
– იხელმძღვანელოს საქართველოს კანონმდებლობითა და ეთიკის კოდექსის ნორმებით;
– ხელი შეუწყოს მოსწავლეებში დემოკრატიული და პატრიოტული ღირებულებების ჩამოყალიბებას;
– პროფესიული საქმიანობისას მოსწავლეებს მისცეს სამართლიანობის, ურთიერთპატივისცემის, ადამიანის უფლებათა დაცვის, ჯანსაღი ცხოვრების წესისა და გარემოს დაცვის მაგალითი;
– დაიცვას მოსწავლეებთან, მშობლებთან, მასწავლებლებსა და სკოლაში დასაქმებულ სხვა პირებთან დაკავშირებული ინფორმაციის კონფიდენციალობა, საქართველოს კანონმდებლობით დადგენილი წესით;
– იყოს პუნქტუალური და ჩაიცვას მოწესრიგებულად;
– ისაუბროს ეთიკური ნორმების შესაბამისად, გამართული და მოსწავლეებისათვის გასაგები ენით;
– ეფექტურად გამოიყენოს პედაგოგიური საქმიანობისთვის განკუთვნილი დრო, ეროვნული სასწავლო გეგმით გათვალისწინებული სასწავლო მიზნებისა და ამოცანების მისაღწევად;
– გაუფრთხილდეს სკოლის ქონებას და მიზანმიმართულად გამოიყენოს სკოლის რესურსები;
– პროფესიული ან ინსტიტუციური პრივილეგიები არ გამოიყენოს პირადი მიზნებისათვის;
– იზრუნოს საკუთარ უწყვეტ პროფესიულ განვითარებაზე.
მოსწავლეებთან ურთიერთობის დროს, მასწავლებელი ვალდებულია:
– შეითავსოს მოსწავლის მრჩევლის ფუნქცია სასწავლო პროცესში წარმოქმნილი სირთულეების გადასალახად და, მოსწავლის სურვილის შემთხვევაში, დაეხმაროს მას პირადი პრობლემების მოგვარებაში;
– მოსწავლეს არ მიაყენოს სიტყვიერი ან ფიზიკური შეურაცხყოფა და არ მოახდინოს მასზე ემოციური (ფსიქოლოგიური) ზეწოლა;
– საკუთარ მოსწავლეს არ გაუწიოს დამატებითი ფასიანი საგანმანათლებლო მომსახურება, გარდა კანონმდებლობით გათვალისწინებული შემთხვევებისა;
– კონფლიქტურ სიტუაციებში შეინარჩუნოს სიმშვიდე, მოისმინოს მოსწავლეთა აზრი და მიიღოს ობიექტური და სამართლიანი გადაწყვეტილებები;
– სასწავლო პროცესის განმავლობაში, იზრუნოს მოსწავლის ჯანმრთელობის, პირადი უსაფრთხოებისა და საკუთრების დაცვაზე;
– დაეხმაროს მოსწავლეებს ჯანსაღი ცხოვრების წესისათვის აუცილებელი ღირებულებებისა და უნარ-ჩვევების ჩამოყალიბებაში და მაგალითი მისცეს მათ;
– მოსწავლეებთან ურთიერთობის დროს, დაიცვას მორალური და ზნეობრივი ნორმები;
– პატივი სცეს მოსწავლეთა აზრებს, შეუქმნას მათ ყველა პირობა იდეებისა და შეხედულებების თავისუფლად გამოსახატად;
– მოსწავლეებთან ურთიერთობაში არ დაუშვას რელიგიური და პოლიტიკური პროპაგანდა. ეთიკის კოდექსის მიხედვით, ,,რელიგიური პროპაგანდა“ დაშვებულია იმ სკოლებში, რომლებიც ეწევიან რელიგიურ საგანმანათლებლო საქმიანობას;
– არ გამოიყენოს მოსწავლის ფიზიკური და ინტელექტუალური შრომა ან პოტენციალი პირადი მიზნებისათვის;
– თანაბრად ყურადღებიანი იყოს მოსწავლის მიმართ, განურჩევლად სქესის, რასის, ენის, რელიგიის, ეროვნული, ეთნიკური და სოციალური კუთვნილების, ქონებრივი მდგომარეობის ან სხვა ნიშნისა და იზრუნოს, რომ ყველა მოსწავლემ მიიღოს ხარისხიანი განათლება, მათი სპეციალური საგანმანათლებლო საჭიროების მიუხედავად.
მშობლებთან ურთიერთობის დროს, მასწავლებელი ვალდებულია:
– ითანამშრომლოს მოსწავლის მშობელთან, იყოს თავაზიანი და საჭიროების შემთხვევაში, შეხვდეს მოსწავლის მშობელს;
– განუმარტოს მშობლებს სასწავლო გეგმისა და მის მიერ არჩეული სწავლების მეთოდებთან დაკავშირებული საკითხები;
– მოთხოვნისა და საჭიროების შესაბამისად, მშობელს დროულად და ინდივიდუალურად მიაწოდოს ინფორმაცია მოსწავლის აკადემიური მოსწრების შესახებ;
– ჰქონდეს ყველა მშობლის საკონტაქტო ინფორმაცია, რათა საჭიროების შემთხვევაში დროულად შეძლოს მშობელთან დაკავშირება, თუ მასწავლებელი კლასის დამრიგებელია;
– შეატყობინოს მშობელს მოსწავლის დისციპლინური დარღვევის შესახებ და ხელი შეუწყოს მის ჩართვას სკოლის შინაგანაწესით განსაზღვრულ დისციპლინურ წარმოებაში;
– დაუყოვნებლივ შეატყობინოს მშობელს, თუ მოსწავლე არ გამოცხადდა სკოლაში, ან მის ჯანმრთელობას და პირად უსაფრთხოებას საშიშროება დაემუქრა;
სკოლის დირექციასთან, მასწავლებლებთან და სკოლაში დასაქმებულ სხვა პირებთან ურთიერთობისას, მასწავლებელი ვალდებულია:
– თანაბარი პატივისცემით მოეპყრას სკოლის დირექციას, მასწავლებლებსა და სკოლაში დასაქმებულ სხვა პირებს, მიუხედავად მათი პროფესიული გამოცდილებისა თუ პიროვნული თავისებურებებისა;
– შეძენილი ცოდნა და გამოცდილება გაუზიაროს კოლეგებს და ითანამშრომლოს მათთან;
– ითანამშრომლოს სკოლის მანდატურთან და გაითვალისწინოს მის მიერ მიწოდებული ინფორმაცია;
– ითანამშრომლოს სკოლის დირექციასთან და წვლილი შეიტანოს სკოლის განვითარებისათვის დაგეგმილ ღონისძიებებში.
ზემოაღნიშნული წესების უხეში ან სისტემატური დარღვევა იწვევს პასუხისმგებლობას საქართველოს კანონმდებლობისა და მასწავლებელთან დადებული შრომითი ხელშეკრულების შესაბამისად.
