ხუთშაბათი, მარტი 28, 2024
28 მარტი, ხუთშაბათი, 2024

„სწავლება ხელოვნებაა, საკლასო ოთახი – გაშლილი ტილო, ხოლო შედეგი – მასზე ასახული შემოქმედება“- ტომ როჯერსის სტატიის შესახებ

„სწავლებაში დაოსტატება დაუჯერებლად რთული რამაა. სწავლება ხელოვნებაა, საკლასო ოთახი – გაშლილი ტილო, ხოლო შედეგი – მასზე ასახული შემოქმედება“. ასეთ სათაურს არქმევს ტომ როჯერსი 2016 წლის 8 აპრილს გამოქვეყნებულ თავის სტატიას.

სტატიაში განხილულია დიდი ბრიტანეთის რამდენიმე საგანმანათლებლო დაწესებულება, რომლებიც დამწყები მასწავლებლების გადამზადებას უწყობენ ხელს. ერთ-ერთი მათგანის ძირითადი მოწოდება გამოცდილების შეძენაა: უნდა ასწავლო, რომ ისწავლო მასწავლებლობა. თუმცა, როგორც ჩანს, საკუთარი პრაქტიკით სწავლების უნარ-ჩვევების შეძენა ძალიან რთული საქმეა, რის გამოც დამწყები მასწავლებლების 60% პირველივე წლის შემდეგ ან პირველი ხუთი წლის განმავლობაში თავს ანებებს მასწავლებლობას.

არც ბევრი საგნის ცოდნა, მაგისტრის ხარისხი, პედაგოგის კვალიფიკაცია ან მაღალი აკადემიური ხარისხის აღმნიშვნელი ტიტულებით სახელის და გვარის შემკობა  არ უზრუნველყოფს საკლასო ოთახში გაკვეთილის წარმატებით ჩატარებას.

ამის კარგი მაგალითი ბრიტანული სატელევიზიო გადაცემა „ჯიმის საოცნებო სკოლაა“, სადაც პროფესორები ატარებენ გაკვეთილებს მაღალი კლასის მოსწავლეებთან. გადაცემის დროს ექსპერტები დიდ ცოდნას ავლენენ, მაგრამ ბავშვებს უჭირთ იმ რთული სამეცნიერო ენის გაგება, რა ენითაც მათ პროფესორ-მასწავლებლები ესაუბრებიან.

ეს იმას არ ნიშნავს, რომ, მასწავლებლებს საგნის საფუძვლიანად ცოდნა არ მოეთხოვებოდეთ. პირიქით, მათ უნდა უყვარდეთ საკუთარი საგანი და მუდმივად იმაღლებდნენ ცოდნას. სტატიის ავტორი ცდილობს, განმარტოს, რა არის კარგი მასწავლებელი.

დილან უილიამის, დიდი ბრიტანეთის განათლების სპეციალისტის აზრით, მასწავლებლის საქმიანობა არ არის ცოდნის გადაცემა და სწავლის გაადვილება. მასწავლებელმა უნდა ააწყოს მოსწავლეებისთვის ეფექტური სასწავლო გარემო. ეფექტური სასწავლო გარემოს ძირითადი მახასიათებელია ყველა მოსწავლის ჩართულობა და მასწავლებლების და მოსწავლეების ხელშეწყობა, რომ სწავლება წინასწარ განზრახული მიმართულებით წარიმართოს.

სწავლების მაღალი ხარისხი  და კარგი მასწავლებლის მახასიათებლები ერთად ქმნის ეფექტურ სასწავლო გარემოს.

ავტორის აზრით, ჩვენს ცნობიერებაში უნდა ჩამოყალიბდეს სწორი წარმოდგენა სწავლების შესახებ. „სწავლება ხელოვნებაა. საკლასო ოთახი – გაშლილი ტილო, ხოლო შედეგი – მასზე ასახული შემოქმედება“. სწავლება შეიძლება მოხდეს ისეთ გარემოში, სადაც გადაწყვეტილების მიღება და კრიტიკული აზროვნება კარგადაა განვითარებული. ზოგი მასწავლებელი ხშირად ინსტინქტების დონეზე აგვარებს კლასში დაუმორჩილებელ ახალგაზრდებს შორის არსებულ დაუძლეველ პრობლემებს. მაგრამ, სხვებმა ნაბიჯ-ნაბიჯ, ნელა და მეთოდოლოგიურად უნდა ისწავლონ ამ ამოცანების გადაჭრა.

სწავლება მოითხოვს დიდ დროს, ენერგიას და ემოციებს. ეს უნდა გაიაზრონ დამწყებმა მასწავლებლებმა, რომ შეძლონ პროფესიით მუშაობა.

დიდ ბრიტანეთში ცნობილია, რომ დამწყები მასწავლებლები გაურბიან მასწავლებლობას. განათლების სპეციალისტები კი ქმნიან მასწავლებლების ხელშემწყობ პროგრამებს, რომ მათ სწავლება გაუადვილონ. ტომ როჯერსიც დამწყები მასწავლებლებისთვის წერს ამ სტატიას, რომ მათ გაუძლონ სწავლების პირველი წლის რთულ გამოცდას და განაგრძონ სწავლება.

მეც ვეძებე სტატისტიკური მონაცემები, რომ დამედგინა, რამდენმა ახალგაზრდამ მიატოვა სკოლა პირველი ხუთი წლის განმავლობაში, რათა წერილს ასეთი სათაური ჰქონოდა: „როგორ მოვანდომოთ ახალკურსდამთავრებულებს მასწავლებლობა?“

მონაცემები ვერ ვნახე. დავიჯეროთ, ჩვენთან მასწავლებლობას თავს არ ანებებენ?

კომენტარები

მსგავსი სიახლეები

ბოლო სიახლეები

ვიდეობლოგი

ბიბლიოთეკა

ჟურნალი „მასწავლებელი“

შრიფტის ზომა
კონტრასტი